Juanpa wêra je ome unuda
12
1 Mãpai mùa ne–inaa awaraa waide unuk'aa pada unuji. Pajãde unuji wêra ak'õrejîru urua nâbùk'a jâ bù. Bainâ baji atane ârù. Poro jâra lucero docedee ooda jâ baji. 2 Mãgà wêra biak'oo baji. Bi p'ira baji chi warra ewaa t'oit'ee bada perã. Mapa bia nâbaji.3 Mãpai ne–inaa awaraa waide unuk'aa pada padachi pajãde. Unuji je choma. P'oree baji mãik'aapa poro siete iru baji. Ma chaachaa poro jâra jâ baji. Ichiaba cacho diez iru baji. 4 Mãgà jepa ichi tru wirawiraarupa pajãde nâbù lucero perá esa–auk'aa baaipiji eujãdee. Mãgà bainâ banaji ma wêra k'îrapite mãik'aapa nùmaa beeji iru warra t'omerã, ma warra chai k'o atapëiit'ee pada perã. 5 Mãpai ma wêrapa ùmùk'îra warra t'oji. Ma warrapa reyk'a na eujãdepemaarã ichi jua ek'ari iru bapariit'ee. Reypa tuma hierrodee juade iru bùpa ooparik'a, mãga pùk'a irua ooit'ee. Mãgà je choma mama baji mîda, ma warra chai p'oyaa k'o–e paji, Tachi Ak'õrepa ãyaa ateepida perã ichi baparimaa ichi rey su–ak'ù beeparide. 6 Jõdee ma wêra mirudachi eperãarã mak'ùara wêe jêra bùmaa; Tachi Ak'õrepa k'îsia iru badamaa. Mama angeleerãpa nek'opijida mãik'aapa pia ak'ù p'anajida k'ãima mil doscientos sesenta.
7 Mãpai ùt'ari jura paraaji. Angeleerã poro waibùa Miguel awaraa angeleerã ome chõo jùrùjida mãgà je choma bù ome. Mãpai jepa ichideerã p'e atap'eda, chõojida. 8 Mamîda ma je choma bù eerepemaarã chooda–e paji. Angeleerãpa ãra ùt'ariipa jërek'oojida. 9 Mãgá bat'at'aajida ma je choma bù na p'ek'au eujãdee. Mãgà je choma chonaarãwedapema taama; Netuara Poro Waibùa maa–e pùrã Satanás apata. Mãgàpata na p'ek'au eujãdepemaarã k'ûrapari. Mãgà bat'at'aajida na p'ek'au eujãdee ichideerã ome.
10 Mãpai mùa ûriji Tachi Ak'õredeerã ùt'ariipa golpe pedee p'anù:
—Ârapù Tachi Ak'õrepa k'achia p'oyaaji mãik'aapa aupaji tachi o k'achiadeepa k'aripa atada atuanaadamerã.
Ârapù jõmaarã rey beeji mãik'aapa ichia pëida, Cristo jua ek'ari jõmaweda p'aneejida.
Mãga bù jëret'aadap'edaa perã ma ùmùateeparipa tachi âpemaarã Cristo k'aurepa.
Mãgà âi–ee tachi ùmùateepachi Tachi Ak'õre k'îrapite.
11 Mamîda tachi âpemaaråpata iru p'oyaapachida Cristopa ichi waa bat'ada perã ãra pari.
Ichiaba iru p'oyaapachida Cristopa ooda eperãarã k'aripait'ee awaraarãmaa jaradap'edaa perã.
Eperãarãpa ãra peedait'ee pak'ãri, waaweedak'aa paji piudait'ee ma jaradap'edaa k'aurepa.
12 ¡O–îa p'anadáma angeleerã, ùt'ari p'anapata perã!
Mamîda chupùria p'anù parã eujãde p'anapataarã mãik'aapa p'usade p'anapataarã Netuara Poro Waibùa parã t'ãide bapari perã.
Ichi audú k'îrau bù k'awa bairã taarã–e Tachi Ak'õrepa jõpiit'ee irua ne–inaa k'achia oopari.
13 Mãgà je choma bùpa k'awaa atak'ãri ichi na p'ek'au eujãde bù, ichi jëredap'edaamãi, ma wêrapa warra t'oda jùrùmaa beeji. 14 Mamîda Tachi Ak'õrepa nejâpù tapùa isia k'ara omé teeji ma wêramaa, mãgá ma je choma badamãiipa t'ùmà wãabaimerã ichia k'îsia iru badamaa; eperãarã mak'ùara wê–emaa. Mama nek'opidai mãik'aapa pia ak'ù p'anadai año õpee ap'eda esa–auk'a wãyaaru misa. 15 Mãga unuk'ãri, ma je choma bù it'aideepa pania jîchooji to chomadarumaa, to chomaapa ma wêra to barree ateei jîak'aapa. 16 Mamîda eujãpa ma wêra k'aripaji. Ewadachi mãik'aapa ma to choma je choma bùpa jîchooda weedachi aù uriade. 17 Mãga unuk'ãri, ma je choma bù audupùara k'îraudachi ma wêra ome. Mapa chõo jùrùnaji ma wêradeepa uchiadap'edaarã ome; chi na eujãde at'ãri nâbùùrã ome. Mãùrãpa oopata Tachi Ak'õre Ûraade jara bùk'a mãik'aapa ijãapata Jesupa jarateeda ûraade. 18 Mãpai mãgà je choma bù bainâ banaji p'usa ide.