Nemîsia p'usa jãdeepa uchiada
13
1 Mãpai mùa unuji nemîsia uchiaru p'usa jãdeepa. Mãgùpa poro siete iru baji mãik'aapa cacho diez. Chi cacho chaa poro jâra jâ baji. Jõdee chi poro chaa t'â p'ã baji. Tachi Ak'õre t'â chok'ara made p'ã jêra baji, irua mãga unuk'ãri, k'îraudaimerã. Mãgá ma nemîsiapa iru oo iru baji. 2 Mãgà nemîsia imamak'a baji. Mamîda chi bùùrù oso realdek'a baji. Chi it'ai león it'aik'a baji. Je choma bùpa ma nemîsia ichi jîak'a papiji, mãgùpa auk'a oomerã ma jepa ooparik'a mãik'aapa je choma bù jua ek'ari p'anùùrã auk'a iru bamerã ichi jua ek'ari. 3 Mãgà nemîsia poro aba su peet'aa baji espadapa, mamîda ichia jùpat'aaji. Mapa na p'ek'au eujãdepemaarã jõmaarãpa iru pia unupachida mãik'aapa irua oopi bùk'a oo k'inia p'anapachida. 4 Tachi Ak'õremaa ùt'aa t'âdai k'ãyaara, je choma bùmaa ùt'aa t'âpachida, iru juapa ma nemîsiapa ne–inaa k'îra t'ãdoo oopachi perã. Ma awara ma nemîsiamaa paara ùt'aa t'âpachida. Mãgapachida:—¿K'aita nãgà nemîsiak'a bùma? ¿K'aita chõoima iru ome?
5 Tachi Ak'õrepa ma nemîsia ichiak'au bùji ne–inaa k'achia k'îra t'ãdoo oo wãmerã atane cuarenta y dos wãyaaru misa. Mãgùpa pedee audua pedeepachi mãik'aapa ichi Tachi Ak'õreda a nipapachi. 6 Mãgá pedee k'achia jara wãpachi Tachi Ak'õre ãpùte mãik'aapa ichideerã ùt'ari p'anù ãpùte. 7 Ma awara Tachi Ak'õrepa mãgà ichiak'au bùda perã, jura chõo beeji Cristodeerã, chi at'ãri na p'ek'au eujãde p'anadap'edaarã ome, ãra p'oyaarumaa. Ichiaba mãgá ichiak'au bùda perã, mãgùpa ichi jua ek'ari p'e wãji eperãarã ëreerã chaadepema, p'uuru chaadepema, pedee chaadepema mãik'aapa eujã chaadepema. 8 Jõmaweda t'â p'ã–ee p'anùùrã Oveja Chak'e peedap'edaapa Tachi Ak'õre ome ichita p'anapataadait'eerã t'â p'ã jêra bù librode ùt'ari, mãùrãpa ma nemîsiamaa ùt'aa t'âdait'ee, tachia Tachi Ak'õremaa ùt'aa t'âpatak'a. Mãga p'anadait'ee Tachi Ak'õrepa na eujã ooi naaweda, aù p'ãda*librode ãchi t'â p'ã–ee p'anadap'edaa perã.
9 K'ùùrù êesaa p'anátù ûridamerã mùa jararu:
10 —Tachi Ak'õrepa k'îsia iru bù pùrã ma nemîsiapa parãdepema aba ãyaa ateemerã carcelde t'ù nâbùit'ee, mãga pait'ee.
Jõdee k'îsia iru bù pùrã mãgùpa parãdepema aba peemerã espadapa, mãga pait'ee.
Maperã Cristodeerã choodaipia bù ãchi ijãa p'anùde mãik'aapa Cristode ijãapataadaipia bù, ma k'aurepa piuruta pùjida.
Ne–animal k'achia eujãdeepa uchiada
11 Ma t'êepai mùa unuji *awaraa* ne–animal k'achia eujãdeepa uchiaru. Cacho omé iru baji Oveja Chak'epa iru baparik'a. Mamîda pedeepachi je choma pedeeparik'a. 12 Mãgùpa nemîsia k'îrapite ne–inaa k'îra t'ãdoo oopachi irua oo badak'a. Jaraji na p'ek'au eujãdepemaarã jõmaarãmaa ùt'aa t'âpataadamerã ma nemîsiamaa, chi poro aba su peedap'edaa jùpada. 13 Ichiaba ne–inaa k'îra t'ãdoo oopachi eperãarãpa p'oyaa oodak'aa ãchi juadoopa. Eperãarã taide t'ùpùtau paara baaipiji pajãdeepa na eujãde. 14 Tachi Ak'õrepa ichiak'au bùda perã, mãgee ne–inaa ooji. Mãgá ne–inaa eperãarãpa p'oyaa oodak'aa oo bùpa nemîsia k'îrapite, mãgùpa na p'ek'au eujãde p'anadap'edaarã jõmaweda k'ûrat'aaji. Ma awara jaraji ãchia oodamerã mãgà nemîsia espadapa su pee p'anadap'edaa chok'ai padaida k'îrak'a. 15 Tachi Ak'õrepa mãgà ne–animal k'achia ichiak'au bùda perã, ma nemîsia k'îrak'a chok'ai pùk'a beeji mãik'aapa pedeeji. Maap'eda ma k'îrak'a chok'ai pùk'a padaidapa peepiji jõmaweda ichi waawee k'iniada–ee p'anadap'edaarã. 16 Ma awara mãgà ne–animal k'achia t'êe uchiadapa tauchaa bùpiji jõmaarã eperãarã jua juaraarede mãik'aapa tau bùùrùde. Ma tauchaa bùjida ek'ariara beerãmaa, waibùara beerãmaa auk'a; p'arat'ara beerãmaa, chupùria beerãmaa auk'a; esclavo–eerãmaa, esclavoorãmaa auk'a. 17 Ma tauchaa wêe apidaapa ne–inaa neto atada–e pai mãik'aapa apidaapa ne–inaa neto pëida–e pai. Ma tauchaa ma nemîsia t'â maa–e pùrã ichi número paji.
18 K'îsíatù mùa jararude. Chi k'îsia k'awaa beerãpa k'awaa atadai ma nemîsia t'â, ichi número juasiadak'ãri. Ma número eperã número: seiscientos sesenta y seis.