Tachi Ak'õrepa k'achia ooda eperãarãmaa<R>vaso wet'aada k'aurepa
16
1 Mãpai mùa ûriji Tachi Ak'õre ùt'ari golpe pedeemaa bù. Ma pedee uchiaji ichi ùt'aripema tedeepa. Mãgaji ma angeleerã sieteerãmaa:—Wåtù mãik'aapa eujã ârù wet'áatù ma vaso siete ipuru p'anù mù k'îrau bùpa. Mãgá mùa eujãdepemaarã miapiit'ee.
2 Aramãgá ma naapùara ángel wãji mãik'aapa ichi vasode iru bada wet'aaji eujã ârù. Mãpai eperãarã jõmaweda ma nemîsia k'îrak'a bùmaa ùt'aa t'âpatap'edaarã mãik'aapa ichi tauchaa iru p'anapatap'edaarã k'ayaadachida ne–inaa k'achiapa aida–idaa bùk'a. Mãgùpa ãchi audú mia p'aneejida, p'ua nâbada perã.
3 Mãpai araarepema angelpa ichi vaso wet'aaji p'usa jãde. Mãpai pania aùde nâbù eperã piuda waak'a padachi. Mapa ne–inaa chok'ai p'anadap'edaarã aùde nâbù jõmaweda piudachida.
4 Mãpai ma omé eerepema angelpa ichi vaso wet'aaji to bee ârù mãik'aapa pania poátrù uchiapata ârù. Ma pania jõmaweda tachi waa padachi. 5 Maap'eda ûriji ángel awara bùda pania jâamerã pedeemaa bù. Mãgùpa mãgaji:
—Tachi Ak'õre, jõmaarã k'ãyaara pùa ne–inaa piara oo bù.
Pù ichita bapari mãik'aapa ichita bapachi.
6 Pùa pia ooji mãgá pania waa papik'ãri, jãgà eperãarãpa pùchideerã waa mãik'aapa pù pedee jarapataarã waa bat'apidap'edaa perã, ãra pee atapëidak'ãri.
Maperãpù jãgùùrãmaa waa topimaa bù.
Mãgà todaipia bù jãgeerãpa.
7 Ichiaba mùa ûriji ángel pedee uchia bù altardeepa:
—Wãarapù, Tachi Ak'õre Waibùa.
Pùa pia oo bù, mãga ook'ãri k'achia beerãmaa.
8 Mãpai ma õpee eerepema angelpa ichi vaso wet'aaji ak'õrejîrumaa, ak'õrejîrupa eperãarã paak'oomerã t'ùpùtaupa paaparik'a. 9 Mãgá eperãarã jõmaweda mia p'aneejida ma paada p'uapa. Mamîda ãchia ne–inaa k'achia oopata oo amaa k'iniada–e paji mãik'aapa Tachi Ak'õre waawee k'iniada–e paji. Ma k'ãyaara ik'achia jarapachida Tachi Ak'õremaa, irua ma k'achia ãchimaa pëida perã.
10 Mãpai ma k'îmari eerepema angelpa ichi vaso wet'aaji mãgà nemîsia su–ak'ù beepari ârù. Mãpai ma nemîsia trua, na p'ek'au eujã jõmaweda p'ãriude beeji. Eperãarã aùde p'anadap'edaarãpa ãchi k'îrame k'aak'oopachida, p'ua chooda–e p'anadap'edaa perã. 11 Mãgá mia p'anapachida mîda, oo amaa k'iniada–e paji ãchia ne–inaa k'achia oopata. Ma k'ãyaara ik'achia jarapachida Tachi Ak'õre ùt'aripemamaa, ãchi p'ua jõnada k'aurepa mãik'aapa ãchi aida–idaa p'anadap'edaa k'aurepa.
12 Mãpai ma joisomaa eerepema angelpa ichi vaso wet'aaji Éufrates to waibùa jãde p'oodaimerã. Mãgá reyrã ak'õrejîru uchiapari eereepa jîp'a chedai.
13 Mãpai mùa unuji jaure k'achia beerã õpee, baso k'îrak'a bù. Mãgùùrã uchiajida je choma bù it'aideepa, nemîsia it'aideepa mãik'aapa ma ne–animal k'achia; chi seewa jarapari it'aideepa. 14 Mãgà jaure k'achia beerã netuaraarã. Mãgùùrãpa oopachida ne–inaa eperãarãpa p'oyaa oodak'aa ãchi juadoopa. Wãpachida na p'ek'au eujãdepema reyrãmaa mãik'aapa ûraapachida chip'edaidamerã jura chõode Tachi Ak'õre Waibùa ome iru ewari waibùa ewate.
15 Mãpai Tachi Waibùapa mãgaji:
—¡Ûrítù! Parã atu bùde mù cheit'ee nechùapari cheparik'a. Tachi Ak'õrepa k'îra jîp'a nipapataarã pia ak'ùit'ee. Mãùrã k'îra nejasiada–e pait'ee atu bùde mù chek'ãri.
16 Ma reyrã jaure k'achia beerãpa ûraadap'edaa chip'edachida abaamãi, hebreo pedeede t'âjarapachida Armagedón.
17 Mãpai ma seis eerepema angelpa ichi vaso wet'aaji. Mãga nùde Tachi Ak'õre golpe pedee uchiaji ichi ùt'aripema tedeepa; ichi su–ak'ù beeparideepa. Mãgaji:
—¡Jõdachida aji, mùa k'îsia iru bada k'achia beerã miapiit'ee!
18 Mãga jararude pa baaiji, pa jîwaa nâbaji mãik'aapa awêrachaipa na p'ek'au eujã golpe wëret'aaji. Audú golpe wëreji. Eperãarã na eujãde p'aneedak'ãriipa awêrachai apida ma k'ãyaara golpeera wëre–e paji. 19 Mãgá golpe wërek'ãri, chi p'uuru waibùa t'oodachi t'ooma õpeede. Apema p'uuru na p'ek'au eujãde p'anù jõdachida. Tachi Ak'õrepa k'awaji ma p'uuru waibùa Babilonia pidaarãpa oopatap'edaa. Audú k'îrau bada perã ãchi ome, mãgà p'uuru miapiji. 20 Ma awara ma wëre nâbùde jõmaweda isla ee ome wêpadachida. 21 Mãga nùde ùt'ariipa hielo k'oi tau tapùa bùk'a baai cheji eperãarã ârù. Ma chaachaa cuarenta kilo waa paji. Mãga bak'ãri, eperãarãpa ik'achia jarajida Tachi Ak'õremaa ma hielo tau tapùa k'aurepa, audú golpe tee bada perã.