Angeleerãpa pedee pia jaradap'edaa
19
1 Ma t'êepai mùa ûriji eperãarã chok'ara ùt'ari golpe pedeemaa p'anùk'a:—¡Ùt'aa t'âdáma Tachi Ak'õremaa!
¡Iru jõmaarã k'ãyaara waibùara bù!
Iruata tachi o k'achiadeepa k'aripa ataji atuanaadamerã.
Mapa Tachi Ak'õre aupaita waaweedaipia bù mãik'aapa iru jua ek'ari aupaita p'anapataadaipia bù.
2 Irua aupaita wãara jarapari. Irua ne–inaa pia ooji ma prostitutak'a bù jõt'aak'ãri.
Mãgùpa eujãdepemaarã k'achiade baaipiji, audú ne–inaa k'achia ãchimaa oopida k'aurepa.
Ma awara Tachi Ak'õredeerã peepachi.
Maperãpù Tachi Ak'õrepa jõt'aajida ajida.
3 Mãpai waya golpe pedeejida:
—¡Tachi Ak'õre jõmaarã k'ãyaara waibùara bù!
Mãgà wêra paa jõda nari jârak'awaa nâbù ichita k'irãpadait'eeda ajida.
4 Ma chonaarã poro waibùarã veinticuatro ma ne–inaa chok'ai bù k'îmari ome bedabaidachida Tachi Ak'õre, ma su–ak'ù beeparide su–ak'ù bù k'îrapite mãik'aapa mãgajida:
—¡Amén! ¡Tachi Ak'õre jõmaarã k'ãyaara waibùara bù!
5 Mãpai mùa ûriji ma su–ak'ù beeparideepa pedeeru:
—Parã jõmaarãpa Tachi Ak'õremaa jarapatáatù iru jõmaarã k'ãyaara waibùara bù.
Parã jõmaarãpa oopata irua oopi bùk'a mãik'aapa iru waaweepata, ek'ariara beerã, waibùara beerãpa paara mãga jaradaipia bù.
Oveja Chak'e miak'ãiit'ee bù fiesta
6 Mãpai waya ûriji ma eperãarã chok'ara pedeemaa p'anùk'a; to k'ida chaaree jîwaaparik'a maa–e pùrã pa golpe jîwaaparik'a:
—¡Ùt'aa t'âdáma Tachi Ak'õremaa!
¡Iru jõmaarã k'ãyaara waibùara bù!
Tachi Ak'õre Waibùapa ne–inaa jõmaweda bùru ichi jua ek'ari.
7 O–îa p'anadáma mãik'aapa iru waaweedáma, Oveja Chak'e miak'ãiit'ee fiesta paru perã.
Wêra ùmùk'îra ome miak'ãiparik'a bapariit'ee chi k'ima ome, mãga pùk'a Cristode ijãapataarã ichita p'anapataadait'ee iru ome.
Ãchia miak'ãipata p'aru jâ p'anù.
8 Tachi Ak'õrepa ma p'aru pi–ia teeji ãchimaa jâ p'aneedamerã iru ome p'aneedak'ãri.
Mãgà p'aru lino nãusaadee ooda.
T'o–t'oo bù maarepida t'ãu–e bairã.
Mãgà lino nãusaa jara k'inia bù Tachi Ak'õredeerãpa ne–inaa pia oopatap'edaa irua oopidak'a.
9 Mãpai ma angelpa mùmaa mãgaji:
—P'åji nãgà pedee: “O–îa p'anù chi Tachi Ak'õrepa t'â pëida eperãarã wãdamerã ma Oveja Chak'e miak'ãi bù fiestadee.”
Ichiaba mãgaji:
—Tachi Ak'õrépata mãgà pedee* jara bù *wãara.
10 Mùa mãga ûrik'ãri, bedabaidachi ma ángel k'îrapite irumaa ùt'aa t'âit'ee. Mamîda ichia mãgaji:
—¡Jãga oonáaji! Mù Tachi Ak'õre–it'ee mimiapari pùk'a mãik'aapa pù âpemaarãk'a; chi awaraarãmaa jarapataarãpa Jesupa ooda eperãarã k'aripait'ee. Tachi Ak'õremaa aupaita ùt'aa t'âpáde aji.
Tachi Ak'õre Jaurépata Jesupa ooda jarapi bù iru pedee jarapataarãmaa.
Caballo t'orroo ârù wãda
11 Mãpai mùa unuji ùt'ari ewaraa k'obù. Aùde caballo t'orroo unuji. Ma caballo ârù wã nipada t'âjarapata Ichita Oopari Ichia Jara Bùk'a mãik'aapa Wãarata Jarapari. Mãgà t'â jara p'anùk'a ichia ak'ùpari eperãarãpa oopata jarait'ee pia wa k'achia mãik'aapa chõopari ichi k'îra unuamaa iru p'anapataarã ome. 12 Chi tau urua nâbaji t'ùpùtauk'a. Poro jâra chok'ara jâ baji ichi porode. T'â p'ã baji ichi tau bùùrùde. Mamîda apidaapa k'awada–e pai ma t'â k'ãata jara k'inia bù. Ichia aupaita k'awa bù. 13 Ichi ârùpema p'aru jâ bada beek'ee baji waapa. Ichi t'âjarapata Tachi Ak'õre Pedee. 14 Angeleerã chok'ara nipajida iru ome soldaorãk'a. Mãùrã ichiaba wã nipajida caballo t'orroo ârù. P'aru lino nãusaadee jâ p'anajida. T'o–t'oo baji, maarepida t'ãu–ee bada perã. 15 Ichi it'aideepa uchia baji espada choma k'îraichaaweda p'ewedee bù. Mãgùpa ichia jõpiit'ee na eujãdepemaarã chok'ara; iru k'îra unuamaa iru p'anùùrã. Mãùrã jõpiit'ee eperãpa net'aa jõpik'ajik'a pak'uru hierrodee oodapa. Uva piart'ùpatak'a chi ba bõgo tapùadee wãmerã, mãga pùk'a ichia ma k'achia beerã bùit'ee Tachi Ak'õre juade piuk'oodamerã, iru k'îrau bairã ãchi ome. 16 Ichi ârùpema p'aru mak'ara ârù jâ badamãi nãgà t'â p'ã baji:
Reyrã Jõmaarã Rey mãik'aapa
Poro Waibùarã Jõmaarã Poro Waibùa.
17 Mãpai mùa unuji ángel bainâ bù ak'õrejîru k'îrapite. Mãgùpa golpe pedeeji ipanaarã ùt'à wãabaipataarãmaa:
—Chétù; cheepurútù k'odait'ee chik'o waibùa Tachi Ak'õrepa teeru. 18 Chétù piudap'edaarã chiara k'ode: reyrã chiara; soldaorã poro waibùarã chiara; eperãarã poro waibùarã chiara; ichiaba caballo chiara mãik'aapa aù ârù wãpataarã chiara; eperãarã jõmaarã chiara; esclavo–eerãde, esclavoorãde paara, ek'ariirãde, waibùarãde paara.
19 Mãpai unuji mãgà nemîsia na p'ek'au eujãdepema reyrã ome mãik'aapa ãchi soldaorã ome. Mãgùùrã chip'e p'anajida jura chõonadait'ee ma caballo t'orroo ârù wã nipada ome mãik'aapa iru eere p'anadap'edaarã ome. 20 Mamîda ichia ma nemîsia jita ataji ma ne–animal k'achia ome; chi mãgà nemîsia k'îrapite oodapa ne–inaa eperãarãpa p'oyaa oodak'aa ãchi juadoopa. Mãga oo bùpa ma ne–animal k'achia, chi seewa jaraparipa eperãarã k'ûraji ma nemîsia tauchaa bùpidamerã ãchi k'ap'ùade mãik'aapa ma nemîsia k'îrak'a bùmaa ùt'aa t'âpataadamerã. Ma caballo t'orroo ârù wã nipadapa ma nemîsia ma seewa jarapari ome chok'ai bùta bat'ak'ooji lagok'a t'ùpùtau azufre ome jêrajêraa jira bùdee. 21 Mãgùùrã ome nipadap'edaarã piuk'oojida mãgà espada uchiadapa ma caballo ârù wã nipada it'aideepa. Mãpai ipanaarãpa mãùrã k'ap'ùa piuda jõmaweda k'o chejida. K'ojida bi jãwaarutamaa.