22
1 Mãpai ma angelpa mùmaa ak'ùpiji to uchia bù Tachi Ak'õre Oveja Chak'e ome su–ak'ù beeparideepa. Aùdepema pania maarepida nejarra wêe baji. Bëi–sãa baji vidriok'a. Ma paniapa eperãarã ichita chok'ai p'anapata. 2 Mãgà to weepachi p'uuru calle jã esajîak'a. To i chaa pak'urura paraaji. Mãgùpa eperãarã chok'ai p'anapipari. Mãgà nejõ chauda doce chaupari año abaade. Chi k'irupa eperãarã k'ayaa k'îra t'ãdoo jùpapari. 3 Ma p'uurude wê–e pait'ee ne–inaa apida Tachi Ak'õrepa k'achiade baaipida, naapema eperãarãpa p'ek'au k'achia oodap'edaa k'aurepa. Mãga pait'ee Tachi Ak'õre, Oveja Chak'e ome su–ak'ù beepari ma p'uurude bapari perã. Mama ichideerãpa ichita ùt'aa t'âpataadait'ee irumaa. 4 Iru k'îra unudait'ee mãik'aapa ãchi tau bùùrùde iru t'â p'ã iru p'aneedait'ee. 5 Mama p'ãriu–e pait'ee. Ichideerãpa lámpara âdaa wa ak'õrejîru jêra faltada–e pait'ee, Tachi Ak'õre Waibùa jêrapariit'ee perã ãchi ârù. Reyrãk'a ichita p'anapataadait'ee iru ome iru truade.Taarã–ee Jesucristo waya cheit'ee na eujãdee
6 Mãpai ma angelpa mùmaa mãgaji:
—Nãgà pedee ijãaipia bù wãara perã. Tachi Waibùapa ichi Jaure pëiji wãarata jarapimerã ichi pedee jarapataarãmaa. Ichia aupaita pëiji ichi ángel, mãgùpa ichideerãmaa k'awaapimerã ne–inaa taarã–ee p'asait'ee.
7 Jesupa mãga bù:
—¡Ûrítù! ¡Taarã–e mù cheit'ee! O–îa p'anù jõmaweda oopataarã Tachi Ak'õre Jaurepa jarapi bùk'a na p'ãdade.
8 Mù, Juánpata unuji mãgà ne–inaa jõmaweda angelpa mùmaa unupida. Ichiaba mùata ûriji ma pedee jõmaweda irua mùmaa jarada. Maap'eda mù bedabaidachi ma ángel k'îrapite irumaa ùt'aa t'âit'ee. 9 Mamîda ichia mãgaji:
—¡Jãga oonáaji! Pùk'a mãik'aapa pù âpemaarãk'a mù Tachi Ak'õre–it'ee mimiapari. Parã mimiapata iru–it'ee, jaradak'ãri Tachi Ak'õre Jaurepa jarapi bùk'a mãik'aapa jõmaweda ijãapataarã mimiapata iru–it'ee oodak'ãri na pedee p'ãdade jara bùk'a. Tachi Ak'õremaa aupaita ùt'aa t'âpáde aji.
10 Ichiaba mãgaji:
—Ne–inaa maarepida oonáaji eperãarãpa k'awaanaadamerã Tachi Ak'õre Jaurepa jarapida na p'ãdade, taarã–e aùde jara bù p'asait'ee perã. 11 Maperã awaraarãmaa ne–inaa k'achia oopataarãpa at'ãri mãga oopataadait'ee mãik'aapa k'achia ooi awaa p'anapataarã at'ãri mãga p'anapataadait'ee. Jõdee ne–inaa pia oopataarãpa at'ãri mãga oopataadait'ee mãik'aapa awara bùdaarã Tachi Ak'õre–it'ee at'ãri oopataadait'ee irua oopi bùk'a.
12 Jesupa mãga bù:
—¡Ûrítù! Taarã–e mù cheit'ee ne–inaa mùa k'îsia iru bù jõmaarãmaa teede. Ma ne–inaa teeit'ee eperã chaachaa, irua ne–inaa oopata pari na eujãde bak'ãri; ne–inaa pia irua oopata pari maa–e pùrã ne–inaa k'achia irua oopata pari. 13 Mùta Alfa; nejõmaata naa. Ichiaba mùta Omega; nejõmaata t'êe.
14 +O–îa p'anù chi p'aru t'õdap'edaarã Oveja Chak'e waade, ãchia p'ek'au k'achia oopatap'edaa wêpamerã. Mãùrãta k'odait'ee ma pak'uru eperãarã chok'ai p'anapiparidepema mãik'aapa t'îudait'ee ma p'uuru chiwidi t'îupatamãi. 15 Mamîda ma p'uurude unudak'aa pait'ee nãgee eperãarã: k'achia ooi awaa p'anapataarã; jaipanaarã; petau tau k'awaa beerã; p'ek'au oopataarã; chîara peepataarã; ne–inaa juapa ooda k'îrapite ùt'aa t'âpataarã mãik'aapa jõmaweda seewa jarapataarã chîara k'ûrapataarã ome. Mãgeerãta unuda–e pait'ee ma p'uurude.
16 Jesupa mãga bù:
—Mù ángel pëiji irua na jõma k'awaapimerã pùmaa, pùa jõdee k'awaapimerã mùde ijãapataarãmaa, ãchi chip'epata chaa. Mù Rey Daviddeepa uchiada. Mù chi âdatùpododepema lucerok'a bù.
17 Tachi Ak'õre Jaure mãik'aapa Oveja Chak'e wêra; Cristodeerãpa eperãarãmaa jarapata:
—¡Chétù!
Jõmaarãpa na pedee ûrirutaarã auk'a jaradaipia bù:
—¡Chétù!
Jõma opisia p'anùùrã chedaipia bù eperãarã chok'ai p'anapipari pania tode, mãgá ichita p'anapataadait'ee. Mãgà pania Tachi Ak'õrepa pari teepari chi to k'inia p'anùùrãmaa.
Juanpa ûraada na libro p'ã auparude
18 Ârá mùa ûraait'ee chi ûrirutaarãpa Tachi Ak'õre Jaurepa jarapida na p'ãdade. K'îrak'aupai Tachi Ak'õre Jaurepa na p'ãdade jarapida awara jarateedai. Apidaapa mãga ooruta pùrã, Tachi Ak'õrepa ma ne–inaa k'achia jarada na p'ãdade, mãga p'asapii ãchimaa. 19 Ma awara k'îrak'aupai wêpapidai Tachi Ak'õre Jaurepa jarapida pedee na p'ãdade bù. Apidaapa mãga ooruta pùrã Tachi Ak'õrepa iru bapi–e pait'ee ichi p'uuru chiwidide, na p'ãdade jara bù. K'opi–e pait'ee ma eperãarã chok'ai p'anapipari pak'urudepema, aù p'uurude bù.
20 Jesucristo, chi na p'ãdade jara bù k'awapidapa mãgapari:
—Taarã–e mù cheit'eeda apari.
Mù, Juanpa jara bù:
—¡Amén! ¡Chéji, Tachi Waibùa Jesús!
21 Mùa ùt'aa iidi bù Tachi Waibùa Jesucristopa parã jõmaweda pia ak'ù bapariimerã. Amén.