Rey Senaquerib Judá eujãde chõo cheda
(2 Reyes 18.17-35; 19.35-37)
32
1 Mãgá rey Ezequías Judá eujãdepemaarã pia ak'ùpachi mîda, Asiriadepema rey Senaquerib chõo cheji Judá eujãde. Soldaorã p'uuru t'ùak'au badamaa chõonadap'eda, jãri ata wãjida. 2 Maap'eda rey Ezequiapa k'awaa atak'ãri Senaquerib ichi eerepemaarã ome chõo cheruta Jerusalén p'uurude, 3 Judadepema poro waibùarã ichi soldaorã poro waibùarã ome t'â pëip'eda, jaraji p'uurudeepa taawa bada pania poátrù uchia bùmãi t'ap'anadamerã. Mãga oojida. 4 Eperãarã chok'ara chip'e atajida mãik'aapa ma pania poátrù uchia bùmãi jõmaweda t'ap'ak'oo wãjida to chak'e bada paara, Senaquerib ichi eerepemaarã ome aùde pania tonaadamerã.5 Ma awara Ezequiapa Jerusalendepema muralla ãrida jõmaweda chiwidi oopiji mãik'aapa aùde torre oopiji. Ichiaba aù taawaik'a eere awaraa muralla oopiji. Ma awara terraplén David p'uurude bada chiwidi oopiji madeepa chõodamerã. Ichiaba miasu escudo ome oopiji. 6 Ma t'êepai soldaorã poro waibùarã bùji eperãarã iru p'anadamerã ãchi jua ek'ari. Mãpai ma jõmaarã chip'e ataji plaza p'uurudepema puerta k'îrapite badade mãik'aapa jaraji: 7 “¡Sõcharra p'anátù! Waawee p'ananáatù Asiriadepema rey ichi soldaorã ome cheruta k'aurepa. Ãra cho–k'ara p'anù mîda, tachia chi jõmaarã k'ãyaara juataura bù iru p'anù tachi eere. 8 Mãùrãpa k'îsia p'anù ãchi cho–k'ara p'anadairã, ãchi unurutaarã jõmaweda p'oyaadait'ee. Mamîda tachia k'awa p'anù Tachi Ak'õre Waibùapa tachi k'aripait'ee, ichita k'aripaparik'a jura chõodak'ãri.” Ma eperãarãpa mãga ûridak'ãri, k'ãiwee p'aneejida.
9 Maap'eda rey Senaquerib ichi soldaorã ome Laquis p'uurude chõo p'anadak'ãri, madeepa ichi soldaorã poro waibùarã ûk'uru pëiji nãga jaradamerã Judadepema rey Ezequiamaa mãik'aapa Jerusalén p'uurude p'anadap'edaarãmaa:
10 “Asiriadepema rey Senaqueribpa nãga jara pëi bù: ‘¿Sãap'eda parã Jerusalén p'uurude p'anee k'inia p'anùma? aji. ¿K'awada–e p'anùk'ã taipa parã wap'ùra iru p'anù? 11 ¿K'awada–e p'anùk'ã Ezequiapa parã piupiit'ee jarrapa maa–e pùrã opisiapa? Irua parã k'ûramaa bù jarak'ãri parã ak'õre waibùa apatapa mù juadeepa parã uchiapiit'ee. 12 ¿Ezequías paji–ek'ã chi ijãadak'aa beerã ùt'aa t'âpata te ee nok'ode p'anadap'edaa altar ome jõpida? ¿Maap'eda jaraji–ek'ã Judadepemaarã Jerusalendepemaarã ome ùt'aa t'âpataadamerã altar abaamãi mãik'aapa mama ne–animalaarã paadamerã? 13 ¿Parãpa k'awada–e p'anùk'ã mùa mãik'aapa mùchi chonaarãpa oodap'edaa na p'ek'au eujãdepemaarã jõmaarãmaa? ¿Sãma mãùrã ak'õre waibùa apatap'edaarãpa mù juadeepa k'aripajidama? 14 K'aripada–e paji tai chonaarã juadeepa. Maperã mùa k'awa bù parã ak'õre waibùa apatapa mù juadeepa parã auk'a k'aripa–e pait'ee. 15 ¡Mapa k'ûrapináatù Ezequiamaa mãik'aapa iru pedee ûrináatù! Awaraa eujãdepemaarã ak'õre waibùa apatap'edaarãpa mù chonaarã juadeepa ãra k'aripada–e pada paara, ¡audupùara parã ak'õre waibùa apatapa parã k'aripa–e payada aji, mù juadeepa!”
16 Senaquerib pëida poro waibùarãpa awaraa pedee k'achia ichiaba jarajida Tachi Ak'õre Waibùa ãpùte mãik'aapa iru mimiapari Ezequías ãpùte. 17 Ma awara Senaqueribpa k'art'a p'ã pëidade pedee k'achia ichiaba jaraji israelitaarã Ak'õre Waibùa ãpùte nãga jarak'ãri: “Awaraa eujãdepemaarã ak'õre waibùa apataarãpa mù juadeepa ãra k'aripada–e paji. Auk'a Ezequías ak'õre waibùa aparipa parã p'uuru pidaarã mù juadeepa k'aripa–e pait'ee.”
18 Mãgá ma Senaqueribpa pëida poro waibùarãpa biajida Jerusalendepemaarã murallade ak'ù p'anadap'edaarãmaa. Hebreo pedeede pedeejida ma Jerusalendepemaarã audupùara p'erapidait'ee mãik'aapa mãgá ãra p'oyaadait'ee. 19 Jarajida Jerusalendepemaarã Ak'õre Waibùa auk'a baji awaraa eujãdepemaarã ak'õre waibùa apatap'edaak'a; ne–inaa juapa oodap'edaak'a.
20 Maperã rey Ezequiapa Ak'õre pedee jarapari Isaías ome ùt'aa iidipachida Tachi Ak'õremaa. 21 Mãpai Tachi Ak'õrepa ángel pëiji rey Asiria eerepemaarã Laquis p'uurude chip'edap'edaarã jõmaweda jõpimerã; chi soldaorã ãchi poro waibùarã ome. Maap'eda rey k'îra nejasia ãpùtee wãji ichi eujãdee. Mama bùde ichi ak'õre waibùa apatap'edaa tede t'îuk'ãri, chi warrarãpa iru peet'aajida.
22 Mãgá Tachi Ak'õrepa rey Ezequías Jerusalendepemaarã ome k'aripa ataji Asiriadepema rey Senaquerib juadeepa mãik'aapa awaraa k'îra unuamaa iru p'anadap'edaarã juadeepa. Maap'eda Judadepemaarã k'ãiwee p'anapachida ãchi eujã ik'aawa p'anadap'edaarã ome. 23 Maperã eperãarã chok'ara wãpachida Jerusalén p'uurudee primicia teede Tachi Ak'õremaa mãik'aapa regalo teede Judadepema rey Ezequiamaa. Mãgá awaraa eujãdepemaarãpa Ezequías audupùara t'o p'aneejida.
Ezequías k'ayaa bada
(2 Reyes 20.1-21; Is 37.21-38; 38.1–8)
24 Maapai Ezequías k'ayaadachi k'ayaa k'achiapa. Jua k'aya baji. Mãga nùde ùt'aa iidiji Tachi Ak'õremaa jùpamerã. Ak'õrepa p'anauji ne–inaa eperãarãpa p'oyaa oodak'aa ãchi juadoopa ooda k'aurepa. 25 Mamîda Ezequiapa Ak'õremaa gracias jarai k'ãyaara, auduadachi. Ma k'aurepa Tachi Ak'õre k'îrau beeji Ezequías ome, Judá eujãdepemaarã ome mãik'aapa Jerusalén p'uurudepemaarã ome. 26 Ma t'êepai Ezequías mãik'aapa Jerusalendepemaarã audua–ee p'aneejida. Mapa Ezequías chok'ai bùde Tachi Ak'õre waa k'îrau ba–e paji iru ome.
Ezequiapa net'aa pia iru bada mãik'aapa iru jai–idaada
27 Rey bùde Ezequiapa net'aara p'e wãji mãik'aapa eperãarã chok'araarãpa iru t'o p'anapachida. Nãgà net'aa waibùa iru baji: p'arat'a, nêe, mãu pi–ia, k'era, escudo awaraa net'aa pi–ia ome. 28 Net'aa ùapata te chok'ara iru baji nãgee net'aa–it'ee: net'a tau, vino, aceite mãik'aapa ne–animalaarã te iru baji p'ak'aarã, ovejaarã–it'ee. 29 Ichiaba p'uuru chiwidi oopiji mãik'aapa p'ak'aarã chok'ara, ovejaarã chok'ara iru baji aù ik'aawa. Ma jõma iru baji Tachi Ak'õrepa iru pia ak'ù bada perã.
30 Ma awara Ezequiapa Guijondepema pania poátrù uchia bùmãidepema pania weepiji canalde, weemerã David p'uuru occidente eere. Ne–inaa jõmaweda irua ooda pia uchiaji. 31 Mamîda Babiloniadepema poro waibùarãpa iidi chedak'ãri Tachi Ak'õrepa ne–inaa eperãarãpa p'oyaa oodak'aa oodade, Tachi Ak'õrepa Ezequías ichiak'au bùji k'awaait'ee iru t'ãride k'îsia bada.
32 Awaraa ne–inaa Ezequiapa ooda ichi rey bùde, ichia ne–inaa ooda Tachi Ak'õre–it'ee paara, p'ã bù Judadepema mãik'aapa Israeldepema reyrãpa oopatap'edaa p'ã bùde. Ichiaba irua ooda ûk'uru p'ã bù Amoz warra, Tachi Ak'õre pedee jarapari Isaiapa k'ãimok'araa pùk'a bùde p'ãdade. 33 Ezequías jai–idaak'ãri, ùajida ichi chonaarã, Daviddeepa uchiadap'edaarã, ùadap'edaamãi. Judá eujãdepemaarã mãik'aapa Jerusalén p'uurudepemaarã jõmaarãpa irudé pia pedeepachida. Chi warra Manasés rey beeji iru pari.