Babilonia p'uuru waibùa jõda
18
1 Ma t'êepai mùa unuji awaraa ángel ùt'ariipa baai cheru. Mãgà angeleerã poro waibùa paji. Mapa ichi baai cherude eujã âdaadachi ichi k'îra wãreepa. 2 Mãgùpa golpe pedeeji:—¡Jõdachi; jõdachida aji, jã p'uuru waibùa Babilonia!
Ârá mãgà p'uuru badamãi jaure k'achia beerã te padachi, netuaraarã aupai mama p'anapata perã.
Mama ichiaba p'anapata ipanaarã k'îra t'ãdoo Tachi Ak'õrepa k'iniak'aa eperãarãpa k'odamerã.
3 Na p'ek'au eujãdepemaarã jõmaarãpa mãgà wêra vino topachida piudarutamaa.
Pia jarait'eera, ne–inaa k'achia ooi awaa p'aneejida iru k'aurepa.
Ichiaba na p'ek'au eujãdepema reyrãpa p'ek'au k'achia k'îra t'ãdoo oopachida mãgà wêra k'aurepa.
Ma awara na p'ek'au eujãdepema net'aa netopataarãpa p'arat'a waibùa atapachidada aji, mãgà wêrapa audú net'aa p'e wãda k'aurepa ichi–it'ee.
4 Mãpai ùt'ariipa awaraa ûriji nãga pedeeru:
—Mùchideerã, uchiadapáde aji ma p'uurudeepa, auk'a oonaadamerã mãgà p'uuru pidaarãpa ne–inaa k'achia oopatak'a mãik'aapa uchiadapáde aji, jõnaadamerã ãchi ome.
5 Tachi Ak'õrepa mãgùùrã miapiit'ee ãchia ne–inaa k'achia oopata k'aurepa, audú ne–inaa k'achia chok'ara oopatap'edaa perã.
6 Mùchi angeleerã, ne–inaa k'achia óotù mãgà wêramaa, ichia awaraarãmaa ne–inaa k'achia ooda pari.
Ne–inaa k'achia audú óotù irumaa, ichia ne–inaa k'achia ooda chaa.
Mãgá parãpa audupùara k'achia oodait'ee ichimaa, ichia ooda k'ãyaara awaraarãmaa.
7 Ichi audú t'ãri p'uapítù mãik'aapa miapítù audua pedeeda pari mãik'aapa net'aara iru bù pari.
Ichi t'ãridepai audua pedee jarapari:
“¡Mùta nama su–ak'ù bù reinak'a!
Eperãarã jõmaweda mù jua ek'ari p'anù.
Mù t'ãri p'ua ba–e p'êtrãak'a.
Mù k'ima wê–e perã, mù chi–ùa–eda” aji.
8 Ma audua pedee k'aurepa k'ãima abaade ichi atu bùde nãgee ne–inaa k'achia k'îra t'ãdoo p'asait'ee:
Piuit'ee, t'ãri p'ua bait'ee mãik'aapa jarra ooit'ee.
T'ùpùtaude paat'aadait'ee ichia k'achia oopata k'aurepa.
Tachi Ak'õre jõmaarã k'ãyaara waibùara bùpata mãga oopiit'ee.
9 +Na p'ek'au eujãdepema reyrã, ma p'ek'au k'achia oopatap'edaarã ma wêra ome mãik'aapa p'arat'ara atadap'edaarã ichi k'aurepa jarajêedait'ee unudak'ãri nari jârak'awaa nâbù ichi paadadeepa. 10 Ichi mãgá jõru misa, ma reyrã t'ùmà bainâ p'anadait'ee, Tachi Ak'õrepa ãchi auk'a miapii jîak'aapa. Mãpai jaradait'ee:
“¡Aai, p'uuru waibùa Babilonia; p'uuru jõmaarã k'ãyaara waibùara bù!
Hora abaade, taarã–ee jõpiji Tachi Ak'õrepa.”
11 +Na p'ek'au eujãdepema netopataarã ichiaba jarajêedait'ee ma p'uuru jõda k'aurepa. Mãga oodait'ee waa wê–e pait'ee perã ãchi net'aa netodamerã. 12 Mama netopachida nêe; p'arat'a; mãu pi–ia; perla; p'aru linodee mãik'aapa sedadee, k'îra p'oree p'up'uchia ome; pak'uru t'ûa; ne–inaa ooda marfildee,a pak'uru pi–iadee, broncedee, hierrodee, mãu pia marmoldee. 13 Ichiaba mama netopachida canela awaraa ne–aliño t'ûa beepari ome; ne–inaa t'ûa beepari eperãarãpa paapata; mirra k'era awaraa k'era ome; vino; aceite; harina nãusaa; trigo tau mãik'aapa nãgee ne–animalaarã: p'ak'a, oveja, caballo; carro caballopa jidiupata mãik'aapa esclavoorã, eperãarã paara netopatap'edaa perã. 14 Ma ne–inaa netopataarãpa jaradait'ee ma p'uuru jõdamaa:
“¡Ârá pùa chik'o pi–ia net'aa pi–ia ome wêe bùda adait'ee!
Pùa net'aara mãik'aapa p'arat'ara iru bada atuadachi.
Waa unudak'aa pait'eeda” adait'ee.
15 +Mãgà netopataarã, chi p'arat'ara atadap'edaarã ma p'uuru k'aurepa, t'ùmà bainâ p'anadait'ee ma p'uuru jõru misa, Tachi Ak'õrepa ãchi auk'a miapii jîak'aapa. Mãpai jarajêedait'ee:
16 “¡Aai, p'uuru waibùa!
Pù wêra jîak'a bapachida adait'ee, p'aru pi–ia linodee ooda jâ bù; p'aru p'up'uchia p'oree ome.
¡Nêe jâ bapachi mãu pi–ia ome, perla ome!
17 ¡Taarã–e nùde jõmaweda pùa ne–inaa pi–ia iru bada jõdachida adait'ee!”
+Ichiaba t'ùmà p'aneedait'ee barco p'erapataarã, chi barcode mimiapataarã mãik'aapa mãùrã ome nipapataarã. Jõmaweda p'anapataarã ne–inaa p'usadeepa ata p'anù k'aurepa t'ùmùùpa jãgà p'uuru jõru unudait'ee. 18 Nari jârak'awaa nâbù ak'ù p'anùde golpe pedeedait'ee: “¿Awaraa p'uuru paraajik'ã nãgà p'uuru waibùak'a?” 19 Jarajêe bù misa, yooro p'ora ùt'aa #p'o?bat'adait'ee baaimerã ãchi poro ârù. Mãgá ak'ùpipata ãchi t'ãri p'ua p'anù. Mãpai golpe pedeedait'ee:
“¡Aai, p'uuru waibùa!
Pùchia net'aa p'e wãda k'aurepa p'usade nidá barco chipariirã jõmaweda p'arat'ara padachida.
Ârá, taarã–eweda, pùchia iru bada jõmaweda jõdachida adait'ee.
20 O–îa p'anéetù angeleerã, Tachi Ak'õrepa ma p'uuru jõt'aada perã.
Ichiaba o–îa p'anéetù parã Tachi Ak'õredeerã, Cristopa pëida mãik'aapa Tachi Ak'õre pedee jarapataarã.
Tachi Ak'õrepa ma p'uuru jõt'aaji, aùde p'anadap'edaarãpa parãmaa ne–inaa k'achia oodap'edaa perã.”
21 Mãpai ángel juataura bùpa mãu tapùa k'ûrumak'a bù jira ataji mãik'aapa bat'at'aaji p'usade. Maap'eda mãgaji:
—Jãgá pù baaiit'ee, p'uuru waibùa Babilonia.
Pù waa unudak'aa pait'ee.
22 Pùchi calle jãde waa ûridak'aa pait'ee arpa chaapata, flauta chaapata wa trompeta chaapata.
Pùchi jãde ne–inaa oo k'awaa bee apida unudak'aa pait'ee.
Ûridak'aa pait'ee eperãarãpa k'ûrumade ne–inaa bapata.
23 Pùchi jãde lámpara âdaadak'aa pait'ee.
Miak'ãipata fiestade pedee o–îa ûridak'aa pait'ee.
Ma jõma wêpait'ee, pùchi netopataarã waibùara p'anajida mîda awaraa netopataarã k'ãyaara mãik'aapa pùa p'uuru pidaarã jõmaweda k'ûrapachi mîda, petau tau net'aa k'awaa bù oo bùpa.
24 Tachi Ak'õrepa ma p'uuru jõt'aaji, aùde eperãarãpa peedap'edaa perã iru pedee jarapataarã, ichideerã mãik'aapa awaraarã.