K'îmari eerepema trompeta chaada
9
1 Mãpai ma k'îmari eerepema angelpa ichi trompeta chaak'ãri, mùa unuji lucerok'a pajãdeepa baai cheda na eujãde. Mãgùpa llave jitaji ewait'ee arii uria bù, chi t'ai jâa nâbada perã. Ma uria audú nãpùa baji. 2 Ma uria t'ai ewak'ãri, narira uchia nâbeeji, nari waibùa uchiaparik'a t'ùpùtau waibùadeepa. Ma nari k'aurepa p'ãriudachi. Ak'õrejîru mãik'aapa pajã perá unu–e paji nari jârak'awaa nâbùpa. 3 Ma nari ome netuaraarã sisi k'ap'ùak'a uchiadachida mãik'aapa wãaichoo chejida na p'ek'au eujãdee. Eujãde pa wãdak'ãri, mùa unuji ne–inaa Tachi Ak'õrepa mãùrãmaa bùda; mãgà ne–inaa tusõrepa iru bùk'a eperãarã k'aait'ee. 4 Tachi Ak'õrepa mãùrãmaa jaraji p'ûajara apida; pak'uru jida ãrinaadamerã. Jîp'a p'ua oodaipia bùda aji, chi Tachi Ak'õre tauchaa wêe beerã ãchi tau bùùrùde. 5 Mamîda jaraji eperãarã k'aa peenaadamerã. Jîp'a p'ua oodaipia bùda aji, atane joisomaa wãyaaru misa. Mãùrãpa k'aada golpe p'ua nâbaji tusõrepa k'aada p'ua nâbaparik'a.6 Mãgá eperãarã k'aa jõnùde, ma eperãarã audú piu k'inia p'anadait'ee. Mamîda piuda–e pait'ee.
7 Mùa sisira unuji caballoorã uchiapatak'a jura chõode. Ne–inaa poro jâra nêedee oodak'a jâ p'anajida ãchi porode. Ãchi k'îra eperã k'îrak'a beeji. 8 Ãchi puda waree beeji; wêraarãdek'a mãik'aapa ãchi k'ida león k'idak'a beeji. 9 Ãchi t'ûade ne–inaa jâ p'anajida armadura hierrodee oodak'a. Wãaichook'oodaidak'ãri, ãchi isia jîwaapachida carro caballopa jidiupata jîwaapatak'a, chok'ara uchiadak'ãri jura chõode. 10 Ãchi trude ne–inaa awapari iru p'anajida, tusõreerãpa iru p'anapatak'a. Mãgùpa eperãarã k'aadait'ee atane joisomaa wãyaaru misa. 11 Ãchi rey Satanapa ãra chok'apari. Ichi ma uria nãpùa bù jâapari. Hebreo pedeede ichi t'âjarapata Abadón; griego pedeede Apolión; jara k'inia bù Eperãarã Peepari.
12 Ma naapùara ne–inaa k'achiara wãyaaji. Ne–inaa k'achiara omé at'ãri falta bù.
Joisomaa eerepema trompeta chaada
13 Mãpai ma joisomaa eerepema angelpa ichi trompeta chaak'ãri, mùa pedee ûriji altar nêedee oodadeepa. Ma altar Tachi Ak'õre k'îrapite bainâ baji. Ma altar ãuk'idaa k'îmariide cacho paraa. Madeepa ma pedee uchia baji. 14 Jaraji ma angelpa trompeta iru badamaa:
—K'ena pïiji angeleerã k'îmari Éufrates to ide jâa paraa p'anù.
15 Mãgà angeleerã k'ena pëik'ãri, uchiajida peenadait'ee na p'ek'au eujãdepemaarã õpeedepema chaa aba. Aù naaweda jâa paraa p'anajida nù p'anù misa año, atane, ewari mãik'aapa hora Tachi Ak'õrepa awara bùdamaa paru misa. 16 Mùa ûriji jaradak'ãri jõmasaa soldaorã p'e atadap'edaa caballok'a bù ârù wãdamerã ãchi ome. Audú chok'ara; doscientos millones paji.
17 Ma caballok'a bù mãik'aapa mãgà ârù wãdap'edaarã mùa unuji k'ãimok'araa pùk'a bùde. Ãchi t'ûade armadura jâ p'anajida. Ma armadura p'oree baji, t'ùpùtauk'a. Ichiaba p'ãp'ãraa baji mãu pi–ia jacintok'a. Ichiaba k'uaraa baji mãu azufrek'a. Ma caballoorãk'a beeda poro león porok'a beeji. Mãùrã it'aideepa uchiaji t'ùpùtau, nari mãik'aapa azufre p'ora. 18 Ma ne–inaa k'achia õpeepa; t'ùpùtaupa, naripa mãik'aapa azufrepa na p'ek'au eujãdepemaarã õpeedepema chaa aba piuji. 19 Ma caballoorãk'a beerãpa eperãarã mãgá p'oyaajida ãchi it'aipa mãik'aapa ãchi trupa, ãchi tru taama porok'a beeda perã. Mãgùpa auk'a eperãarã p'ua oopachida.
20 Mãgá eperãarã chok'ara piujida mîda ma k'achiapa, chi waide peeda–e p'anadap'edaarãpa ãchia ne–inaa k'achia oopata oo amaa k'iniada–e paji. Ùt'aa t'â amaa k'iniadak'aa paji netuaraarãmaa. Ichiaba ùt'aa t'â amaa k'iniadak'aa paji ãchia ne–inaa juapa ooda k'îrapite; ne–inaa nêedee ooda, p'arat'adee ooda, broncedee ooda, mãudee ooda, pak'urudee ooda. Mãgà k'îrapite ùt'aa t'â k'inia p'anapachida mãgee ne–inaa p'oyaa ak'ùk'aa mîda, p'oyaa ûrik'aa mîda mãik'aapa p'oyaa t'ùak'aa mîda. 21 Ichiaba awaraarã pee amaa k'iniadak'aa paji. Jaipanaarãpa oopatak'a oo amaa k'iniadak'aa paji. P'ek'au oo amaa k'iniadak'aa paji mãik'aapa nechùa amaa k'iniadak'aa paji.