Ciento cuarenta y cuatro mil ijãapataarã Oveja Chak'e ome
14
1 Mãpai mùa unuji ma Oveja Chak'e bainâ bù Sión ee nok'ode. Ichi ome p'anajida ciento cuarenta y cuatro mil eperãarã. Ichi t'â mãik'aapa chi Ak'õre t'â p'ã baji ãchi tau bùùrùde. 2 Mãpai ùt'ariipa ûriji ne–inaa to k'ida chaaree jîwaaparik'a maa–e pùrã pa golpe jîwaaparik'a maa–e pùrã arpa chaapataarã chok'araarãpa ãchi arpa chaa p'anùk'a. 3 Ma eperãarã Oveja Chak'e ome p'anadap'edaarãpa k'ari chiwidi k'ari p'anajida Tachi Ak'õre su–ak'ù beepari k'îrapite, ma ne–inaa chok'ai bù k'îmari k'îrapite mãik'aapa ma chonaarã poro waibùarã veinticuatro k'îrapite. Awaraarãpa mãgà k'ari p'oyaa k'arida–e paji. Jîp'a ma ciento cuarenta y cuatro mil Cristopa na p'ek'au eujãdepemaarã o k'achiadeepa k'aripa atada, mãùrãpapaita mãgà k'ari k'awajida. 4 Mãùrã wêraarã ome k'ãida–e paji, ãchi p'anapata awara bùdap'edaa perã Tachi Ak'õre–it'ee. Mapa ãchi wãpata ma Oveja Chak'e wãrumaa mãik'aapa oopata irua ooparik'a. Cristopa ãra na eujãdepemaarã o k'achiadeepa k'aripa ataji, awaraarã k'ãyaara naapùara ofrendak'a p'anadamerã Tachi Ak'õre–it'ee mãik'aapa ichi–it'ee. 5 Ãchia maarepida seewa jaradak'aa paji, p'ek'au k'achia jõmaweda oo amaadap'edaa perã.Ángel õpeerãpa jaradap'edaa
6 Mãpai mùa unuji awaraa ángel ùt'ari wãabai ni. Mãgùpa Tachi Ak'õrepa pedee pia jara pëida atee baji eperãarãpa irude ijãadamerã. Ma pedee ichita bapari, jõ–ee. Ma pedee atee baji jarade na p'ek'au eujãdepemaarã jõmaarãmaa; ëreerã chaadepema, p'uuru chaadepema, pedee chaadepema mãik'aapa eujã chaadepema. 7 Golpe pedeepachi:
—Tachi Ak'õre waawee p'anapatáatù mãik'aapa irumaa jarapatáatù iru jõmaarã k'ãyaara waibùara bù. Ewari paji irua ak'ùmerã eperãarãpa oopata jarait'ee pia wa k'achia. Ùt'aa t'âpatáatù irumaa, iruata ooda perã pajã, na eujã p'usa ome mãik'aapa jõmaweda pania poátrù uchia bùmãi.
8 Mãpai mùa awaraa ángel unuji mãgà uchiada t'êe. Mãgùpa jaramaa baji:
—¡Jõdachi, jõdachipù p'uuru waibùa Babilonia! Ma p'uuru k'aurepa eperãarã jõmaarãpa p'ek'au k'achia k'îra t'ãdoo oopachida. Eperãpa vino topi bùk'a awaraamaa piudaimerã, mãga pùk'a ma p'uuru pidaarãpa p'ek'au k'achia k'îra t'ãdoo oopipachida awaraarãmaa.
9 Mãpai mùa awaraa ángel unuji ma omé uchiadap'edaa t'êe. Mãgàpata golpe pedeeji:
—Eperãarãpa ma nemîsiamaa mãik'aapa mãgà k'îrak'a bùmaa ùt'aa t'âruta pùrã mãik'aapa mãgùùrã tauchaa bùpiruta pùrã ãchi tau bùùrùde wa juade, 10 Tachi Ak'õrepa ãchi k'achia ooit'ee. Mãgà eperãarãpa Tachi Ak'õre vinota todait'ee. Mãgà vino jara k'inia bù iru jîp'a k'îrau bait'ee ãchi ome; chupùria k'awa–ee. Audú k'îrau bait'ee perã, ãchi miapiit'ee t'ùpùtau azufre ome audú wãsia bùpa. Mãga ooit'ee ichi angeleerã pia beerã k'îrapite mãik'aapa ma Oveja Chak'e k'îrapite. 11 Irua mãgùùrã mãgá âi–ee miapi bùpa nari jârak'awaa nâbait'ee ãstaawa, p'ãrik'ua pida. Tachi Ak'õrepa mãgùùrã mãgá miapi iru bait'ee, ãchia ùt'aa t'âpatap'edaa perã ma nemîsiamaa ichi k'îrak'a bù ome mãik'aapa ichi t'â tauchaa bùpidap'edaa perã ãchi k'ap'ùade.
12 Mapa Tachi Ak'õredeerãpa choodaipia bù ãchia oo p'anùde iru ûraade jara bùk'a mãik'aapa ãchi Cristode ijãa p'anùde.
13 Mãpai mùa ûriji ùt'ariipa nãga pedeeru:
—P'åji nãgà pedee: “T'ãri o–îa p'anù Tachi Waibùadeerã, chi namãik'aapa waa piudait'eerã k'achia beerã juapa.”
Mãpai Tachi Ak'õre Jaurepa mãgaji:
—Wãarapù. Mãùrã piudak'ãri, waa mimiada–e pait'ee. Ma k'ãyaara k'ãiwee p'anadait'ee. Tachi Ak'õre o–îa bait'ee ãra ome, ãrapa ne–inaa pia oopatap'edaa perã Cristo k'ap'ùa pari.
Angeleerãpa na p'ek'au eujãdepemaarã<R>ewadap'edaa
14 Mãpai mùa ak'ùji mãik'aapa unuji jâarara t'orroo. Aù ârù su–ak'ù baji Eperã Ak'õre Truadepema. Mãgùpa poro jâra nêedee ooda jâ baji. Ichi juade atee wãji nek'o esùùrù jõree p'ewedee bù. 15 Mãpai unuji awaraa ángel uchia bù Tachi Ak'õre baparimãiipa. Mãgùpa golpe pedeeji ma jâararade su–ak'ù bùmaa:
—Ara eperãarãpa net'a tau waraa bù ewapatak'a nek'opa, mãga pùk'a jã p'ek'au eujãdepema ijãapataarã p'e atáji. Ewari paji mãga oomerã.
16 Aramãgá ma jâararade su–ak'ù bùpa ijãapataarã p'e ataji.
17 Maap'eda awaraa ángel uchiaji Tachi Ak'õre ùt'aripema tedeepa. Mãgùpa nek'o esùùrù jõree p'ewedee bù ichiaba atee wãji ichi juade. 18 Mãga nùde awaraa ángel uchiaji ùt'aripema altarmãiipa. Mãgà ma altardepema t'ùpùtau jâapari paji. Mãgùpa golpe pedeeji ma ángel nek'o esùùrù jõree p'ewedee iru bùmaa:
—Eperãarãpa uva waraa bù k'ùmù t'ùap'epatak'a nek'opa, mãga pùk'a jã p'ek'au eujãdepema ijãadak'aa beerã p'e atáji, ma–it'ee ewari pada perã.
19 Aramãgá ma nek'o iru badapa na p'ek'au eujãdepema ijãadak'aa beerã p'e ataji uva p'e atapatak'a. Mãpai mimiapataarãpa uva p'e bùpatak'a bõgo tapùade piart'ùdait'ee mãik'aapa chi ba atadait'ee, mãga pùk'a ma angelpa ma ijãadak'aa beerã peek'ooji. 20 P'uurude taawa mãga ook'ãri, ma piudap'edaarã waa wee nâbeeji trescientos kilometros parumaa; chi nãpùa caballo t'ûa ùt'ùa aba parumaa.