APOCALIPSIS
Tachi Ak'õrepa k'awapida San Juanmaa
Jesucristopa k'awapida
1
1 Na p'ãdade mù, Juanpa jara bù Tachi Ak'õrepa ne–inaa k'awapida Jesucristomaa. K'awapiji ichia na ewari ooit'ee bù, Jesucristopa jõdee ichideerãmaa mãga k'awapimerã. Ùt'ariipa Cristopa pëiji ichi ángel mùmaa, mù iru mimiapari perã. 2 Na p'ãdade mùa jara bù Tachi Ak'õrepa mùmaa unupida, ichia mùmaa jara pëida mãik'aapa Jesucristopa mùmaa jarada.3 Tachi Ak'õrepa pia ak'ùit'ee na p'ãda leerupa awaraarã taide, ichia jara pëida perã. Ichiaba pia ak'ùit'ee na p'ãdade jara bù ûridap'eda, oo p'anùùpa aùde ûraa bùk'a, ma jõma ooit'ee taarã–e perã.
Juanpa Ásia eujãdepema ijãapataarãmaa jarada
4 Mù, Juanpa nãga p'ã pëiru parã Ásia eujãdepema ijãapataarãmaa, siete chip'epataarã chaachaa.
Mùa ùt'aa iidi bù Tachi Ak'õrepa parã pia ak'ù bapariimerã. Mãgá k'ãiwee p'anapataadait'ee. Tachi Ak'õre ichita bapari; ichita bapachi mãik'aapa ichita cheit'ee. Mùa ichiaba iidi bù Tachi Ak'õre Jaurepa parã k'aripamerã. Iru jaure siete pùk'a bù Tachi Ak'õre su–ak'ù beepari k'îrapite.
5 Ichiaba mùa iidi bù Jesucristopa parã k'aripamerã. Iruata wãara jarapari Tachi Ak'õrepa jara bù. Iruta piup'eda, naapùara chok'ai p'irabaiji ichita bapariit'ee. Na p'ek'au eujãdepema reyrã jõmaweda p'anapata iru jua ek'ari. Iruata tachi k'inia iru bapari. Mapa tachi uchiapiji tachia p'ek'au k'achia oopata jua ek'ariipa. Mãga ooji iru waa bat'ada k'aurepa kurusode piuk'ãri tachi pari.
6 Iruata tachi ichideerã papiji ichi Ak'õremaa p'aareerãk'a ùt'aa t'âpataadamerã eperãarã pari. Mapa jaradáma: “Jesucristo ichita jõmaarã k'ãyaara waibùara bapariit'ee.” ¡Amén!
7 ‘¡Ûrítù! Iru cheit'ee jâararade. Maapai jõmaarãpa iru unudait'ee; iru supidap'edaarã paara. Na p'ek'au eujãdepema to bee chaa eperãarã jarajêedait'ee waaweepa, irua ãchi miapiit'ee jîak'aapa ãchia p'ek'au k'achia oopata k'aurepa. Mãga pait'ee. Amén.’ (Daniel 7.13)
8 Tachi Ak'õre Waibùapa jara bù:
—Mùta Alfa; nejõmaata naa. Ichiaba mùta Omega; nejõmaata t'êe. Mùta jõmaarã Waibùa. Mù ichita bapari; ichita bapachi mãik'aapa ichita cheit'ee.
Juanpa Jesucristo unuda k'ãimok'araa pùk'a bùde
9 Mù, Juan, parã âpema Cristo k'aurepa, parãk'a mù t'ãri a–ba bapari perã iru ome. Mù ichiaba parã k'õp'ãyo, tachi auk'a wãdait'ee perã Ak'õre truadee mãik'aapa âraweda tachi auk'a choopata perã Jesude ijãa p'anùde, tachi jùrù p'anù mîda miapidait'ee ma k'aurepa. Mù Patmos islade pëijida Tachi Ak'õre Ûraa jarateepachi perã mãik'aapa Jesupa ooda jarateepachi perã. 10 Mama bùde tomia ewate ùt'aa t'âmaa baji Tachi Ak'õre Jaurepa oopi bùk'a. Mãga nùde k'ãimok'araa pùk'adachi. Mù ãpùteik'a eereepa ûriji eperã golpe pedeeru, trompeta golpe jîwaaparik'a. 11 Mãgaji:
—P'åji pùa unuru maap'eda pïiji ijãapataarã chip'epata bee chaa nãgà siete p'uurude: Éfeso, Esmirna, Pérgamo, Tiatira, Sardis, Filadelfia, Laodicea p'uurudee auk'a.
12 Mãga ûrik'ãri, p'ùrrabaiji ak'ùit'ee k'áipata mùmaa mãga jara bù. Unuji lámpara bùpata siete, awara–awaraa bainâ bù. Mãgà chaachaa nêedee ooda paji. 13 Mãgà esajîak'a unuji eperãk'a. P'aru teesoo jâ baji. K'ùrrùde ne–inaa nêedee ooda jâ baji. Nêrabai baji ichi t'ûade. 14 Ichi puda t'o–t'oo baji, oveja k'arak'a maa–e pùrã nievek'a. Chi tau urua nâbaji t'ùpùtauk'a. 15 Chi bùùrù jida urua baji, bronce ùrradak'ãri uruaparik'a. Chi otau ûriji to k'ida chaaree jîwaaparik'a. 16 Ichi jua juaraare lucero siete iru baji. Chi it'aideepa uchiaji espada choma, k'îraichaaweda p'ewedee bù. Chi k'îra urua nâbaji ak'õrejîru imat'ùpa urua nâbaparik'a.
17 Mùa iru unuk'ãri, eujãde baainaji iru k'îrapite mãik'aapa piudak'a baibeeji. Mãpai irua mù t'õbaiji ichi juarapa mãik'aapa mùmaa mãgaji:
—P'eranáaji. Mù nejõmaata naa mãik'aapa nejõmaata t'êe. 18 Mùata eperãarã chok'ai p'anapipari. Na p'ek'au eujãde bùde mù jai–idaaji. Mamîda chok'ai p'irabaiji, maadak'ãriipa ichita bapariit'ee. Mùa llavek'a iru bù piudap'edaarãmãi ewait'ee. Madeepa eperãarã uchiapii mãik'aapa ãra k'aripai ichiaba chok'ai p'irabaidamerã ichita p'anapataadait'ee mù ome. Maa–e pùrã, k'inia–e pùrã, ãra mãgá uchiapi–e pait'ee. 19 Maperã p'åji pùa unuru, ârá ne–inaa wãyaa nâbù mãik'aapa ne–inaa t'êepai wãyaait'ee bù. 20 Pùa unu bù ne–inaa Tachi Ak'õrepa waide unupi–e pada apidaamaa: na lucero siete mù jua juaraare mãik'aapa jã lámpara bùpata siete nêedee ooda. Na lucero siete jara k'inia bù angeleerã siete bùda ijãapataarã chip'epata siete aba–abaa ak'ùdamerã. Jõdee jã lámpara bùpata siete jara k'inia bù ma ijãapataarã chip'epatamãi siete.