Joip'aruk'a bù pùrat'ùda k'aipee
10
1 Mãpai mùa unuji angeleerã poro waibùa awaraa. Mãgà ùt'ariipa cheji jâarara pùrat'ù nâbùde. Euma paraa baji ichi poro ârù. Chi k'îra urua baji ak'õrejîruk'a mãik'aapa chi jîru t'ùpùtau urua nâbùk'a baji. 2 Ichi juade iru baji joip'aruk'a pùrat'ùda k'aipee. Mãgà ewat'ù baji. Ma angeleerã poro waibùa na eujãde bainâ ba chek'ãri, chi jîru juaraarepema bùji p'usa ârù. Jõdee chi jîru juabi eerepema bùji eujã ârù. 3 Golpe biaji león biaparik'a. Mãgá biak'ãri, pa siete jîwaa nâbeeji pedee ome. Mãgá iru biak'ãri, papa p'anauji. 4 Mùa mãga ûrik'ãri, ma pedee p'ãit'ee paji. Mamîda ùt'ariipa pedee ûriji:—Apidaamaa jaranáaji pùa ûrida mãik'aapa ma pedee apida p'ãnáaji.
5 Mãpai ma ángel bainâ bada p'usa ârù mãik'aapa eujã ârù ichi jua juaraarepema ùaji pajãmaa. Ooji eperãarãpa oopatak'a ne–inaa juraadak'ãri Tachi Ak'õre k'îrapite, awaraarãpa ijãadamerã wãarata jara bù. 6 Mãpai ma angelpa ne–inaa jaraji Tachi Ak'õre ichita chok'ai bapari k'îrapite. Iruata ooji pajã mãik'aapa ne–inaa jõma aùde nâbù; na eujã mãik'aapa ne–inaa jõma aùde nâbù; p'usa mãik'aapa ne–inaa jõma aùde nâbù. Iru k'îrapite ma angelpa mãgaji:
—¡Taarã–ee Tachi Waibùapa k'achia beerã jõpiit'eeda! aji.
7 Angeleerã seis eerepemapa ichi trompeta chaak'ãri, aupait'ee Tachi Ak'õrepa k'îsia iru bada eperãarã–it'ee. Jõmaarãmaa mãga k'awapi–e paji. Ichi mimiapataarãmaa; ichi pedee jarapataarãmaa aupaita k'awapiji ichia k'îsia iru bada.
8 Mãpai ma naaweda ùt'ariipa pedee badapa waya mùmaa ne–inaa jaraji:
—Atanáji ma joip'aruk'a pùrat'ùda k'aipee ewat'ù bù, jãma bainâ bù p'usa ârù mãik'aapa eujã ârù iru bù ichi juade.
9 Aramãgá mù wãji ma angelmaa ma joip'aruk'a bù iidide. Ichia p'anauji:
—Jitáji mãik'aapa k'ot'áaji. Pùchi it'aide k'û–ûa bait'ee mielek'a. Mamîda pùchi bimaa pak'ãri, asia bait'ee.
10 Irua jaradak'a mùa ma joip'aruk'a bù atanaji mãik'aapa k'o pëiji. Wãara, mùchi it'aide k'û–ûa baji. Mamîda mit'aap'eda, mùchi bide pak'ãri, mù t'ãri uratù nâbeeji. 11 Mãpai mùmaa mãgaji:
+Pùa waya jaraipia bù Tachi Ak'õrepa jarapi bùk'a. Jaraipia bùda aji, irua ooit'ee bù p'uuru pidaarã chok'ara ome, eujãdepemaarã chok'ara ome, pedee chok'ara awara–awaraa pedeepataarã ome mãik'aapa reyrã chok'ara ome.