Rey Josiapa Pascua fiesta oopida
(2 Reyes 23.21-23)
35
1 Josías rey bùde Pascua fiesta oopiji Tachi Ak'õre–it'ee Jerusalende. Atane abaade ewari catorcede oveja chak'e peejida ma fiesta–it'ee. 2 Josiapa p'aareerã bùji ãchi mimia waya oopataadamerã Tachi Ak'õre tede. 3 Ichiaba Levideepa uchiadap'edaarã, chi Israel eujãde Ak'õre net'aa jaratee nipapatap'edaarã, ma awara bùdaarãmaa Tachi Ak'õre–it'ee, mãgaji: “Tachi Ak'õre baaltek'a bù atanadapáde aji, mãik'aapa bùdapáde aji, iru tede; Israeldepema rey David warra Salomonpa oopida tede. Ma baaltek'a bù pãchi ik'iade waa ateeda–e pait'ee. Oodapáde aji, Tachi Ak'õrepa jara bùk'a. Mãgá iru p'uuru k'aripadait'ee. 4 Pãchi te pidaarã t'oodapáde aji, t'erabai mimiapataadamerã, Israeldepema rey Davidpa chi warra Salomón ome p'ã bëidap'edaade jara bùk'a. 5 Levideepa uchiadap'edaarã chip'eda aba–abaa chip'e p'aneedaipia bù mimiadait'ee Tachi Ak'õre tede, aba pãchi auk'aarã israelitaarã te pidaarã chip'epata chaa pari. 6 Pascuadepema oveja chak'eerã peedapáde aji, mãik'aapa oodapáde aji, Tachi Ak'õrepa ley Moisemaa p'ãpidade jara bùk'a awara p'aneedamerã mimiadait'ee iru tede. Mãpai oodapáde aji, ne–inaa jõmaweda pãchi auk'aarãpa ne–animalaarã pee chedamerã paapidait'ee, Moisepa p'ãdade jara bùk'a.”7 Josiapa eperãarã chedap'edaarã jõmaarãmaa teeji ichia ne–animalaarã iru badadepema paapidamerã ma Pascua fiestade. Teeji treinta mil ovejaarã, chivoorã ome mãik'aapa tres mil p'ak'aarã. 8 Rey ak'ùpataarãpa ichiaba ne–animalaarã teejida p'uurudepemaarãmaa, p'aareerãmaa, awaraa Levideepa uchiadap'edaarãmaa. Mãgá Tachi Ak'õre te ak'ùpataarã poro waibùarã, Jilquías, Zacarías Jehiel ome p'aareerãmaa teejida dos mil seiscientos ovejaarã, chivoorã ome mãik'aapa p'ak'aarã trescientos paadamerã ma Pascua fiestade. 9 Ma awara Conaniapa chi âpemaarã Semaías, Natanael ome mãik'aapa Levideepa uchiadap'edaarã Jasabiapa, Jeyel, Josabad ome teejida cinco mil ovejaarã, chivoorã ome mãik'aapa quinientos p'ak'aarã paadamerã Levideepa uchiadap'edaarã pari.
10 Mãpai ma p'aareerã ak'ùnâ p'ananajida ãchi mimiapatamãi mãik'aapa Levideepa uchiadap'edaarã awara–awaraa p'aneejida ãra k'aripadait'ee reypa jaradak'a. 11 Mãpai oveja chak'eerã peejida Pascua fiesta–it'ee. Ma ovejaarã peedap'eda, Levideepa uchiadap'edaarãpa chi waa teejida p'aareerãmaa jîap'edamerã altar ârù. Mãùmisa awaraa Levideepa uchiadap'edaarãpa ma animalaarã k'ara o wãjida. 12 Ma ovejaarã traa êt'a atajida paadait'ee eperãarã te pidaarã chip'edap'edaa aba–abaa pari, Moisepa p'ãdade jara bùk'a. Auk'a oojida p'ak'aarã ome. 13 Mãpai ma ne–animalaarã chiara paajida eperãarãpa Pascua fiesta chik'o k'odamerã, Ak'õre ley p'ãdade jara bùk'a. Mãùmisa awaraa ne–inaa awara bùdap'edaa Tachi Ak'õre–it'ee mãik'aapa aneedap'edaa primiciak'a chuujida k'uuru k'îra t'ãdoode. Mãpai ma chik'o jõma jedejida eperãarãmaa. 14 Maap'eda Levideepa uchiadap'edaarãpa ãchide, p'aareerãde paajida mãik'aapa chuujida. Mãga oojida aù naaweda Aarondeepa uchiadap'edaa p'aareerãpa p'oyaa nek'oda–e paji, audú ne–animalaarã mãik'aapa chi traa paraaji perã paa jõpidait'ee. Maperã Levideepa uchiadap'edaarãpa ãchide t'êepai chuujida.
15 Mãga nùde Asafdeepa uchiadap'edaarã, chi música chaapataarã ak'ùnâ p'anajida ãchi mimiapatamãi, David, Asaf, Hemán, rey–it'ee ne–inaa unupari Jedutún ome chonaarãweda jaradap'edaak'a. Tachi Ak'õre tedepema puerta jâapataarã ichiaba p'anajida te t'îupata chaa. Maarepida ãyaa wãda–e paji ãchi jâa p'anadap'edaamãiipa awaraa Levideepa uchiadap'edaarãpa ãchi chik'o aneedap'edaa perã ma ne–animalaarã paadap'edaadepema.
16 Mãgá jõma pia oojida Tachi Ak'õre k'îrapite ma Pascua fiesta oo jõnùde. Ne–animalaarã Tachi Ak'õre–it'ee paa jõjida iru altarde rey Josiapa jaradak'a. 17 Arii p'anadap'edaa israelitaarãpa ma Pascua fiesta o–îa oojida pan levadura wêe k'opata fiesta ome, ewari siete wãyaarude. 18 Israelitaarãpa Pascua fiesta piara ooda–e paji Tachi Ak'õre pedee jarapari Samuel badak'ãriipa ma ewate parumaa. Awaraa Israeldepema reyrãpa mãgee fiesta piara oopida–e paji, Josiapa oopida k'ãyaara nãgùùrã ome: p'aareerã; Levideepa uchiadap'edaarã; Judadepemaarã; Israeldepemaarã mãik'aapa Jerusalendepemaarã. 19 Ma Pascua fiesta oojida Josías año dieciocho rey bùde.
Josías piuda
(2 Reyes 23.28-30)
20 Josiapa Tachi Ak'õre te chiwidi pùk'a oopip'eda, Egiptodepema rey Necao, wãyaa wãji Éufrates todee chõode Carquemis puntode. Mãga k'awaa atak'ãri, Josías uchiaji ãchi ome chõode. 21 Mamîda ma rey Necaopa nãga jara pëiji Josiamaa: “Judadepema rey, mù ichiak'au bàji. Mù chõo jùrù–e bù pù ome. Awaraa eujãdepemaarã ómeta jura chõode wãru. Tachi Ak'õrepa mùmaa k'awapiji isapai wãipia bù. Maperã jaranáaji mù isapai wãyaanaamerã. Tachi Ak'õrepa mù k'aripamaa bù. Mù ome chõo jùrùru pùrã, pù piuit'eeda” aji.
22 Mamîda Josías ãpùtee wã–e paji. Chõo k'inia baji Necao ome, irua mãga jara pëiji mîda. Ijãa–e paji Tachi Ak'õrépata mãga jara baji Necao k'ap'ùa. Maperã Josiapa p'aru awaraa jâp'eda iru k'awanaadamerã, chõomaa p'aneejida Meguido eujã jewedaade. 23 Mãgá chõo jõnùde Necao eerepema ematrùma trù p'anadap'edaarãpa Josías sut'aajida. Mãga nùde Josiapa mãgaji ichi ek'ari beerãmaa: “¡Mù ãyaa ateedapáde aji, mù sut'aadap'edaa perã!” 24 Mãga oojida. Iru carretadeepa atadap'eda, awaraa carretade bùjida mãik'aapa isapai ateejida Jerusalendee. Mama piuji. Ùajida ichi chonaarã ùadap'edaamãi mãik'aapa jõmaweda Judadepemaarã Jerusalendepemaarã ome jêejida Josia–it'ee.
25 Josías piuda t'êepai Tachi Ak'õre pedee jarapari Jeremiapa chi–ùa pedee p'ãpata p'ãji Josia–it'ee. Idi parumaa ma p'ãda pedee k'aripata Josías piuda k'irãpadak'ãri. Ma k'ari p'ãda ùa iru p'anapata awaraa k'ari p'ãda ome.