Tachi Ak'õrepa wêra t'ãri k'achia–idaa bù<R>k'achia ooda
17
1 Ma angeleerã sieteerãpa vaso iru p'anadap'edaa, mãùrãdepema aba mùmaa cheji mãik'aapa mãgaji:—Chéji. Mùa ak'ùpiit'eeda aji, sãga Tachi Ak'õrepa k'achia ooit'ee wêra jõmaarãpa k'awa p'anù. Mãgà prostitutak'a bù su–ak'ù baparík'apù bù to k'ait'ak'ait'aa jêra bùmãi. 2 Na p'ek'au eujãdepema reyrãpa p'ek'au oopachida, araa padak'ãri mãgà wêra ome. Ma awara na p'ek'au eujãdepemaarãpa ooi awaa p'anapachida ne–inaa k'achia k'îra t'ãdoo ichia oodak'a.
3 Maap'eda ma k'ãimok'araa pùk'a bùde Tachi Ak'õre Jaurepa unupida mùmaa, ma angelpa mù ateeji eujã eperãarã mak'ùara wêe jêra bùdee. Mama bùde unuji ma prostitutak'a bù su–ak'ù bù nemîsia p'oree bù ârù. Mãgà nemîsia k'ap'ùa jõma ârù Tachi Ak'õre t'â p'ã jêra baji, oo iru bait'ee. Mãgà nemîsiapa poro siete mãik'aapa cacho diez iru baji. 4 Mãgà wêrapa p'aru p'up'uchia p'oree ome jâ baji. Ichiaba nêe, mãu pi–ia mãik'aapa perla jâ baji. Ichi juade iru baji copa nêedee ooda. Mãgà ipuru baji ne–inaa k'achia k'îra t'ãdoopa; ne–inaa jõmaweda Tachi Ak'õrepa unuamaa iru bù. 5 Ichi tau bùùrùde nãgà t'â p'ã baji:
P'uuru Waibùa Babilonia,
Prostitutaarã
mãik'aapa Ne–inaa K'achia K'îra T'ãdoo
Oopataarã Nawe Apata.
Eperã apidaapa k'awada–e ma t'â k'ãata jara k'inia bù. Tachi Ak'õrepapaita k'awa bù. 6 Mùa unuji mãgà wêra piu pùk'a bù. Eperã it'uapa piudaik'ãri, o–îadaiparik'a, mãga pùk'a mãgà wêra o–îadachi Tachi Ak'õredeerã, Cristode ijãa p'anadap'edaarã peepida perã.
—¿Sãap'eda pù p'era pùk'a nâbùma? aji. Mùa jarait'ee ne–inaa pùa waide k'awa–e bù. Jarait'ee k'ãata jara k'inia bù mãgà wêra mãik'aapa ichi su–ak'ù bù ârù nemîsia; mãgà poro siete, cacho diez iru bù. 8 Ma nemîsia pùa unuda naaweda chok'ai bapachi mîda, ârá wê–e. Mamîda na ewari uchiait'ee ma uria nãpùa bùdeepa, wãi naaweda Tachi Ak'õrepa jõt'aait'eemaa. Na p'ek'au eujãdepemaarã, chi Tachi Ak'õrepa na eujã ooi naaweda t'â p'ã–ee beerã Tachi Ak'õre ome ichita p'anapataadait'eerã t'â p'ã jêra bù librode ùt'ari, mãùrãpa ak'ùtrua para bait'ee mãgà nemîsia unudak'ãri. Mãgà bapachi mîda, ârá wê–e. Mamîda waya cheit'ee.
9 +Mùa nãgà pedee jararu k'îsia k'awaa beerã–it'ee, aùde k'îsia p'anadamerã mãik'aapa k'awaadamerã wãara k'ãata jara k'inia bù. Ma nemîsia poro siete jara k'inia bù ee siete. Mamãik'aapa ma wêrapa eperãarã ak'ùpari. Ichiaba ma poro chaachaa jara k'inia bù rey aba. 10 Ma reyrã sietedepema joisomaa piujida. Ârá abaapa eperãarã iru bù ichi jua ek'ari. Chi apema waide uchia–e. Mamîda mãgà t'êepema rey uchiak'ãri, taarã–epai eperãarã iru bapariit'ee ichi jua ek'ari. 11 Mãgà nemîsia chok'ai bada mamîda ârá wê–e ma reyrã siete t'êe uchiait'ee, aù eerepemak'a. Mamîda wãara mãgà ma sietedepema uchiada pait'ee. Waya eperãarã iru bapariit'ee ichi jua ek'ari. Mãgùta wãit'ee Tachi Ak'õrepa jõt'aait'eemaa.
12 +Mãgà cacho diez pùa unuda jara k'inia bù reyrã diez waide uchiada–e p'anù. Mamîda ma nemîsia uchiak'ãri, taarã–e ma reyrã ichi ome eperãarã iru p'anadait'ee ãchi jua ek'ari. 13 Ma reyrã diez auk'a k'îsiadait'ee mãik'aapa ma nemîsia eere t'îudait'ee. 14 Jura chõonadait'ee ma Oveja Chak'e ome. Mamîda irua ãchi jõmaweda p'oyaait'ee. Iru eere p'anadait'eeda aji, eperãarã Tachi Ak'õrepa jùrùda irude ijãapataadamerã, chi jùrùt'eradaarã choopatap'edaa perã Cristode ijãa p'anùde. Iru Rey jõmaarã rey mãik'aapa iru Poro Waibùa jõmaarã poro waibùa.
15 Ma angelpa ichiaba mãgaji:
—Ma to chok'ara k'ait'ak'ait'aa bùmãi, mãgà prostitutak'a bù su–ak'ù pùk'a bùmãi, jara k'inia bùda aji, eujãdepemaarã, p'uuru pidaarã, ëreerã k'îra t'ãdoo mãik'aapa pedee k'îra t'ãdoo pedeepataarã. 16 Ma reyrã diez pùa unuda mãgà nemîsia ome, mãgà prostitutak'a bù k'îra unuamaa iru p'aneedait'ee. Mapa ãchia jãri atadait'ee jõmaweda ma wêrapa ne–inaa iru bù, ãk'adaa pùk'a beemerã. Maap'eda iru paa jõdait'ee. 17 Tachi Ak'õrépata ma k'îsia bùji ãchi t'ãride mãga oodamerã, ichia naaweda k'îsia iru badak'a. Ichiaba ichiata k'îsiapiji mãgà reyrãmaa ma nemîsia eere t'îudamerã ichia jarada jõru misa. 18 Mãgà wêra pùa unuda jara k'inia bùda aji, p'uuru waibùa, aù jua ek'ari na p'ek'au eujãdepema reyrã p'anapata.