Seis eerepema tauchaada ogat'aada
8
1 Oveja Chak'epa ma seis eerepema tauchaada ogat'aak'ãri, ùt'aripemaarã jõmaweda k'îuu nâbeeji. Mãgá p'aneejida perá hora esa–auk'a. 2 Ma t'êepai mùa unuji angeleerã siete, iru k'îrapite bainâ p'anapataarã. Mãgà chaa trompeta ãchi chaachaa jitajida. 3 Mãpai ángel awaraa cheji mãik'aapa bainâ beeji altar k'ait'a. Ichi juade k'uuruk'a bù nêedee ooda iru baji. Aùde ne–inaa t'ûa bapari paapachida Tachi Ak'õre–it'ee. Awaraapa irumaa ne–inaa t'ûa bapari waibùa teeji, p'oiramerã Cristodeerã ùt'aa t'âpata ome mãik'aapa bùmerã ma altar ârù Tachi Ak'õre–it'ee. Mãgà bùji altar nêedee ooda ârù; ma altar rey su–ak'ù beepari k'îrapite bainâ bù. 4 Ma ne–inaa t'ûa bapari paak'ãri, chi nari Cristodeerã ùt'aa t'âpata ome ma ángel juadeepa ùt'aa wãji Tachi Ak'õre baparimãi. 5 Mãpai ma angelpa t'ùpùtau atap'eda altardeepa, ma k'uuruk'a bù ipurut'aaji. Mãpai bat'at'aaji na p'ek'au eujãdee. Mãga oo bùde mùa ûriji pa jîwaa nâbù pedee ome. Ichiaba unuji pa tau p'orep'orepari mãik'aapa na p'ek'au eujã wëre nâbù awêrachaipa.Angeleerãpa trompeta chaadap'edaa
6 Mãpai ma angeleerã sieteerãpa trompeta iru p'anù ãchi juade ewaa jirajida chaadait'ee.
7 Chi naapùara angelpa ichi trompeta chaak'ãri, angeleerãpa hielo k'oi tauk'a bat'ajida na p'ek'au eujãdee. Ma hielo p'oira baji t'ùpùtau ome mãik'aapa waa ome. Perá eujã esajîak'aa paadachi. Ichiaba pak'uru õpeedepema chaa aba mãik'aapa p'ûajara jõmaweda paadachi.
8 Araarepema angelpa ichi trompeta chaak'ãri, mãu choma t'ùpùtau ome urua nâbù bat'ajida p'usa jãdee. Mãpai perá p'usa jã esajîak'ab waa padachi. 9 Ma awara p'usadepema ne–inaa chok'ai bù õpeedepema chaa aba piudachida. Ichiaba barco p'usade wã nipadap'edaa, mãgà õpeedepema chaa aba jõdachida.
10 Ma omé eerepema angelpa ichi trompeta chaak'ãri, lucero choma t'ùpùtau ome urua nâbù pajãdeepa baaidachi na eujãdepema to mãik'aapa pania poátrù uchiapata ârù; ma õpeedepema chaa aba ârù. 11 Mãgà t'âjarapata Lucero Asia. Mãgà baaik'ãri, to mãik'aapa pania poátrù uchiapata õpeedepema chaa aba ârù, pania asia ûu beeji. Eperãarãpa ma pania todak'ãri, chok'ara piujida.
12 Ma õpee eerepema angelpa ichi trompeta chaak'ãri, ak'õrejîru, atane, lucero ãridachida. Perá ak'õrejîru k'îra esajîak'a k'îidachi. Perá atane k'îra esajîak'a auk'a k'îidachi. Ichiaba perá lucero esa–auk'ac k'îidachida. Mapa ãstaawa hora õpeedepema chaa aba ak'õrejîru jêra–e paji. Ichiaba p'ãrik'ua hora õpeedepema chaa aba atane lucero ome âdaada–e paji.
13 Mãpai mùa unuji nejâpù pajãde ùt'à wãabai ni. Ûriji ma nejâpùpa golpe pedeeru:
—¡Aai, eperãarã at'ãri eujãde p'anù audú chupùria jõnadait'eeda aji, apema angeleerã õpeerãpa ãchi trompeta chaadak'ãri!