APOCALIPSIS
Tachi Ak'õrepa k'awapida San Juanmaa
San Juan, Jesucristopa jùrùt'eradapa na libro Apocalipsis apata p'ãji. Apocalipsis jara k'inia bù Tachi Ak'õrepa k'awapida. Juanpa na pedee p'ãji Cristode ijãapataarã ûraait'ee, Cesarpa ãra miapi iru bada perã ichi jua ek'ari. Na p'ãdade Juanpa jara bù Tachi Ak'õrepa unupida ichimaa k'ãimok'araa pùk'a bùde, Patmos islade bak'ãri. Made Ak'õrepa unupiji ichia ooit'ee bù netuara eere p'anùùrã p'oyaait'ee.
Naapùara Juanpa jara bù Jesucristopa na pedee k'awapida ichi ángel k'ap'ùa pari (cap. 1.1-3). Ijãapataarãmaa saludaap'eda, jara bù ichia Jesucristo unuda mãik'aapa ichia Cristopa jara pëida p'ã bù Ásia eujãdepema Cristode ijãapataarã chip'epata siete p'anùùrãmaa (caps. 1.4--3.22). Jara bù ichia Tachi Ak'õre rey su–ak'ù beepari unuda (cap. 4); joip'aruk'a bù pùrat'ùda unuda mãik'aapa Oveja Chak'e unuda (cap. 5). Jara bù ma joip'aruk'a bù k'arada siete unuda mãik'aapa ichia unuda ma Oveja Chak'epa ma k'arada chaa ogat'aak'ãri (caps. 6.1--8.1). Jara bù ichia unuda angeleerãpa trompeta seis chaadak'ãri, Tachi Ak'õrepa ne–inaa k'achia oopii naaweda na p'ek'au eujãdepemaarãmaa (caps. 8.2--9.21); ichia ángel unuda joip'aruk'a k'aipee bù ome (cap. 10) mãik'aapa ichia unuda Ak'õre pedee jarapataarã omé ùt'ariipa chedak'ãri na p'ek'au eujãdee mãik'aapa ma seis eerepema trompeta chaak'ãri (cap. 11). Jara bù wêra je choma bù ome pajãde unuda (cap. 12); nemîsia ne–animal k'achia ome unuda (cap. 13); Oveja Chak'e unuda ciento cuarenta y cuatro mil judiorã ome (cap. 14.1-5); angeleerã unuda ãrapa na p'ek'au eujãdepemaarã k'achia oodak'ãri (cap. 14.6-20); k'ari ûrida mãik'aapa angeleerã siete unuda (cap. 15). Unuji awaraa ne–inaa siete p'asadap'edaa na p'ek'au eujãdepemaarãmaa, angeleerãpa p'arat'u weedak'ãri mãùrã ârù (cap. 16). Jara bù Babilonia p'uuru unuda (cap. 17) mãik'aapa Tachi Ak'õrepa ma p'uuru jõpida (caps. 18.1--19.5). Jara bù Oveja Chak'e miak'ãida fiesta unuda mãik'aapa sãga pait'ee Cristo waya chek'ãri (cap. 19.6-21). Jara bù Tachi Ak'õrepa Netuara Poro Waibùa p'oyaada (cap. 20.1-10) mãik'aapa sãga jõmaweda eperãarã panadait'ee Tachi Ak'õre su–ak'ù beepari t'orroo bù k'îrapite (cap. 20.11-15). Ichiaba jara bù sãga pait'ee Tachi Ak'õrepa ooit'ee bù eujã chiwidi mãik'aapa Jerusalén p'uuru chiwidi (caps. 21.1--22.5). T'êepai jara bù na p'ãda leerutaarãpa oopataadamerã na ûraade jara bùk'a mãik'aapa ichita Cristode ijãapataadamerã (cap. 22.6-21).