Tachi Ak'õrepa eperãarã omé pëida ichi pedee jaranadamerã
11
1 Mãpai pak'uru sîautaa mùmaa teeji, mãgùpa ne–inaa chaamerã. Mãgaji:—Wåji chaade Tachi Ak'õre te chi altar ome. Ma awara aù tede ùt'aa t'âpataarã juasíaji. 2 Mamîda chaanáaji ma te ãtaude t'ùak'au bùmãi, mãgùmãi Tachi Ak'õrepa awara bùda perã ijãadak'aa beerã–it'ee. Atane cuarenta y dos wãyaaru misa, mãgùùrãpa ãchi jua ek'ari iru p'anadait'ee Tachi Ak'õrepa p'uuru jùrùt'erada ichi–it'ee.
3 Mãpai Tachi Ak'õrepa mãgaji:
—Mùa omé pëiit'eeda aji, chi–ùapata p'aru jâ p'anùk'a p'anù. Mãùrãpa jaradait'ee mùa jarapi bùk'a, ma k'ãima mil doscientos sesenta wãyaaru misa.
4 Mãgùùrã omé olivo bùùrùk'a p'anù mãik'aapa lámpara bùpatak'a p'anù; Tachi Waibùa, chi na p'ek'au eujã ooda k'îrapite p'anù. 5 Apidaapa ma omé jùrùruta pùrã miapidait'ee, t'ùpùtau uchia bù ãchi it'aideepa paa peeit'ee ãra k'îra unuamaa iru p'anapataarã. Mãgá piudait'ee jõmaweda ãra miapi k'inia p'anùùrã. 6 Tachi Ak'õrepa ne–inaa k'îra t'ãdoo ãramaa oopiji. Mapa ãrapa pajã jâa pùk'adai k'oi chenaamerã, Tachi Ak'õrepa jarapidak'a jara p'anù misa. Ma awara ãrapa k'iniadak'ãri, pania tachi waa papidai mãik'aapa eperãarã miapidai.
7 Mamîda jara aupadak'ãri jõmaweda Tachi Ak'õrepa k'îsia iru bada jarapiit'ee ãramaa, nemîsia uchiait'ee ma uria nãpùa bùdeepa mãik'aapa ãra ome chõo jùrùit'ee. Mãgùpa ãra p'oyaait'ee mãik'aapa peek'ooit'ee. 8 Ãra k'ap'ùa piuda calle jãde baip'aneedait'ee p'uuru waibùa Jerusalende; ãchi waibùa kurusode peedap'edaa p'uurude. Mãgà p'uuru ichiaba Sodoma maa–e pùrã Egipto apata. 9 Mama p'aneedait'ee k'ãima õpee ap'eda esa–auk'a. Mama p'anùde eperãarã eujã k'îra t'ãdoodepema, p'uurudepema, pedee k'îra t'ãdoo pedeepataarã mãik'aapa ëreerã k'îra t'ãdoorãpa ãra k'ap'ùa piuda ak'ùdait'ee mãik'aapa jaradait'ee ãra ùanaadamerã. 10 Na p'ek'au eujãdepemaarãpa ãra piuda ûridak'ãri, o–îa p'aneedait'ee mãik'aapa regalo tee para bait'ee o–îapa, ma Tachi Ak'õre pedee jarapataarã omeerãpa ãra miapidap'edaa perã.
11 Mamîda k'ãima õpee ap'eda esa–auk'a wãyaap'eda, Tachi Ak'õrepa ma omé chok'ai p'anapiji. Mãgá ãra p'irabaidachida. Jõmaweda mãga unudak'ãri, p'eradachida. 12 Mãpai ma omé ûrijida ùt'ariipa golpe pedeeru:
—¡Ùt'aa chétù!
Aramãgá ùt'aa wãjida jâararade, ãra k'îra unuamaa iru p'anadap'edaarã taide. 13 Aramata awêrachai golpe wëre nâbeeji. Ma p'uuru pidaarã diezdepema chaa aba jõdachi; mãgá eperãarã siete mil k'iniidachida. Chi p'aneedap'edaarã p'erarutapa ãchia ne–inaa k'achia oopata oo amaa k'inia p'aneejida. Mapa jarajida Tachi Ak'õre ùt'ari baparimaa, iruta wãara jõmaarã k'ãyaara waibùara bù.
14 Ma ne–inaa k'achia aba eerepema aupaji. Mamîda omé eerepema taarã–e pait'ee.
Trompeta seis eerepema chaada
15 Mãpai ángel seis eerepemapa ichi trompeta chaak'ãri, ùt'ariipa mùa golpe pedee ûriji. Chok'araarãpa jara p'anajida:
—‘Ârá wãara na p'ek'au eujãdepemaarã Tachi Ak'õre jua ek'ari p'anù mãik'aapa Tachi Waibùa Jesucristo jua ek'ari p'anù. Tachi Ak'õre ichita jõmaarã rey bapariit'ee.’ (Éxodo 15.18; Daniel 2.44)
16 Mãpai ma chonaarã poro waibùarã veinticuatro su–ak'ù p'anù ãchi rey su–ak'ù beeparide Tachi Ak'õre k'îrapite bedabaidachida irumaa ùt'aa t'âdait'ee. 17 Mãgapachida:
—Tachi Ak'õre Waibùa, pùta ichita bapari mãik'aapa ichita bapachi. Gracias jara p'anù pùmaa.
¡Pùta jõmaarã k'ãyaara waibùara bairã, jõmaarã rey paru!
18 Na p'ek'au eujãdepema p'uuru pidaarã t'ãri k'achia p'anapachida pù ome.
Ârá jõdee, pù k'îrau bait'ee ãra ome.
Ârapù pùa ak'ùit'ee piudap'edaarãpa oopatap'edaa mãik'aapa jarait'ee pia wa k'achia pù k'îrapite.
Ârá teeit'ee ne–inaa pia jõmaweda pùa k'îsia iru bùdepema teeit'ee pù mimiapataarãmaa, chi pù pedee jarapatap'edaarãmaa; pùchideerã jõmaarãmaa mãik'aapa pù waaweepataarã jõmaarãmaa, ek'ariara beerãmaa, waibùara beerãmaa paara.
Ichiaba ârapù eujãde ne–inaa k'achia oopatap'edaarãmaa pùa k'achia ooit'ee.
Juanpa Tachi Ak'õre ùt'aripema tede unuda
19 Mãpai Tachi Ak'õre ùt'aripema te ewadachi mãik'aapa ma edajãde mùa unuji baaltek'a bù Tachi Ak'õrepa ûraa Moisemaa p'ãpida ome. Mãga nùde pa tau p'orep'orepari unuji mãik'aapa pa jîwaa nâbaji. Ichiaba paraaji awêrachai mãik'aapa hielo k'oi tauk'a baaiji.