Juanpa pedee p'ãda mãik'aapa Oveja Chak'e unuda
5
1 Ma rey su–ak'ù beeparide su–ak'ù bù jua juaraare mùa unuji joip'aruk'a bù pùrat'ùda pedee p'ãda ome. P'ã baji taawaik'a eere, edajãde paara. Tauchaada siete tauchaa baji jùrrù torrabaidapa. 2 Ichiaba unuji angeleerã poro waibùa aba. Mãgà golpe pedee baji. Iidiji:—¿K'áipata nãga k'îsia bùma? “Mùchia jã tauchaada ogat'aai mãik'aapa ewai jãgà joip'aruk'a bù.”
3 Mamîda apidaapa ma joip'aruk'a bù ewada–e pai; ùt'aripemaarã apidaapa, na p'ek'au eujãdepemaarãpa pida mãik'aapa piudap'edaarã eujã ek'ari p'anùùrãpa pida. 4 Mãpai mù jêedachi apida wê–e pada perã ma joip'aruk'a bù ewadait'ee mãik'aapa ma pedee p'ãda leedait'ee. 5 Mamîda ma chonaarã poro waibùarã veinticuatrodepemapa mùmaa mãgaji:
—Jêenáaji. ¡Ak'àji! León apata Judadeepa uchiadap'edaarãdepema; chonaarãwedapema Rey Daviddeepa uchiadapa k'achia p'oyaaji. Iruata jã tauchaada siete ogat'aai mãik'aapa jã joip'aruk'a bù ewat'aai.
6 Ak'ùk'ãri, mùa unuji Oveja Chak'e apata eperãarãpa peedap'edaak'a. Ichi bainâ baji ma rey su–ak'ù beepari k'îrapite mãik'aapa ma ne–inaa chok'ai bù k'îmari k'îrapite, mãùrã ma chonaarã poro waibùarã veinticuatro esajîak'a. Ichia cacho siete iru baji. Ichiaba tau siete iru baji. Ma tau siete jara k'inia bù Tachi Ak'õre Jaure, jaure siete pùk'a pëida na p'ek'au eujã jõmaade. 7 Ma Oveja Chak'e wãji ma rey su–ak'ù beeparide su–ak'ù bù k'ait'a mãik'aapa mãgà jua juaraareepa ataji ma joip'aruk'a bù pùrat'ùda. 8 Mãga ook'ãri, ma ne–inaa chok'ai bùùrã k'îmariweda mãik'aapa ma chonaarã poro waibùarã veinticuatroweda bedabaidachida iru k'îrapite. Ma chonaa chaachaa iru baji arpa mãik'aapa p'arat'u nêedee ooda. Ma p'arat'u chaa ipuru baji ne–inaa #bajûbak'a t'ûa bùpa. Mãgà jara k'inia bù Cristodeerãpa ùt'aa t'âpata. 9 Mãga nùde ma bedabaidap'edaarã jõmaarãpa k'ari chiwidi k'arijida:
—‘Pùata ma joip'aruk'a bù atai mãik'aapa ma tauchaada ogat'aai, eperãarãpa pù peet'aadap'edaa perã.
Pùchi waa mãgá bat'ada k'aurepa, eperãarã uchiapiji p'ek'au k'achia jua ek'ariipa.
Mãgá Tachi Ak'õre–it'ee neto pùk'a ataji eperãarã k'îra t'ãdoo nãgee chaadepema: ëreerã, pedee, p'uuru, eujã, mãgee chaadepema.
10 Pùa ãra Tachi Ak'õre jua ek'ari bùji p'aareerãk'a irumaa ùt'aa t'âpataadamerã.
Ichiaba pùa ãra reyrãk'a papiit'ee na p'ek'au eujãdepemaarã ak'ùpataadamerã.’ (Éxodo 19.6)
11 Mãpai mùa unuji ma rey su–ak'ù beepari, ma ne–inaa chok'ai bù k'îmari mãik'aapa ma chonaarã poro waibùarã angeleerãpa wap'ùra ata p'anù. Audú cho–k'araa paraaji; tachia p'oyaa juasiada–e. 12 Mãùrãpa otau apai pùk'a bùde golpe pedeejida:
—Oveja Chak'e peedap'edaa; irumaapaita jaradaipia bù:
Jõmaweda pù jua ek'ari p'anapata, nejõmaata përé perã.
Pù k'îra wãreera bù; jõmaarã k'ãyaara k'îsia k'awaara bapari; jõmaarã k'ãyaara juataura bapari; jõmaarã k'ãyaara waibùara bù.
Mapa pùmaa ùt'aa t'âpata, awaraarãmaa ùt'aa t'âdai k'ãyaara.
13 Mãpai mùa ûriji jõma ne–inaa chok'ai p'anùùrã ùt'aripema, na p'ek'au eujãdepema, na p'ek'au eujã ek'aripema mãik'aapa p'usadepema; ne–inaa jõmaweda Tachi Ak'õrepa ooda. Mãùrãpa mãgajida:
—Rey su–ak'ù beeparide su–ak'ù bùmaa mãik'aapa Oveja Chak'emaa jõmaarãpa ichita ùt'aa t'âdaipia bù mãik'aapa ichita jaradaipia bù parã jõmaarã k'ãyaara waibùara bù, ne–inaa jõmaweda parã jua ek'ari bapari perã.
14 Mãga jaradak'ãri, ma ne–inaa chok'ai bù k'îmariirãpa p'anaujida:
—¡Amén!
Ma awara ma chonaarã poro waibùarã veinticuatro waya bedabaidachida ma su–ak'ù bù k'îrapite mãik'aapa Oveja Chak'e k'îrapite.