(2 Reyes 18.5-7)
31
1 Ma fiesta jõp'eda, israelitaarã jõmaarã ma fiesta oodap'edaarã wãjida Judadepema p'uurudee mãik'aapa ne–inaa awaraa ak'õre waibùa apatap'edaa–it'ee ooda ãrik'oo wãjida: mãu awara bùda ma–it'ee; nawe waibùa apatap'edaa Aserá k'îrak'a bù; ijãadak'aa beerã ùt'aa t'âpata te ee nok'ode p'anadap'edaa chi altar ome. Mãgá mãgee ne–inaa jõ wãjida Judadeepa uchiadap'edaarã eujãde, Benjamindeepa uchiadap'edaarã eujãde, Efraindeepa uchiadap'edaarã eujãde mãik'aapa Manasedeepa uchiadap'edaarã eujãde. Maap'eda ma israelitaarã wãjida ãchi temaa.2 T'êepai Ezequiapa p'aareerã, awaraa Levideepa uchiadap'edaarã ome t'oojida t'erabai mimiapataadamerã Tachi Ak'õre tede. Mãgá ewari chaa ûk'uruurãpa ne–animalaarã Tachi Ak'õre–it'ee paa jõpipachida. Ichiaba ne–animalaarã paapachida eperãarãpa jedek'odamerã ãchi auk'aarã ome. Awaraarãpa ùt'aa t'âpachida gracias jaradait'ee Tachi Ak'õremaa mãik'aapa awaraarãpa k'aripachida Tachi Ak'õre–it'ee. Ma Levideepa uchiadap'edaarã ûk'uru Tachi Ak'õre tedepema puerta jâapachida. 3 Maapai reypa ichi ne–animalaarãdepema teeji Tachi Ak'õre–it'ee paa jõpidamerã ewari chaa tap'eda, k'ewara; ichiaba paa jõdamerã âipata ewate fiesta ewate ome Tachi Ak'õre ley p'ãdade jara bùk'a. 4 Ezequiapa ichiaba jaraji Jerusalendepemaarãmaa primicia teepataadamerã p'aareerãmaa mãik'aapa Levideepa uchiadap'edaarãmaa, ãchi jîp'a mimiapataadamerã Tachi Ak'õre net'aade irua jara bùk'a ichi leyde. 5 Ezequiapa jarada ûridak'ãri, israelitaarãpa tee chejida nãgà ne–inaa: trigo, vino, aceite, miéle, awaraa ne–inaa ewadap'edaa ome. Ne–inaa iru p'anadap'edaa chaa diezdepema aba tee chejida. Waibùa tee chejida.
6 Awaraa Judadepema p'uurudepemaarãpa ichiaba tee chejida ãchia iru p'anadap'edaa chaa diezdepema aba, p'ak'aarã ovejaarã ome, awaraa net'aa awara bùdap'edaa Tachi Ak'õre–it'ee paara. Net'aa chok'ara pëi nâbùjida. 7 Atane õpeede ma net'aa pëimaa p'aneejida. Atane sietede aupa wãjida. 8 Ezequías awaraa poro waibùarã ome wãdak'ãri ma net'aa jõma pëi nâbada ak'ùde, pedee pia jarajida Tachi Ak'õredé, israelitaarãdé paara. 9 Mãpai Ezequiapa iidiji ma p'aareerãmaa, awaraa Levideepa uchiadap'edaarãmaa ma net'aa eperãarãpa tee chedap'edaade. 10 P'aareerã poro waibùa Sadocdeerãdepema t'âjarapatap'edaa Azariapa p'anauji: “Na primicia aneedak'ãriipa Tachi Ak'õre temaa, ichita iru p'anapatada aji, nek'odait'ee mãik'aapa ma k'ãyaara waa iru p'anapata. Tai–it'ee atadap'eda, na jõma beejida aji, Tachi Ak'õrepa ichi p'uuru pidaarã pia oopari perã.”
11 Mãga bada perã, Ezequiapa jaraji net'aa ùapata cuarto oodamerã Tachi Ak'õre tede. Mãga oojida. 12 Aùde ùajida primicia eperãarãpa aneedap'edaa, net'aa awara bùdap'edaa Tachi Ak'õre–it'ee mãik'aapa net'aa diezdepema chaa aba aneedap'edaa. Ma jõma bùjida Levideepa uchiada Conanías jua ek'ari mãik'aapa chi âpema Simí jua ek'ari. 13 Ma net'aa jõma jâadamerã rey Ezequías p'aareerã poro waibùa Azarías ome nãgà Levideepa uchiadap'edaarã bùjida: Jehiel, Azazías, Najat, Asael, Jerimot, Jozabad, Eliel, Ismaquías, Mahat, Benaías. Mãgùùrã mimiapachida Conanías mãik'aapa Simí jua ek'ari. 14 Levideepa uchiada Imná Tachi Ak'õre tedepema puerta oriente eere bada jâapari paji. Iru warra Corepa jitaji primicia eperãarãpa tee chedap'edaa mãik'aapa net'aa awara bùdap'edaa Tachi Ak'õre–it'ee. Ma net'aa jedeji p'aareerãmaa mãik'aapa awaraa Levideepa uchiadap'edaarãmaa. 15 Iru jua ek'ari nãgà eperãarã iru baji: Edén, Minjamín, Jesús, Semaías, Amarías, Secanías. Mãgùùrãpa t'erabai mimiapachida mãik'aapa ma net'aa t'ãri jîp'a jedepachida awaraa Levideepa uchiadap'edaarãmaa; warrarãmaa, chonaarãmaa paara. 16 Teejida ùmùk'îraarã año õpee iru p'anadap'edaadeepa ùt'aa p'anadap'edaarãmaa; jõmaarã t'â p'ãdap'edaa Tachi Ak'õre tede t'erabai mimiapataadamerã. 17 Mãùrã t'â jõma p'ã iru p'anajida. P'aareerã t'â p'ãjida ãchi chonaarã t'â ome mãik'aapa awaraa Levideepa uchiadap'edaarã veinte añodeepa ùt'aa t'â p'ãjida ãchi mimia oodap'edaa ome. 18 Ma p'ãdade ichiaba p'ã baji warra chak'eerã t'â, wêraarã t'â, ãchi warrarã, k'aurã ome; pia jarait'eera jõmaweda Tachi Ak'õre tede mimiadamerã awara bùdap'edaarã ãchideerã ome. 19 Ma awara p'uuru bee chaa eperãarã bùjida jededamerã mama p'anapatap'edaa Aarondeepa uchiadap'edaa p'aareerãmaa mãik'aapa awaraa Levideepa uchiadap'edaarãmaa; chi t'â p'ã iru p'anadap'edaarãmaa ma p'uurude.
20 Ezequiapa jaraji Levideepa uchiadap'edaarã mãgá pia ak'ù p'anadamerã jõmaweda Judá eujãde. Tachi Ak'õrepa pia ak'ùji Ezequiapa ooda ne–inaa jõmaweda t'ãri jîp'a ooda perã. 21 Irua jõma ooji Tachi Ak'õre ley p'ãdade jara bùk'a oodamerã ichi tede mãik'aapa ma ley p'ãda waawee bapachi. T'ãripa ma jõma ooji ichia jùrù bada perã ooit'ee Tachi Ak'õrepa oopi bùk'a. Maperã Tachi Ak'õrepa iru pia ak'ùpachi.