Cristopa jara pëida<R>Éfeso p'uurudepema ijãapataarãmaa
2
1 Mãpai irua mùmaa mãgaji:—Nãgà pedee p'ã pïiji Tachi Ak'õrepa ichi ángel pëidamaaa Éfeso p'uurudepema ijãapataarã ak'ùmerã:
Nãga jara bù ma lucero siete iru bùpa ichi juaraare, bù misa ma lámpara bùpata siete nêedee ooda ome. 2 Mùa k'awa bù parã Efesodepemaarã p'anapata. Pia mimiapata seewa–idaa beerã t'îunaadamerã pãchi t'ãide mãik'aapa pia choopata mùde ijãa p'anùde. K'awa bù parãpa chooda–e, t'ãri k'achia–idaa beerã t'îu k'inia p'anadak'ãri pãchi t'ãide. Mãùrãpa seewata: #“taita Cristopa pëidada” adak'ãri, parãpa ak'ùpachida ãchia jarateepata, k'awaa atarutamaa ãchi seewa–idaa bee. 3 Maapai parãpa choopachida, mãùrãpa nepùra jùrùpachida mîda parã ome. Sê–ee mãgá choopachida, nepùrade baaijida mîda mùde ijãa p'anù k'aurepa.
4 Mãgá choopachida mîda, mùa pia ak'ù–e nãgà ne–inaa parãpa oopata. Mù mãik'aapa pãchi k'õp'ãyoorã k'inia iru p'anada–e naawedapemak'a. 5 K'irãpátù sãga p'anapachida ewaa mùde ijãadak'ãri. Parãpa ne–inaa k'achia oopata oo amáatù mãik'aapa t'ãripa jõma oopatáatù naawedapemak'a, mù k'inia iru p'anadairã mãik'aapa pãchi k'õp'ãyoorã k'inia iru p'anadairã. Mãga ooda–e pùrã, mùa pãchi lámpara bùpata ãyaa atait'ee. Mãgá mù waa parã ome ba–e pait'ee. 6 Mùa mãga jara bù mîda, parãpa nãgà ne–inaa pia oopata. Mùk'a parãpa auk'a unuamaa iru p'anapata Nicolaítaarãpa k'achia oopata. 7 K'ùùrù êesaa p'anátù ûridamerã Tachi Ak'õre Jaurepa jara bù ijãapataarãmaa, ãchi chip'epata chaa. K'achia p'oyaapataarãmaa mùa k'opiit'ee eperãarã chok'ai p'anapipari pak'urudepema; mãgà pak'uru Tachi Ak'õre eujãde bù.
Cristopa jara pëida Esmirna p'uurudepema ijãapataarãmaa
8 Mãpai irua mãgaji:
—Ârá nãgà pedee p'ã pïiji Tachi Ak'õrepa ichi ángel pëidamaa Esmirna p'uurudepema ijãapataarã ak'ùmerã:
Nãga jara bù nejõmaata naa, nejõmaata t'êe; chi jai–idaap'eda chok'ai p'irabaidapa. 9 Mùa k'awa bù parã Esmirnadepemaarã nepùrade p'anapata eperãarãpa parã jùrùpata perã miapidait'ee. Unu bù parã chupùria jõnapata, wãara chupùria–ee p'anù mîda, ùt'ari iru p'anadairã jõmaweda Tachi Ak'õrepa k'îsia iru bù parã–it'ee. K'awa bù pedee k'achia judiorã apataarãpa jara jõnù parã ãpùte. Mãùrã Tachi Ak'õre Ûraa jarateepata tede chip'epata mîda, wãara Tachi Ak'õredeerã–e, mùchideerã jùrùpata perã. Tachi Ak'õredeerãk'a p'anapataadai k'ãyaara, Satanadeeråk'apù p'anapata. 10 Waaweenáatù mãgeerãpa parãmaa ooruta. ¡Ûrítù! Mãgeerã k'ap'ùa pari Satanapa parã ûk'uru *carcelde t'ùpiit'ee, mùde ijãa amaadai jîak'aapa ma k'aurepa. Ewari diez mama p'anadait'ee. Mamîda chóotù mùde ijãa p'anùde, mama parã peeruta pùjida. Mãgá chooruta pùrã, mùa ùt'aripema poro jâra teeit'ee parãmaa, ichita p'anapataadamerã mù ome mùchi truade.
11 K'ùùrù êesaa p'anátù ûridamerã Tachi Ak'õre Jaurepa jara bù ijãapataarãmaa, ãchi chip'epata chaa. K'achia p'oyaapataarã piuda aba#pai? piudait'ee. Atuada–e pait'ee Cristode ijãadak'aa beerãk'a.
Cristopa jara pëida<R>Pérgamo p'uurudepema ijãapataarãmaa
12 Mãpai irua mãgaji:
—Ârá nãgà pedee p'ã pïiji Tachi Ak'õrepa ichi ángel pëidamaa Pérgamo p'uurudepema ijãapataarã ak'ùmerã:
Nãga jara bù espada choma k'îraichaaweda p'ewedee iru bùpa. 13 Mùa k'awa bù parã Pergamodepemaarã p'anapatamãi. Satanás rey su–ak'ù beeparík'apù bù, jãpemaarã chok'ara ichi jua ek'ari p'anapata perã. Mamîda parãmaa ik'achia #“Cristodeerãda” adak'ãri, mù merada–e paji. Ma awara parã choopachida mùde ijãa p'anùde, parã k'õp'ãyo Antipas peejida mîda mùa ooda jarateeda perã. Parã mãgá choojida, iru peejida mîda pãchi t'ãide, Satanás baparimãi.
14 Parã mãgá choopachida mîda, mùa pia ak'ù–e nãgà ne–inaa parãpa oopata. Pãchi t'ãide ûk'uruurãpa jarateepata Balanpa chonaarãweda jarateedak'a. Mãgùpa Balacmaa jaraji sãga k'ûrai israelitaarã, ãrapa k'odamerã nechiara ata bùdap'edaa ne–inaa juapa ooda k'îrapite, aù k'îrapite eperãarãpa ùt'aa t'âpata. Ichiaba k'ûraji ãrapa k'achia oodamerã awaraarã ome. Israelitaarãpa ma ne–inaa omé oodak'ãri, Tachi Ak'õrepa ãra pia ak'ù–e paji. 15 Ma jîak'a pãchi t'ãide ichiaba ûk'uruurãpa jarateepata Nicolaítaarãpa jarateepatak'a. 16 ¡Ma k'achia choonáatù pãchi t'ãide! Mãùrãpa jarateepata choodai k'ãyaara, ma jarateepata k'îra unuamaa iru p'anapatáatù, mùa k'îra unuamaa iru baparik'a. Maa–e pùrã mùa mãùrã miapiit'ee mù it'aideepa uchia bù espada choma bùpa; mãgà mù pedee.
17 K'ùùrù êesaa p'anátù ûridamerã Tachi Ak'õre Jaurepa jara bù ijãapataarãmaa, ãchi chip'epata chaa. K'achia p'oyaapataarãmaa mùa k'opiit'ee ùt'aripema chik'o merã iru bù maná apata. Ma awara parã chaachaa mùa teeit'ee mãu t'orroo; t'â chiwidi aùde p'ãda ome. Ma mãu jitarupapai parãpa k'awaait'ee ichi t'â aùde p'ã bù.
Cristopa jara pëida<R>Tiatira p'uurudepema ijãapataarãmaa
18 Mãpai irua mãgaji:
—Ârá nãgà pedee p'ã pïiji Tachi Ak'õrepa ichi ángel pëidamaa Tiatira p'uurudepema ijãapataarã ak'ùmerã:
Nãga jara bù Tachi Ak'õre Warrapa; chi tau urua nâbù t'ùpùtauk'a mãik'aapa bùùrù urua bù bronce ùrradak'ãri uruaparik'a. 19 Mùa k'awa bù parã Tiatiradepemaarãpa oopata mùde ijãapata perã. Chik'inia p'anapata mãik'aapa choopata mùde ijãa p'anùde. Mapa awaraarã k'aripapata mãik'aapa choopata, nepùrade baairuta pùjida. Audupùara mãga oomaa p'anù naawedapema k'ãyaara, mùde ewaa ijãa p'aneedak'ãri.
20 Ârá mãga oomaa p'anù mîda, mùa pia ak'ù–e nãgà ne–inaa parãpa oopata. Ichiak'au bùpata jã chonaarãwedapema wêra Jezabel jîak'aa, ichia ne–inaa k'achia jarateemerã pãchi t'ãide. Ichi Tachi Ak'õre pedee jaraparida apari. Mamîda mãga–e. K'ûrayaa bapari. Ichia jarateepari pia bù mùchideerãpa p'ek'au oodamerã mãik'aapa pia bù ãrapa k'odamerã nechiara ata bùdap'edaa ne–inaa juapa ooda k'îrapite, aù k'îrapite eperãarãpa ùt'aa t'âpata. 21 Mùa jaraji ma k'achia oopata oo amaamerã. Mamîda mãga oo k'inia–e. 22 Mapa mùa ichi k'ayaapiit'ee; ichi ome k'achia oo p'anùùrã paara. Mãùrã auk'a miapiit'ee, oo amaada–e pùrã ma k'achia ichia oopida. 23 Ma awara mùa peeit'ee ichia jaratee bùde ijãapataarã, ichi warrarãk'a p'anadairã. Mãgapù mùde ijãapataarã jõmaarãpa k'awaadait'ee mùa nejõmaata k'awa bù; eperãpa t'ãridepai k'îsia bù mãik'aapa t'ãripa oo k'inia bù paara. Mùata ak'ùit'ee pãchia oopata mãik'aapa ne–inaa teeit'ee eperã chaachaa irua ne–inaa oopariida pari na p'ek'au eujãde bù misa; ne–inaa pia irua pia oopariida pari maa–e pùrã ne–inaa k'achia irua k'achia oopariida pari.
24 Ârá mùa nãga jara bù parã apemaarãmaa Tiatira p'uurude p'anù. Parãpa pia oo p'anù k'awa k'iniadak'aa perã ma wêrapa jaratee bù. Jùrùdak'aa Satanás net'aa k'awaadait'ee; jãgee net'aa eperãarãpa k'awadaik'araa bù. Parã ma k'achiade t'îu k'iniadak'aa perã, mùa ne–inaa awaraa iidi–e pait'ee parãpa oodamerã. 25 Jîp'a k'inia bù parã choodamerã mùde ijãa p'anùde mãik'aapa ne–inaa pia oo p'anùde, mù waya cheru misa.
26 Parãdepema k'achia p'oyaapataarã pia ak'ùit'ee mùa oopi bùk'a oo p'anadak'ãri parã jai–idaarutamaa. Parã bùit'ee eperãarã p'uuru ak'ùpataadamerã, reypa ooparik'a.
27 Mù Ak'õrepa eperãarã bùdak'a mù jua ek'ari, mãgá mùa eperãarã bùit'ee parã jua ek'ari. Parãpa ma p'uuru pidaarã pãchi jua ek'ari iru p'anadait'ee mãik'aapa chupùria k'awaada–ee mù k'îra unuamaa iru p'anapataarã jõt'aadait'ee. Reypa tuma hierrodee juade iru bùpa ooparik'a, mãga pùk'a parãpa oodait'ee.
‘Mãùrã ome oodait'ee eperãpa chok'o pak'urupa wùk'ãri ooparik'a.’ (Salmos 2.9)