Judade Josías rey pada
(2 Reyes 22.1-2)
34
1 Amón warra Josías ocho año iru baji rey beek'ãri. Rey baji Jerusalende treinta y un año wãyaarude. 2 Josiapa ne–inaa pia oopachi Tachi Ak'õre k'îrapite. Ne–inaa jõma oopachi chi chonaa Davidpa oopariidak'a.3 Josías año ocho rey bùde, at'ãri k'ûtrãa bùde, ichi chonaa David Ak'õre Waibùa jùrùmaa beeji. Mãpai año doce rey bùde ijãadak'aa beerã ùt'aa t'âpata te ee nok'ode p'anadap'edaa ãripiji nawe waibùa Aserá apatap'edaa k'îrak'a bù ome, awaraa k'îrak'a bù metaldee ooda ome. Mãga oopiji jõma Judade mãik'aapa Jerusalende. 4 Ichiaba ãripiji altar ak'õre waibùa apatap'edaa Baal–it'ee oodap'edaa. Ichiaba jaraji mama p'anadap'edaa altar aù ârù ne–inaa t'ûa bapari paapata ãrik'oodamerã. Ichiaba Aserá k'îrak'a bù ãripiji awaraa k'îrak'a bù oodap'edaa ome. Ma jõma ãripiji chi p'ora uchiarumaa. Maap'eda jaraji ma p'ora p'odamerã chi mãgee altar ârù ne–animalaarã paapatap'edaarã; mãgùùrã jãùra ârù. 5 Ma awara chi mãgee altar k'îrapite ùt'aa t'âpatap'edaarã bùùrù paapiji ma altar ârù. Mãgá Josiapa Jerusalén Judá ome waya awara bùpiji Tachi Ak'õre–it'ee. 6 Josiapa auk'a mãga oopiji: Manasedeepa uchiadap'edaarã, Efraindeepa uchiadap'edaarã, Simeondeepa uchiadap'edaarã mãik'aapa Neftalideepa uchiadap'edaarã eujãdepema p'uurude. 7 P'ora parumaa ãripiji ma p'uurudepema altar awaraa ak'õre waibùa apatap'edaa–it'ee oodap'edaa; Aserá k'îrak'a bù awaraa ne–inaa k'îrak'a bù oodap'edaa ome. Ichiaba ãripiji jõmaweda Israel eujãde p'anadap'edaa altar oodap'edaa ne–inaa t'ûa bapari paapataadait'ee. Mãpai ãpùtee cheji Jerusalende.
Tachi Ak'õre ley p'ãda unudap'edaa
(2 Reyes 22.3-23.3)
8 Josías año dieciocho rey bùde irua Asalías warra Safán mãik'aapa Jerusalén p'uuru ak'ùpari Maseías chi secretario Joacaz warra Joa ome pëiji Tachi Ak'õre te chiwidi pùk'a oopidamerã. Mãgá ãrapa Judá eujã mãik'aapa Tachi Ak'õre te ome awara bùdai Tachi Ak'õre–it'ee. 9 Ãra wãjida p'aareerã poro waibùa Jilquiamaa p'arat'a teedait'ee. Manasedeepa uchiadap'edaarãpa, Efraindeepa uchiadap'edaarãpa, Judadeepa uchiadap'edaarãpa, Benjamindeepa uchiadap'edaarãpa, awaraa Israeldeepa uchiadap'edaarãpa mãik'aapa Jerusalendepemaarãpa Tachi Ak'õre–it'ee p'arat'a tee chedak'ãri, Levideepa uchiadap'edaarã, chi ma tedepema puerta jâapatap'edaarãpa ma p'arat'a p'e atadap'eda, ùa bùjida. 10 Mãpai ma p'arat'a teejida poro waibùarãmaa, ãchia Tachi Ak'õre te chiwidi pùk'a oopidamerã chi ne–inaa oo k'awaa beerãmaa. 11 Ichiaba p'arat'a teejida ne–inaa pak'urudee oo k'awaa beerãmaa mãik'aapa awaraa te oo k'awaa beerãmaa, ãchia mãu sîda, pak'uru pia jùrùdamerã ma te–it'ee Judadepema reyrãpa ma te pia ak'ùda–e p'anadap'edaa perã.
12 Ma mimiapataarãpa ãchi mimia t'ãri jîp'a oojida. Ãchi poro waibùarã nãgà Levideepa uchiadap'edaarã paji: Merarideepa uchiadap'edaa Yajat, Abdías ome mãik'aapa Coatdeepa uchiadap'edaa Zacarías, Mesulán ome. Jõdee chi Levideepa uchiadap'edaa música chaa k'awaa beerãpa 13 mimiapataarã jîp'aarã ak'ùpachida. Ma Levideepa uchiadap'edaarã ûk'uru secretariorã paji, ûk'uru historia p'ãpataarã paji mãik'aapa ûk'uru puerta jâapataarã paji.
Tachi Ak'õrepa ley Moisemaa p'ãpida unudap'edaa
(2 Reyes 22.8-20)
14 P'aareerã poro waibùa Jilquiapa ma p'arat'a Tachi Ak'õre tede ùa bùdap'edaa atanak'ãri, Tachi Ak'õrepa ley Moisemaa p'ãpida unu ataji. 15 Jilquiapa mãgaji reypa oopata p'ãpari Safanmaa: “Tachi Ak'õre tede mùa irua ley Moisemaa p'ãpida unu atajida” aji. Ma ley p'ãda teeji Safanmaa 16 mãik'aapa irua teenaji reymaa. Mãgaji:
—Tachi Rey, pù mimiapataarãpa ne–inaa jõmaweda oomaa p'anùda aji, pùa jaradak'a. 17 P'arat'a Tachi Ak'õre tede ùa bada jita atajida mãik'aapa teenajida mimiapataarã poro waibùarãmaa mãik'aapa mimiapataarãmaa.
18 Rey secretario pada perã, Safanpa ichiaba nepùrùji p'aareerã poro waibùa Jilquiapa libro unudade mãik'aapa ma libro leemaa beeji rey k'îrapite.
19 Reypa ma ley ûrik'ãri, chi p'aru jêji t'ãri p'uapa 20 mãik'aapa nãga jaraji p'aareerã poro waibùa Jilquiamaa, Safán warra Ajicanmaa, Micaías warra Abdonmaa, chi secretario Safanmaa mãik'aapa rey ak'ùpari Asaiamaa:
21 —Mù pari mãik'aapa Israeldepemaarã, Judadepemaarã pari Tachi Ak'õremaa ùt'aa t'ânadapáde aji, na librode jara bairã irua oopi k'inia bù eperãarãmaa. ¿Iru tachi ome k'îrau bù–ek'ã tachi chonaarãpa na ley ûridaamaa p'anadap'edaa perã mãik'aapa oodaamaa p'anadap'edaa perã aùde jara bùk'a?
22 Mãpai Jilquías apemaarã ome wãjida Tachi Ak'õre pedee jarapari Huldamaa. Ma wêra bapachi barrio chiwidide Jerusalén p'uurude. Iru Salún wêra paji. Ma Salún Tachi Ak'õre tede mimiapataarã p'aru oopipari paji. Iru Ticvá warra mãik'aapa Jarjás ãichak'e paji.
23 Reypa iidi pëida iididak'ãri Huldamaa, irua p'anauji: “Nãga jara bùda aji, israelitaarã Ak'õre Waibùapa: ‘Jarapáde aji, parã pëidamaa 24 mù, jõmaarã Ak'õre Waibùapa jara bù: Mùa ne–inaa k'achia ooit'ee Judá eujãdepemaarãmaa. Ooit'ee ma libro Judadepema reymaa leedade jara bùk'a eperãarãpa mù leyde jara bùk'a oodaamaa p'anadak'ãri. 25 Ãrapa mù atabaibëijida. Awaraa ak'õre waibùa apataarã–it'ee ne–inaa t'ûa bapari paapachida mãik'aapa mù k'îraupijida ne–inaa juapa oodamaa ùt'aa t'âdak'ãri. Maperã mù audú k'îrau bù nãpemaarã ome. 26 Mamîda Judadepema rey, parã pëidamaa nãga jaradapáde aji: ‘Mù, jõmaarã Ak'õre Waibùa, israelitaarã Ak'õre Waibùapa jara bù irua libro ûridade: 27 Pù t'ãri p'uadaida perã mãik'aapa audua–edaida perã ûrik'ãri mù ley p'ãdade jara bù mùa na eujãdepemaarã k'achia ooit'ee; ma awara pùchi p'aru jêda perã mãik'aapa jêeda perã mù k'îrapite, mùa ûriit'ee pùa chupùria iidi bù. 28 Pù jai–idaak'ãri, k'ãiwee pù ùadait'ee pù chonaarã ùadap'edaamãi. Pùchi taupa unu–e pait'ee mùa k'achia ooit'ee bù na eujãdepemaarãmaa.’ ”
Mãga jaranajida rey Josiamaa.
Judadepemaarãpa Tachi Ak'õremaa jaradap'edaa
29 Mãga ûrik'ãri, rey Josiapa t'â pëiji jõmaweda Judadepemaarã poro waibùarã mãik'aapa Jerusalendepemaarã poro waibùarã chip'edaidamerã ichi ome. 30 Maap'eda Josías ome jõmaweda Judadepema ùmùk'îraarã, Jerusalendepemaarã, p'aareerã mãik'aapa awaraa Levideepa uchiadap'edaarã, chi ek'ariara bùdeepa waibùara bùmaa cheepurujida Tachi Ak'õre tedee. Mama p'anùde jõmaarã taide golpe pedeede ãchi reypa leeji ma librode ley p'ãda, Tachi Ak'õre tede unuda. 31 Mãpai rey ak'ùnâ banaji rey ak'ùnâ beeparimãi te bùùrù ik'aawa mãik'aapa Tachi Ak'õre k'îrapite jaraji t'ãripa ichia k'îra jîp'a ooit'ee Ak'õrepa oopi bùk'a mãik'aapa iru ley p'ãdade jara bùk'a. 32 Maap'eda jaraji ma Jerusalendepemaarãpa mãik'aapa Benjamindeepa uchiadap'edaarãpa auk'a jaradamerã Tachi Ak'õremaa. Mãga oojida. Ãra chonaarãpa oodap'edaak'a jarajida auk'a oodait'ee Ak'õre ley p'ãdade jara bùk'a.
33 Ma t'êepai rey Josiapa jaraji net'aa jõmaweda ooda awaraa ak'õre waibùa apatap'edaa–it'ee ma eujãde unudap'edaa ãrik'oodamerã mãik'aapa jõmaarãpa ùt'aa t'âpataadamerã Tachi Ak'õremaa aupai. Mãgá Josías chok'ai bùde israelitaarãpa ãchi chonaarã Ak'õre Waibùade ijãapachida.