Judade Manasés rey pada
(2 Reyes 21.1-18)
33
1 Manasés doce año iru baji Judadepemaarã rey beek'ãri. Rey baji Jerusalende cincuenta y cinco año wãyaarude. 2 Manasepa ne–inaa k'achia oopachi Tachi Ak'õre k'îrapite. Ne–inaa k'achia oopachi ma eujãde naaweda p'anapatap'edaarãpa oopatap'edaak'a, ma k'aurepa Tachi Ak'õrepa mãùrã jërek'ooji mîda israelitaarã naa. 3 Manasepa ijãadak'aa beerã ùt'aa t'âpata te waya oopiji ee nok'ode, chi ak'õre Ezequiapa mãgee te ãripiji mîda. Ma awara altar oopiji ak'õre waibùa apatap'edaa Baal–it'ee mãik'aapa nawe waibùa apatap'edaa Aserá k'îrak'a bù oopiji. Ichiaba bedabaipachi ùt'aa t'âit'ee ne–inaa pajãde nâbùmaa. 4 Ichiaba altar chiwidi oopiji bùdait'ee Tachi Ak'õre tede aù naaweda irua jaraji mîda: “Mù Jerusalende ichita bapariit'ee.” 5 Ichiaba Tachi Ak'õre te ãuk'idaa patiode altar awaraa oopiji mama ne–inaa pajãde nâbù k'irãpadamerã. 6 Ichiaba Ben Hinón eujã jewedaade Manasepa ichi warrarã paa peeji ma ak'õre waibùa apatap'edaa–it'ee mãik'aapa jairã p'e ataji mãùrãpa jaradamerã ne–inaa p'asait'ee, pedeedamerã netuaraarã ome, mãik'aapa ne–inaa k'achia oodamerã awaraarãmaa. Ma jõma audú k'achia bada perã Tachi Ak'õre k'îrapite, Tachi Ak'õre k'îrau beeji Manasés ome.7 Maap'eda Manasepa ichi nawe waibùa apatap'edaa Aserá k'îrak'a bù bùji Tachi Ak'õre tede. Mãga ooji Tachi Ak'õrepa nãga jaraji mîda Davidmaa, chi warra Salomonmaa: “Awaraa Israel eujãdepema p'uuru jùrùt'erai k'ãyaara, mùa Jerusalén p'uuru jùrùt'eraji aùde ichita bapariit'ee. 8 Israelitaarãpa ooruta pùrã mùa jara bùk'a mãik'aapa mù ley mù mimiapari Moisemaa p'ãpidade jara bùk'a, mãgara mùa israelitaarã jëre–e pait'ee na eujãdeepa, mùa eujã teeit'ee ada ãchi chonaarãmaa.” 9 Mamîda Manasepa ne–inaa k'achia ooda k'aurepa israelitaarãpa oodaamaa p'aneejida Tachi Ak'õrepa jaradak'a. Ma k'ãyaara ne–inaa k'achiara oojida, ma naawedapema eujãdepemaarãpa oopatap'edaa k'ãyaara, ma k'aurepa Tachi Ak'õrepa mãùrã jõpiji mîda.
10 Manasepa ma jõma ooda perã, Tachi Ak'õrepa jara pëiji irua mãik'aapa Judadepemaarã waya ichide ijãapataadamerã. Mamîda ûridaamaa p'anajida. 11 Mapa Tachi Ak'õrepa Asiriadepemaarã pëiji chõodamerã ãra ome. Mãùrã poro waibùarãpa Manasés jita atajida mãik'aapa t'uak'idak'a bùjida ichi k'âde. Mãpai cadena broncedee oodapa jâjida mãik'aapa ateejida Babiloniadee. 12 Mama mia nâbùde Manasepa chupùria iidiji chi chonaarã Ak'õre Waibùamaa. Ichia ne–inaa k'achia oopariida jaraji Tachi Ak'õremaa mãik'aapa iidiji irua k'aripamerã. 13 Mãgá ùt'aa chupùria iidik'ãri, Tachi Ak'õrepa ûriji mãik'aapa k'aripaji ãpùtee wãmerã Jerusalendee waya rey mimia oode. Irua mãga ook'ãri, Manasepa ijãa beeji iru wãara Jõmaarã Ak'õre Waibùa.
14 Ma t'êepai Manasepa David p'uuru t'ùak'au bù muralla oopiji chi naawedapema muralla taawaik'a eere. Oopiji eujã jewedaade occidente eere Guijón pania poátrù uchia bùmãiipa Puerta de los Pescados parumaa. Ma wãyaarude Ofel ee p'ùrrabaiji. Ma muralla audú ùt'ùa oopiji. Ichiaba soldaorã poro waibùarã pëiji jõmaweda Judadepema p'uuru murallapa t'ùak'au bùde. 15 Manasepa ichiaba ãyaa atapiji jõmaweda ak'õre waibùa apatap'edaa net'aa Tachi Ak'õre tede p'anadap'edaa, mãùrã k'îrak'a bù ome. Altar ma ak'õre waibùa apatap'edaa–it'ee Tachi Ak'õre te eede oodap'edaa mãik'aapa awara ãi Jerusalende oodap'edaa ichiaba ãyaa atapiji Jerusalendeepa. 16 Maap'eda Tachi Ak'õre tedepema altar waya oopiji aùde ne–animalaarã paadamerã ak'ùpidait'ee ãchi t'ãri auk'a bù k'inia p'anù Tachi Ak'õre ome mãik'aapa ak'ùpidait'ee gracias jara k'inia p'anù Tachi Ak'õremaa. Mãpai Manasepa jaraji Judadepemaarã ùt'aa t'âpataadamerã israelitaarã Ak'õre Waibùamaa. 17 Mãga jaraji mîda, eperãarãpa ne–animalaarã at'ãri paapachida ee nok'ode p'anadap'edaa ijãadak'aa beerã altarde. Mamîda mãga oopachida Tachi Ak'õre–it'ee aupai.
18 Awaraa ne–inaa ooda Manasepa, irua ùt'aa iidida, Ak'õre pedee jarapataarãpa irumaa jaradap'edaa, ma jõmaweda p'ã bù Israeldepema reyrãpa oopatap'edaa ome. 19 Irua ùt'aa iidida mãik'aapa Tachi Ak'õrepa p'anauda; irua p'ek'au k'achia oopariida; irua Aserá k'îrak'a awaraa ne–inaa aù k'îrapite ùt'aa t'âpata ome oopida mãik'aapa ma ne–inaa bùpidamãi irua chupùria iidii naaweda, ma jõmaweda p'ã bù Jozaydepema Ak'õrepa unupida jarapataarãpa p'ãdap'edaade. 20 Manasés jai–idaak'ãri, ùajida ichi rey palaciode. Iru piuda t'êepai chi warra Amón rey beeji iru pari.
Judade Amón rey pada
(2 Reyes 21.19-24)
21 Amón veintidós año iru baji rey beek'ãri. Rey baji Jerusalende año omé wãyaaru misa. 22 Amonpa ne–inaa k'achia oopachi Tachi Ak'õre k'îrapite chi ak'õre Manasepa oopariidak'a. Ne–animalaarã paapiji chi ak'õrepa oopida ne–inaa juapa ooda k'îrapite mãik'aapa ùt'aa t'âpachi ma ne–inaamaa. 23 Mamîda irua ne–inaa k'achia oopariida oo amaa–e paji chi ak'õre Manasepa oodak'a. Ma k'ãyaara audupùara k'achia oopachi.