K'ãata jara k'inia bù ma tauchaada siete
6
1 T'êepai mùa unuji ma Oveja Chak'epa ogat'aaru chi naapùara tauchaada, ma tauchaada siete joip'aruk'a bùde k'ara bada. Mãga nùde ma ne–inaa chok'ai bù k'îmariidepema abaapa pa jîwaaparik'a pedeeji:—Chepáde aji.
2 Mùa ak'ùk'ãri, unuji caballo t'orroo. Aù ârù su–ak'ù badapa ichi juade ematrùma ateeji. Angelpa teeji chõo p'oyaapataarã poro jâra irumaa, wãmerã na p'ek'au eujãdee jura p'oyaade. Wãji.
3 Mãpai ma Oveja Chak'epa araarepema tauchaada ogat'aaji. Mãga ook'ãri, mùa ûriji awaraa ma ne–inaa chok'ai bù k'îmariidepemapa jararu:
—Chéji.
4 Ak'ùk'ãri, unuji caballo p'oree. Aù ârù su–ak'ù bùmaa Tachi Ak'õrepa espada choma teeji mãik'aapa mãgà juade bùji na p'ek'au eujãdepemaarã jõmaweda, mãgà k'aurepa waa eperãarã k'ãiwee p'ananaadamerã. Maperã eperãarãpa chîara pee para beeji.
5 Mãpai ma Oveja Chak'epa omé eerepema tauchaada ogat'aak'ãri, mùa ûriji awaraa ma ne–inaa chok'ai bù k'îmariidepemapa auk'a jararu:
—Chéji.
Ak'ùk'ãri, unuji caballo p'ãimaa. Aù ârù su–ak'ù bùpa net'aa chaapari iru baji ichi juade. 6 Mãpai nãgà pedee uchiaji ma ne–inaa chok'ai bù k'îmari t'ãideepa:
—Jarra óoji trigo kilo apai t'erabaidamerã ewari aba mimiada pari; maa–e pùrã cebada kilo õpeepai t'erabaidamerã ewari aba mimiada pari. Mamîda olivo mãik'aapa uva t'õbaináaji, aceite paraamerã mãik'aapa vino paraamerã.
7 Mãpai ma Oveja Chak'epa õpee eerepema tauchaada ogat'aak'ãri, mùa ûriji awaraa ma ne–inaa chok'ai bù k'îmariidepemapa jararu:
—Chéji.
8 Ak'ùk'ãri, unuji caballo k'uarak'uaraa bù. Aù ârù su–ak'ù bada Piuda apachida. Mãgà t'êe cheda Piudaarã P'anapatamãi apachida. Mãgùùrã juade Tachi Ak'õrepa na p'ek'au eujãdepemaarã k'îmariidepema chaa aba bùji, ma eperãarã piudamerã jura chõo jõnùpa, jarra oo jõnùpa, k'ayaapa mãik'aapa ne–animal k'achia beerãpa.
9 Mãpai ma Oveja Chak'epa k'îmari eerepema tauchaada ogat'aak'ãri, mùa unuji altar bainâ bù mãik'aapa aù ek'ari unuji jai–idaadap'edaarã jaureerã. Ijãadak'aa beerãpa ma eperãarã peejida, Cristode ijãapatap'edaa perã mãik'aapa iru ûraa jarateedap'edaa perã. 10 Mãùrãpa otau apai pùk'a bùde golpe pedeejida:
—Tachi Waibùa, pùa nejõmaata k'awapari. Pù k'achia wêe bapari mãik'aapa ichita oopari pùa jara bùk'a. ¿Sãapai ak'ùit'eema eujãdepemaarãpa oopata jarait'ee pia wa k'achia? ¿Sãapai tai peedap'edaarã miapiit'eema? ajida.
11 Mãgùùrã chaachaa Tachi Ak'õrepa p'aru teesoo t'orroo bù teeji. Mãpai jaraji ãchimaa taarãpai âidamerã mãik'aapa nùdamerã ãchi âpemaarã, chi Cristopa oopi bùk'a oopataarã Tachi Ak'õrepa awara bùda ma–it'ee, auk'a piudamerã k'achia beerã juapa.
12 Mãpai ma Oveja Chak'epa joisomaa eerepema tauchaada ogat'aak'ãri, unuji na p'ek'au eujã golpe wëre nâbù awêrachaipa. Ak'õrejîru k'îi pùk'adachi. P'ãi–maa baji p'aru cabra k'aradee oodak'a; mãgee p'aru jâpata chi–ùadak'ãri. Ma awara atane p'oreedachi tachi waak'a. 13 Lucero pajãdeepa jurruk'oodachida na eujãde, higojõ chik'aa jurrupatak'a higuera bùùrùdeepa nãumia p'uak'ãri. 14 Pajã pùrat'ùdaji joip'aru pùrat'ùpatak'a. Mãpai wêpadachi. Ma awara eera, isla ome ãyaa wãjida ma badamãiipa. 15 Mãga unudak'ãri, na p'ek'au eujãdepema reyrã, eperãarã poro waibùarã, soldaorã poro waibùarã, p'arat'ara beerã, juataura beerã, esclavoorã, esclavo–eerã; ma jõmaweda mirudachida mãu te uriade mãik'aapa eera jêra bù eujãde mãu–idaa bùmãi. 16 Mama p'anùde biajida eemaa mãik'aapa mãu–idaa bùmaa: