Cristopa jara pëida<R>Sardis p'uurudepema ijãapataarãmaa
3
1 Mãpai irua mãgaji:—Ârá nãgà pedee p'ã pïiji Tachi Ak'õrepa ichi ángel pëidamaa Sardis p'uurudepema ijãapataarã ak'ùmerã:
Nãga jara bù Tachi Ak'õre Jaure siete pùk'a iru bùpa; chi lucero siete iru bù ichi juade. Mùa k'awa bù parã Sardidepemaarãpa ne–inaa oopata. Eperãarãpa jarapata: “Jã ijãapataarã chok'ai p'anùda” apata, parãpa wãara mùde ijãapata jîak'aapa. Mamîda mãga–e. Piudap'edaaråk'apù p'anù, wãara ijãada–e p'anadairã. 2 ¡Mapa ûrítù! Parãpa mùde ijãapata jõi naaweda, jùrùpatáatù oodait'ee mùa oopi bùk'a. Mùa unu bù parãpa ne–inaa oopata pia–e bù Mùchi Waibùa k'îrapite. 3 K'îsíatù parãpa naaweda ûridap'edaade Tachi Ak'õrepa jara pëida jaratee chedak'ãri. Parãpa ma jarateedap'edaa ijãajida. Mapa ârá oopatáatù ma jaradak'a. Parãpa ne–inaa k'achia oopata oo amáatù. Mãga ooda–e pùrã, atu bùde nechùapari cheparik'a, mãga pùk'a mù cheit'ee. Parãpa k'awada–e ewari mù cheit'ee parã miapide.
4 Mamîda parã Sardidepema ijãapataarã jõmaweda nipadak'aa ijãadak'aa beerãk'a. Chok'ara–ee p'anù mîda, ûk'uru p'anadak'aa mãùrãk'a. Mapa parã ùt'ari mù ome nipapataadait'ee. P'aru t'o–t'oo jâ p'anadait'ee, pia p'anapata perã Tachi Ak'õre k'îrapite. 5 Wãara jõmaweda k'achia p'oyaapataarã p'aru t'o–t'oo jâpataadait'ee. Mùa mãùrã t'â wêpapik'aa pait'ee Tachi Ak'õre ome ichita ùt'ari p'anapataadait'eerã t'â p'ã jêra bù librodeepa. Ma k'ãyaara mùchideerã ait'ee mù Ak'õremaa mãik'aapa ichi angeleerãmaa. 6 K'ùùrù êesaa p'anátù ûridamerã Tachi Ak'õre Jaurepa jara bù ijãapataarãmaa, ãchi chip'epata chaa.
Cristopa jara pëida<R>Filadelfia p'uurudepema ijãapataarãmaa
7 Mãpai irua mãgaji:
—Ârá nãgà pedee p'ã pïiji Tachi Ak'õrepa ichi ángel pëidamaa Filadelfia p'uurudepema ijãapataarã ak'ùmerã:
Nãga jara bù p'ek'au k'achia wêe bù, chi wãara aupaita jaraparipa. Chonaarãwedapema Rey David jõmaarã poro waibùa badak'a, mù jõmaarã poro waibùa. Mùa aupaita llavek'a iru bù eperãarã wãpiit'ee Ak'õre truadee. Mù awara apidaapa wãpida–e pai mãik'aapa apidaapa jarada–e pai wãnaadamerã. 8 Mùa k'awa bù parã Filadelfiadepemaarãpa oopata. K'awa bù awaraarã k'îrapite parã mak'ùara waibùa–ee p'anù mîda, p'anapata mùa jarateedak'a mãik'aapa choopata mùde ijãa p'anùde, mù merada–ee. Mãga p'anapata perã parã k'îrapite mùa o ooji, aùde wãdamerã. Mùata ma o ooda perã, apidaapa jarada–e pai parã aùde wãnaadamerã.
9 ¡Ûrítù mùa ooit'ee Satanadeerãmaa! Mãùrãpa: #“tai wãara judiorãda apata; Tachi Ak'õredeerã”. Mamîda seewamaa p'anù. Mùa mãùrã bedabaipiit'ee parã k'îrapite. Mãga ooit'ee ãchia k'awaadamerã mùa parã k'inia p'e iru bapari. 10 Parãpa oojida mùa jaradak'a. Choopata mùde ijãa p'anùde, ma k'aurepa nepùrade baaijida mîda. Maperãpù mùa parã k'aripait'ee Tachi Ak'õrepa na p'ek'au eujãdepema ijãadak'aa beerã miapik'ãri ichia ewari awara bùdade ma–it'ee. Ma ewate ichia ak'ùpiit'ee chisãgùùrã wãara ichide ijãapata mãik'aapa chisãgùùrã ijãadak'aa.
11 Taarã–e mù cheit'ee. Chóotù mùde ijãa p'anùde. K'îrak'aupai apidaapa atuapidai ùt'aripema poro jâraa Tachi Ak'õrepa parãmaa teeit'ee bù, ichita mù ome chok'ai p'anapataadamerã. Mãgá atuapidai mùde ijãa amaapiruta pùrã parãmaa. 12 K'achia p'oyaapataarã mùa te bùùrù mãudee oodak'a papiit'ee mù Ak'õre tede. Ichita p'anapataadait'ee jãma mù Ak'õre ome. Mùa mù Ak'õre t'â p'ãit'ee ma p'oyaapataarã ârù, jõmaarãpa k'awaadamerã mù Ak'õre ãchi chipari. Ma awara mùa p'ãit'ee mù Ak'õre p'uuru t'â, Jerusalén chiwidi, ãchi ârù, jõmaarãpa k'awaadamerã ãchi ma p'uurudepemaarã. Mãgà p'uuru Ak'õrepa pëiit'ee ùt'ariipa. Ma awara ãchi ârù mùa p'ãit'ee mùchi t'â chiwidi, jõmaarãpa k'awaadamerã ãchi mùchideerã. 13 K'ùùrù êesaa p'anátù ûridamerã Tachi Ak'õre Jaurepa jara bù ijãapataarã jõmaarãmaa.
Cristopa jara pëida<R>Laodicea p'uurudepema ijãapataarãmaa
14 Mãpai irua mãgaji:
—Ârá nãgà pedee p'ã pïiji Tachi Ak'õrepa ichi ángel pëidamaa Laodicea p'uurudepema ijãapataarã ak'ùmerã:
Chi nãga jara bù Amén apata. Irua ichita oopari ichia jara bùk'a mãik'aapa Tachi Ak'õre wãarata jara pëida jarapari. Iru k'ap'ùa pari Tachi Ak'õrepa ne–inaa jõma ooji. 15 Mùa k'awa bù parã Laodiceadepemaarãpa oopata. K'awa bù parã k'ûrasaa pùk'a p'anù–e ijãada–e p'anùùrãk'a. Mamîda ichiaba wãsia pùk'a p'anù–e wãara ijãapataarãk'a. Taawa parã k'ûrasaa pùk'a p'anapataadai maa–e pùrã wãsia pùk'a p'anapataadai. 16 Mamîda mãga p'anù–e. Ma k'ãyaara parã jâùrùa pùk'a p'anù; ijãa–ijãa pùk'a p'anù. Mapa mù choo–e parã ome. Parã yiaraa iru bait'ee. 17 Mùa parã choo–e pãchia mãgapata perã: “mùchi juadoopa nejõmaata iru bù. Mapa maarepida falta–eda” apata. Mãga jaradak'ãri, pariatua pedeepata. P'arat'ara p'anù mîda, Tachi Ak'õre–it'ee parã wãara chupùria chitoonù; tau p'ãriu pùk'a p'anù, mãik'aapa ãk'adaa pùk'a p'anù. 18 Mãga p'anadairã mùa ûraait'ee mùmaata neto atadamerã ne–inaa nêe ewaa atadak'a t'ùpùtaudeepa. Ichiaba mùmaa neto atátù p'aru t'orroo jâdait'ee mùa jâparik'a. Mãgá waa k'îra nejasia p'anada–e, parã ãk'adaa pùk'a p'anadairã. Ma awara mùmaa neto atátù neera pãchi tau–it'ee. Mãgá Tachi Ak'õre wãarata pia unudai.
19 Mùa ùtrùapari mãik'aapa miapipari mùa k'inia iru bùùrã jõmaweda. Maperã k'îra jîp'a ijãapatáatù. Pãchi audua pedee pedee amáatù mãik'aapa óotù mùa oopi bùk'a. 20 ¡Ûrítù! Eperã puerta t'aide t'âjaramaa bainâ beeparik'a, mãga pùk'a mùa parã t'âjaramaa bù. Chi mù pedee ûrik'ãri, ichi puerta ewaru pùrã, mù t'îuit'ee iru tede mãik'aapa t'ãri a–ba p'anadait'ee.