Ciento cuarenta y cuatro mil israelitaarã<R>Tachi Ak'õrepa jùrùt'erada
7
1 Ma t'êepai mùa unuji angeleerã k'îmari; aba bainâ bù norte eere; aba sur eere; aba ak'õrejîru uchiapari eere; chi apema chi baaipari eere. Mãgùùrãpa madepema nãu t'ùdùk'a p'anajida p'uanaamerã eujã ârù, p'usa ârù wa pak'uru ârù. 2 Ichiaba unuji ángel awaraa ak'õrejîru uchiapari eereepa uchia cheru. Mãgùpa ne–inaa tauchaa bùpari iru baji ichi juade. Ma ne–inaapa tauchaa bùdak'ãri eperãarã ârù, jara k'inia bù ma eperãarã Tachi Ak'õre ichita chok'ai baparideerã. Mãgà ángel golpe pedeeji apema k'îmariirãmaa; mãgà jùrùt'eradaarãmaa eujã mãik'aapa p'usa ãripidamerã:3 —Waide ãripináatù eujã, p'usa mãik'aapa pak'uru, waide taipa tauchaa bùda–e perã Tachi Ak'õredeerã tau bùùrùde.
4 Mùa ûriji jaradak'ãri jõmasaa eperãarã ârù ma tauchaa bùdap'edaa. Israelitaarã ëreerãdepemaarã ciento cuarenta y cuatro mil paji.
5 #Judadeepa uchiadap'edaarãdepema doce mil paji;
#Rubendeepa uchiadap'edaarãdepema doce mil paji;
#Gaddeepa uchiadap'edaarãdepema doce mil paji;
6 #Aserdeepa uchiadap'edaarãdepema doce mil paji;
#Neftalideepa uchiadap'edaarãdepema doce mil paji;
#Manasedeepa uchiadap'edaarãdepema doce mil paji;
7 #Simeondeepa uchiadap'edaarãdepema doce mil paji;
#Levideepa uchiadap'edaarãdepema doce mil paji;
#Isacardeepa uchiadap'edaarãdepema doce mil paji;
8 #Zabulondeepa uchiadap'edaarãdepema doce mil paji;
#Josedeepa uchiadap'edaarãdepema doce mil paji
mãik'aapa #Benjamindeepa uchiadap'edaarãdepema doce mil paji.
Eperãarã chok'ara p'aru t'orroo jâ p'anadap'edaa
9 Ma t'êepai unuji eperãarã audú chok'ara nãgà chaadepema: eujã, ëreerã, p'uuru, pedee; mãgà chaadepema. Bainâ p'anajida ma rey su–ak'ù beepari k'îrapite mãik'aapa ma Oveja Chak'e k'îrapite. Apidaapa ãra p'oyaa juasiada–e, audú chok'ara p'anadap'edaa perã. P'aru t'orroo jâ p'anapachida mãik'aapa palma k'iru ateepachida ãchi juade ak'ùpidait'ee o–îa p'anù. 10 Jõmaarãpa golpe pedeejida:
—Tachi Ak'õre, ma rey su–ak'ù beeparide su–ak'ù bùpa mãik'aapa Oveja Chak'epa eperãarã o k'achiadeepa k'aripa atajida atuanaadamerã.
11 Angeleerã, chi wap'ùra atadap'edaa ma rey su–ak'ù beepari, ma chonaarã poro waibùarã mãik'aapa ma ne–inaa chok'ai bù k'îmari; mãgà angeleerã bedabaidachida tau bùùrù te jãde t'õbairutamaa ma rey su–ak'ù beepari k'îrapite mãik'aapa ùt'aa t'âpachida Tachi Ak'õremaa. 12 Mãgapachida:
—¡Amén! apachida. Jõmaarãpa ùt'aa t'âdaipia bù Tachi Ak'õremaa mãik'aapa jaradaipia bù: “Pù jõmaarã k'ãyaara waibùara bapari; jõmaarã k'ãyaara k'îsia k'awaara bapari; jõmaarã k'ãyaara t'ãri piara; jõmaarã k'ãyaara juataura; jõmaweda pù jua ek'ari p'anapata. Mãga ichita jaradait'ee, jõ–ee. ¡Amén!”
13 Mãpai ma chonaarã poro waibùarãdepema abaapa mùmaa iidiji:
—¿K'áirãma na p'aru t'orroo jâ p'anù? ¿Sãmãik'aapa chejidama? aji.
14 Mùa p'anauji:
—Pùata k'awa bùda aji, mù k'ãyaara.
Irua mãgaji:
—Ãchi jai–idaadak'ãri, uchiajida audú miapi iru p'anadap'edaarã juadeepa. P'aru t'orroo jâ p'anù, ãchi p'aru t'õdap'edaa perã ma Oveja Chak'e waade. Mãgapù ãchia p'ek'au k'achia oopatap'edaa wêpajida.
15 ‘Maperãpù Tachi Ak'õre su–ak'ù beepari k'îrapite bainâ p'anù.
Ãstaawa, p'ãrik'ua pida ãchia oopata Tachi Ak'õrepa oopi bùk'a ichi ùt'aripema tede.
Ma rey su–ak'ù beeparide su–ak'ù bùpa ãra ichita ak'ù bapariit'ee, ichita ãra ome bapariit'ee perã.
16 Waa jarra ooda–e pait'ee mãik'aapa waa opisiada–e pait'ee.
Ichiaba ak'õrejîrupa waa paada–e pait'ee mãik'aapa waa wãsiapa jùa cheda–e pait'ee.’ (Isaías 49.10)
17 Mãga pait'ee ma Oveja Chak'e, rey su–ak'ù beepari k'îrapite bainâ bùpa, ãra pia ak'ù bapariit'ee perã.a
Ãramaa ak'ùpiit'ee pania poátrù uchia bùmãi, mãgà pania todak'ãri, ichita p'anapataadamerã iru ome.b
Ma awara Tachi Ak'õre ãra ome bapariit'ee perã, waa t'ãri p'ua p'anadak'aa pait'ee.c