SAN JUDAS
San Judapa K'art'a P'ãda
Salude pëida
1
1 Mù, Judas, Santiago âpema, mimiapari Jesucristo–it'ee. Na k'art'a p'ãru Tachi Ak'õrepa jùrùt'eradaarãmaa. Irua parã k'inia iru bapari. Ma awara, Jesucristopa parã ak'ù bapari atuanaadamerã ichi waya cheru misa.2 Mùa ùt'aa iidi bù Tachi Ak'õrepa parã audú chupùria k'awaamerã, k'ãiwee p'anapimerã mãik'aapa k'inia iru bamerã.
Sãap'eda na k'art'a p'ãda
3 Âpemaarã k'iniarã, mùa t'ãripa p'ãit'ee paji jarait'ee sãga Cristopa tachi ijãapataarã jõmaweda o k'achiadeepa k'aripa ataji atuanaadamerã. Mamîda, ma k'ãyaara, p'ãru ûraait'ee parãpa ijãa amaadamerã awaraarãpa seewa jarateepata mãik'aapa t'ãripa Cristopa k'inia bùk'a ijãadamerã, tai naapema ijãapataarãpa naaweda jarateedap'edaak'a. 4 Mãga jara bù ijãadak'aa beerã merã t'îudap'edaa perã parã t'ãide Tachi Ak'õrede ijãapataarãk'a. Tachi Ak'õrepa p'ek'au k'achia wêpapipari perã, pia bùda a p'anù oodait'ee ne–inaa jõma tachi p'ek'au k'achia ooyaa bù k'ap'ùapa oopi bùk'a. ¡Mamîda mãga–e! Ichiaba merapata Jesucristo Tachi Waibùa, tachi ijãapataarã chipari. Tachi Ak'õre Ûraa chonaarãweda p'ãdade jara bù mãgeerã jõdait'ee iru juapa.
Tachi Ak'õrepa ooda<R>naawedapema ijãadak'aa beerã ome
5 Parãpa nãgà k'awa p'anù mîda, mùa k'irãpapiit'ee. Tachi Waibùapa israelitaarã jõmaweda Egipto eujãdeepa uchiapiji. Mamîda t'êepai ijãa amaa p'anadap'edaarã jõmaweda ichi juapa jõpiji. 6 Ma awara aù naaweda angeleerã ûk'uru uchiajida Ak'õre jua ek'ariipa, ãchi awaraa angeleerã poro waibùarã p'anajida mîda. Irua ãchi p'anapatap'edaamãiipa p'ãriudee pëiji. Mama at'ãri cadenapa jâa iru bù, ichi ewari waibùa ewate nùmaa. Mãgà ewate irua jõmaarã k'îrapite ãchia k'achia oodap'edaa jarait'ee.a 7 Awaraarã ichiaba ma angeleerã k'achia beerãk'a. Sodoma pidaarã mãik'aapa Gomorra pidaarã awaraa p'uuru k'ait'a p'anadap'edaarã ome ãchi k'ap'ùapa p'ek'au k'achia oopachida; ne–inaa eperãarã jîp'aarãpa yiaraa iru p'anapata. Maperãpù Tachi Ak'õrepa ma p'uurudepemaarã jõpiji t'ùpùtaupa. Mãgá apemaarãmaa ak'ùpiji sãga t'ãri k'achia–idaa beerã jõpit'aait'ee t'ùpùtau k'îik'aa bùpa.
Ne–inaa Tachi Ak'õrepa ooit'ee<R>ichi ewari waibùa ewate
8 Mãgà ijãadak'aa beerã parã t'ãide p'anùùrãpa auk'a oopata. Tachi Ak'õrepa ma k'achia beerãmaa mãga ooji mîda, ârapema seewa jarateepataarãpa mãùrã jîak'a ãchia oo k'iniata oopata. K'ãimok'araa pùk'apata perã, ãchia oopata ãchi p'ek'au k'achia ooyaa bù k'ap'ùapa oopi bùk'a. Ma awara merapata Tachi Waibùa ãchi chipari mãik'aapa angeleerã ãpùte pedee k'achia jarapata. 9 Jõdee Miguel, angeleerã poro waibùa mîda, ak'ùpiji ichi Tachi Ak'õre jua ek'ari bapari. Ik'achia pedee–e paji Satanamaa aupedeedak'ãri Moisés k'ap'ùa piuda pari; k'aipa atait'ee. Mãgaji:
‘Tachi Ak'õrépata pù ùtrùait'ee.’(Sofonías 3.2)
10 Mamîda mãgà seewa jarateepataarãpa mãga ooda–e. Ne–inaa Tachi Ak'õrede pia k'awada–e pak'ãri, oo iru p'anapata pedee k'achiapa. Ne–animalaarãk'a ãchi k'ap'ùapa oopi bùk'a oopata, k'îsiadak'aa perã Tachi Ak'õrepa k'îsiapiparik'a. Mapa mia jõnùpa ãchi itu jõk'oodait'ee p'ek'au k'achia ooyaa k'aurepa.
11 ¡Aai, Tachi Ak'õrepa ãchi k'achiadee pëiit'eepù! P'ek'au k'achiade nipapata Cainpa oodak'a.b Ichiaba oopata Balanpa oodak'a. P'arat'a jita k'iniapa ichia Tachi Ak'õre eere p'anadap'edaarã p'ek'au k'achiade baaipiji.c Ma awara ãchi poroorã ome chõo jùrù p'anù, Corepa oodak'a ichi eere p'anadap'edaarã ome.d Maperãpù Tachi Ak'õrepa ãchi ichiaba k'enak'ooit'ee iru k'îrapite panadak'ãri.
12 Parã chip'edaidak'ãri ne–inaa jedek'odait'ee, k'îra nejasiadaipata mãgà seewa jarateepataarã k'aurepa. Mamîda ãchi k'îra nejasia wêe, waibùa k'opata mãik'aapa waibùa topata, ãchita poro waibùarãk'a Tachi Ak'õre k'îrapite. Mãgá oodak'ãri, chupùria chitoonùùrã ak'ùdak'aa. Jõmaweda ãchi–it'ee aupai oopata. Jâarara pania wêe bàk'apù p'anù, nãupa ateepari eujã p'ûasaadee. Ichiaba nejõ bùùràk'apù p'anù chauk'aa bak'ãri, chaujara bù mîda. Ãchi piu pùk'a p'anù pak'uru êt'adak'a mãik'aapa p'oodak'a. 13 P'usa t'ojara pak'ãri, k'îraudaipari mãik'aapa k'õp'ep'ee nejarra k'achia ome ipu ide atabëipari. Mãga pùk'a mãgeerã. Golpe pedeepata eperãarã waibùarãk'a. Mamîda tachia unudai ne–inaa k'achia k'îra t'ãdoo ãchia oopata. Lucero Ak'õrepa bùdamãiipa uchiadák'apù p'anù, awaraarãmaa Tachi Ak'õre o atuapipata perã. Mapa irua ãchi atuapiit'ee, ichita p'ãriude jâa paraa p'anadamerã.
Enocpa seewa jarateepataarãde jarada
14 Enoc Adandeepa uchiadap'edaarã sietede uchiaji. Tachi Ak'õrepa Enocmaa pedeepiji mãgeerãde:
—¡Ûrítù mùa jararu! Tachi Waibùa cheit'ee ichi angeleerã cho–k'ara ome. 15 Ak'ù cheit'ee jõmaweda eperãarãpa oopatap'edaa, jarait'ee pia wa k'achia. Tachi Ak'õrede ijãadak'aa beerã k'achiadee pëiit'ee. Mãga ooit'ee ãchi irude ijãadak'aa p'anadairã; ne–inaa k'achia oopatap'edaa perã mãik'aapa iru ãpùte pedee k'achia jarapatap'edaa perã.e
16 Mãgùùrã t'ãri o–îa p'anadak'aa. Ik'âatù pedeepata awaraarãmaa, ne–inaa oodak'ãri. T'ãride oodaamaa p'anadairã Tachi Ak'õrepa k'inia bùk'a, oopata ãchi p'ek'au k'achia ooyaa bù k'ap'ùapa oopi bùk'a. Audua pedeepata awaraarãpa pia ak'ùdamerã mãik'aapa pedee pia jara p'anùùpa k'õp'ãyo meraa pùk'apata, jõmaweda pia uchiamerã ãchi–it'ee aupai.
Jesucristo k'õp'ãyoorãpa naaweda jaradap'edaa
17 Mamîda âpemaarã k'iniarã, parã mãga p'anadak'aa. Mapa k'irãpátù Tachi Waibùa Jesucristopa jùrùt'eradaarãpa jaradap'edaa:
18 —Tachi Ak'õre ewari waibùa ewate pai naaweda, ijãapataarã t'ãide uchiadait'ee Tachi Ak'õre Ûraa oo iru p'anapataarã. Mãgùùrãpa oodait'ee ãchi p'ek'au k'achia ooyaa bù k'ap'ùapa oopi bùk'a.
19 Parã t'ãide mãgá p'asa bù. Mãgee seewa jarateepataarãpa parã k'îraupipata pãchi auk'aarã ome. Mapa awara–awaraadaipata. Ãchia oopata na p'ek'au eujãdepema ijãadak'aa beerãpa oopatak'a, Tachi Ak'õre Jaure wêe p'anadairã.
Ûraa Cristode wãara ijãapataarã–it'ee
20 Jõdee parã, âpemaarã k'iniarã, mãga p'anadak'aa. Mapa chik'aripa p'anapatáatù waapùara Cristode ijãadait'ee mãik'aapa pipùara k'awaadait'ee Tachi Ak'õrepa wãarata pedee jara pëida. Ma awara ùt'aa t'âpatáatù Tachi Ak'õre Jaurepa oopi bùk'a. 21 K'îra k'aupai k'îra atuadai Tachi Ak'õrepa tachi k'inia iru bapari mãik'aapa p'anapatáatù ichia k'inia bùk'a. K'ãiwee nùpatáatù Tachi Waibùa Jesucristopa chupùria k'awaaru ewate, ichita p'anapataadait'ee perã iru ome.
22 Pia ijãa–ee beerã chupùria k'awáatù waapùara Cristode ijãadamerã. 23 Eperãarã netuara o k'achiade nipapataarã k'aripátù ijãadamerã mãik'aapa uchiadamerã t'ùpùtau urua nâbùdeepa uchiak'ajidak'a. Eperã p'ek'au k'achia ooyaa bak'ãri, ichiaba chupùria k'awáatù. Mamîda ichia p'ek'au k'achia oopata unuamaa iru p'anadaipia bù, p'aru mik'ia jo bùk'a. Mapa k'îrak'aupai oodai ãchia oopatak'a.
Ùt'aa t'âda ijãapataarã pari
24 Tachi Ak'õrépata parã k'aripai mãùrã k'achiade baainaadamerã. Ma awara ichia parã ateei ichimaa ichi k'îra wãree unudamerã mãik'aapa t'ãri o–îa, p'ek'au k'achia wêe bainâ p'anadamerã ichi k'îrapite. Mapa o–îa irumaa ùt'aa t'âdáma. 25 Ichita Tachi Ak'õre; awaraa Ak'õre Waibùa iru k'ãyaara wê–e. Ichi Tachi O K'achiadeepa K'aripa Atapari. Maperã t'ãripa o–îa ùt'aa t'âpata: “Jesucristo, pù jõmaweda na p'ek'au eujãde nâbù Rey Waibùa K'îra Wãree. Ne–inaa jõmaweda pù jua ek'ari iru bù. Ewaaweda ne–inaa jõmaweda chok'aji; at'ãri chok'apari mãik'aapa ichita mãga bapariit'ee. Amén.”