Ne–inaa k'achia siete p'asait'ee bada
15
1 Mãpai mùa ne–inaa awara waide unuk'aa pada ùt'ari unuji. P'era pùk'a beeji mãga unuk'ãri. Unuji angeleerã siete. Ma chaachaa ne–inaa k'achia atee wãji p'asapiit'ee eperãarãmaa. Mãgà ne–inaa k'achia siete aupadak'ãri, Tachi Ak'õre k'îrau bada na p'ek'au eujãdepemaarã ome jõit'ee.2 Ichiaba unuji ne–inaa lago bëi–sãa pùk'a, vidriodee oodak'a, t'ùpùtau ome p'oirada. Aù ik'aawa bainâ p'anajida chi p'oyaadap'edaarãpa mãgà nemîsia, ichi k'îrak'a mãik'aapa ichi t'â maa–e pùrã número tauchaa bùdaarã eperãarã k'ap'ùade. Ma bainâ p'anadap'edaarãpa arpa Tachi Ak'õrepa ãramaa teeda iru p'anajida. 3 K'arimaa p'anajida Tachi Ak'õre mimiapari Moisepa k'aridak'a mãik'aapa Oveja Chak'edeerãpa k'aripatak'a:
—Tachi Ak'õre Waibùa, pùa jõmaarã k'ãyaara ne–inaa piara oopari.
Pùta jõmaarã eujãdepemaarã Rey.
Pùa ne–inaa jõma pia k'îsia iru bù mãik'aapa ichita wãarata jarapari.
4 Tachi Waibùa, ¿k'aipa pù waawee–e paima?
¿K'aipa pù t'â t'o–e paima?
Pù aupai k'achia wêe bapari.
P'uuru pidaarã jõmaweda chedait'ee ùt'aa t'âde pù k'îrapite, pùa pia oopari perã k'achia beerã miapik'ãri.
5 Ma t'êepai unuji Tachi Ak'õre ùt'aripema te ewa bù. Ma te edajãde unuji iru baparimãi. Mãgùmãi chonaarãwedapema Ak'õre te ne–edee ooda edupùara bù cuarto jîak'aa paji. 6 Mãpai unuji ma tedeepa angeleerã siete uchia p'anù. Mãùrã paji ne–inaa k'achia ateepataarã p'asapidait'ee eperãarãmaa. P'aru linodee jâ p'anajida. Ma p'aru maarepida t'ãu–ee baji. Urua pùk'a baji t'o–t'oo bada perã. Ne–inaa k'ùrrùde jâpatak'a nêedee ooda nêrabai jâ p'anajida ãchi t'ûade. 7 Mãpai unuji ma Tachi Ak'õre ik'aawa p'anù ne–inaa chok'ai bù k'îmariidepema abaapa vaso nêedee ooda teeru ma angeleerã chaachaa. Ma vaso chaa ipuru baji Tachi Ak'õre k'îrau bùpa. ¡Iru ichita baparipù! 8 Tachi Ak'õre jõmaarã k'ãyaara waibùara bairã, ichi k'îra wãree uchia baji ichi baparimãiipa ma te ipururumaa. Maapai apida ma tede t'îudak'aa paji. Mãga baji ma angeleerã sieteerãpa ne–inaa k'achia atee p'anù jõruta misa.