Tachi Ak'õrepa ùt'aripema ne–inaa Juanmaa unupida
4
1 Ma t'êepai awaraa k'ãimok'araa pùk'aji. Unuji puerta Tachi Ak'õre eujãde t'îupata ewa nâbù. Mãpai ûriji ma otau naaweda ûrida golpe pedeeru trompeta jîwaaparik'a. Mãgaji:—Chéji ùt'aa. Mùa ak'ùpiit'ee ne–inaa Tachi Ak'õrepa na ewari ooit'ee bù.
2 Aramata Tachi Ak'õre Jaurepa mù ateeji. Mama ùt'ari mùa unuji rey su–ak'ù beepari bainâ bù. Aù ârù Tachi Ak'õre su–ak'ù baji. 3 Iru k'îra wãree baji. Urua baji mãu pi–ia bëisãa jaspek'a mãik'aapa mãu pi–ia p'oree cornalinak'a. Chi su–ak'ù beepari t'ùak'au baji euma p'ùtrùa pùk'a bùpa; p'ãwaraa bù mãu pi–ia esmeraldak'a. 4 Ma su–ak'ù beepari wap'ùra baji awaraa su–ak'ù beepari veinticuatropa. Aù ârù su–ak'ù p'anajida chonaarã poro waibùarã veinticuatro. P'aru t'o–t'oo jâ p'anajida mãik'aapa poro jâra nêedee ooda jâ p'anajida. 5 Tachi Ak'õre su–ak'ù beeparideepa pa tau p'orep'orepari nâbaji mãik'aapa pa jîwaa nâbaji pedee ome. Ma su–ak'ù beepari k'îrapite lámpara siete urua p'anajida. Mãgà lámpara Tachi Ak'õre Jaure siete pùk'a bù. 6 Ichiaba ma su–ak'ù beepari k'îrapite mùa unuji ne–inaa lago bëi–sãak'a vidriodee oodak'a.
Ma su–ak'ù beepari k'ait'a; aù ik'aawa, ãpùte mãik'aapa k'îrapite bainâ p'anajida ne–inaa chok'ai bù k'îmari; aba ik'aawa chaa. Mãgùùrã k'îrapite mãik'aapa ek'arra eere tau–idaa baji. 7 Aba leónk'a baji; awaraa p'ak'a chak'ek'a; awaraa eperãk'a mãik'aapa chi apema nejâpù wãabai wãk'a baji. 8 Ma chaachaa paraaji isia k'ara seis. Ma isia k'ara ichiaba tau–idaa baji taawaik'a eere, edaik'a eere paara. Mãùrãpa ãstaawa, p'ãrik'ua pida Tachi Ak'õremaa âida–ee nãga k'aripata:
—‘P'ek'au wêe, p'ek'au wêe, p'ek'au wêe bapari Tachi Ak'õre Waibùa. Ichita bapachi; ichita bapari; ichita cheit'ee.’ (Isaías 6.2-3)
9 Mãùrãpa k'aridak'ãri, jarapata ma rey su–ak'ù beeparide su–ak'ù bù k'îra wãree. Ichiaba jarapata iru ichita bapari mãik'aapa jõmaarã k'ãyaara waibùara bù. Mãgá k'ari p'anùde ichiaba gracias jarapata irumaa. 10 Mãùrãpa mãga k'ariruta chaa, ma chonaarã poro waibùarã veinticuatro bedabaipata ma rey su–ak'ù beeparide su–ak'ù bù k'îrapite mãik'aapa ùt'aa t'âpata irumaa, iru ichita bapari perã. Mãga oo p'anùde ãchi poro jâra êradak'ãri, bùpata iru k'îrapite mãik'aapa jarapata:
11 —Tachi Ak'õre Waibùa, pùmaa aupaita jaradaipia bù: Pù jõmaarã k'ãyaara k'îra wãreera bù mãik'aapa jõmaarã k'ãyaara waibùara bù. Nejõmaata pù jua ek'ari nâbù, pùa nejõmaata ooda perã. Pùa k'inia bada perã, nejõmaata mãga ooji.