Rey Ezequiapa Pascua fiesta oopida
30
1 Ma t'êepai rey Ezequiapa jaraji ichi ek'ari beerãmaa k'art'a p'ã pëidamerã Israeldepemaarãmaa, Judadepemaarãmaa; Efraindeepa uchiadap'edaarãmaa, Manasedeepa uchiadap'edaarãmaa paara chedamerã Jerusalende Tachi Ak'õre tedee Pascua fiesta oode israelitaarã Ak'õre Waibùa–it'ee. 2 Reypa ichi ek'ari beerã ome, Jerusalendepemaarã ome pedeep'eda, k'îsiajida ma año atane omeede Pascua fiesta oodait'ee. 3 P'oyaa ooda–e paji Tachi Ak'õre leyde jara bada ewaride, p'aareerã awara bùdap'edaa ma–it'ee at'ãri ooda–e pada perã jõmaweda Tachi Ak'õre leyde jara bùk'a iru te k'ait'a wãdamerã mãik'aapa eperãarã at'ãri cheepuruda–e pada perã Jerusalende. 4 Rey Jerusalendepemaarã ome ma Pascua fiesta audú oo k'inia p'anadap'edaa perã, 5 jara pëijida Israeldepemaarã, Berseba p'uurudeepa Dan p'uuru parumaa ichiaba chedamerã. Taarã nùde israelitaarãpa ma fiesta ooda–e paji Ak'õre ley p'ãdade jara bùk'a.6 Mãgá eperãarã pëijida Israel eujã jõmaade mãik'aapa Judá eujã jõmaade reypa ichi ek'ari beerã ome k'art'a p'ãdap'edaa ateedamerã. Ma k'art'ade nãga p'ãjida reypa jaradak'a:
“Israelitaarã, waya ijãapatáatù Tachi Ak'õrede, iru Abraham, Isaac, Israel Ak'õre Waibùa perã. Irude ijãaruta pùrã, irua waya ak'ù bapariit'ee parã, chi Asiriadepema reyrãpa waide jita atapida–ee p'anùùrã. 7 P'ananáatù pãchi chonaarãk'a mãik'aapa pãchi auk'aarãk'a. Ãchia ijãa amaajida ãchi chonaarã Ak'õre Waibùade. Maperã Tachi Ak'õrepa ãchi k'achia beerã juade baaipiji, parãpa unu p'anùk'a. 8 Maperã k'ùùrù k'isua p'ananáatù pãchi chonaarãk'a. Ma k'ãyaara chupùria iidítù Tachi Waibùamaa mãik'aapa chétù iru tede; irua awara bùda tede. Oopatáatù irua oopi bùk'a. Mãga ooruta pùrã, iru k'îrau bada k'îra atuait'ee. 9 Parãpa irude waya ijãaruta pùrã, irua parã k'îra unuamaa iru p'anapataarãmaa k'îsia awara papiit'ee ãrapa pãchi auk'aarã, pãchi warrarã ome chupùria k'awaadamerã mãik'aapa k'ena pëidamerã ãchi chedamerã ãchi temaa. Tachi Ak'õre, parã chonaarã Ak'õre Waibùapa eperãarã chupùria k'awaapari. Irude waya ijãaruta pùrã, parã yiaraa iru ba–e pait'ee.”
10 Ma pëidaarã wãyaajida Efraindeepa uchiadap'edaarã eujãdepema, Manasedeepa uchiadap'edaarã eujãdepema p'uuru bee chaa, Zabulondeepa uchiadap'edaarã eujã parutamaa. Mamîda mãdepemaarã chok'ara ma pëidaarã oo iru p'anajida. Ëijida ma k'art'ade jara bù ûridak'ãri. 11 Mamîda ûk'uru ùmùk'îraarã Aserdeepa uchiadap'edaarãdepema, Manasedeepa uchiadap'edaarãdepema mãik'aapa Zabulondeepa uchiadap'edaarãdepema k'îsia p'ua p'aneejida mãik'aapa wãjida Jerusalendee. 12 Tachi Ak'õrepa ichiaba Judadeepa uchiadap'edaarã k'îsia p'uapiji oo k'inia p'aneedamerã ãchi rey, awaraa poro waibùarãpa jaradap'edaak'a; Tachi Ak'õrepa jarapidak'a mãùrãmaa.
13 Mãgá ma añode atane omeede eperãarã cho–k'ara cheepurujida Jerusalende pan levadura wêe k'opata fiesta oode. 14 Ma fiesta oodai naaweda, Jerusalende p'anadap'edaa altar awaraa ak'õre waibùa apatap'edaa–it'ee, ne–inaa t'ûa bapari paapatamãi paara, ãrik'oojida mãik'aapa bat'ak'oojida Cedrón to chak'e p'oodade.
15 Ewari catorce ma atane omeede Pascua fiestadepema oveja ùmùk'îra k'aipee peejida. P'aareerã awaraa Levideepa uchiadap'edaarã ome t'ãri p'ua p'anadap'edaa perã ãchia p'ek'au k'achia oopatap'edaa k'aurepa, ne–inaa jõma oojida Tachi Ak'õre leyde jara bùk'a oodamerã awara p'aneedait'ee iru k'îrapite. Mãpai ne–animalaarã ateejida Tachi Ak'õre tedee iru–it'ee paa jõpidait'ee. 16 Maap'eda p'ananajida ãchi mimiapatamãi, Tachi Ak'õrepa awara bùda iru mimiapari Moisepa jaradak'a chonaarãweda. Mãpai Levideepa uchiadap'edaarãpa ma ne–animalaarã peedap'edaa waa teejida p'aareerãmaa jîap'edamerã altar ârù. 17 Eperãarã chedap'edaa chok'ara ooda–e pada perã ne–inaa Tachi Ak'õre leyde jara bùk'a awara p'aneedamerã, Levideepa uchiadap'edaarãpa ma ne–animalaarã eperãarãpa aneedap'edaa peejida mãik'aapa teejida ma p'aareerãmaa mãùrã pari. 18 Eperãarã chok'ara p'anajida: Efraindeepa uchiadap'edaarã, Manasedeepa uchiadap'edaarã, Isacardeepa uchiadap'edaarã mãik'aapa Zabulondeepa uchiadap'edaarã. Ma jõmaarãpa k'ojida ma ne–animalaarã peedap'edaa chiara, ooda–e paji mîda ne–inaa jõmaweda Tachi Ak'õre leyde jara bùk'a oodamerã awara p'aneedait'ee iru–it'ee. Mãga ooda–e paji mîda, Ezequiapa ùt'aa t'âji ãchi pari: “Ak'õre Waibùa, pù t'ãri pia bapari perã ãyaa bùpáde aji, na eperãarãpa k'achia oopata, 19 t'ãripa pù jùrùmaa p'anadairã. Tachi Waibùa, tai chonaarã Ak'õre Waibùa, ãrapa ne–inaa jõmaweda ooda–e paji mîda pù leyde jara bùk'a awara p'aneedamerã t'îudait'ee pù tede, ãra pia ak'ùpáde ” aji.
20 Tachi Ak'õrepa Ezequiapa chupùria iidida ûriji. Ma eperãarã ne–inaa k'achia oopatap'edaa ãyaa bùji. 21 Mãgá ewari siete wãyaarude israelitaarã Jerusalende p'aneejida mãik'aapa pan levadura wêe k'opata fiesta t'ãri o–îa oomaa p'aneejida. Mãùmisa p'aareerã Levideepa uchiadap'edaarã ome música chaapachida ne–inaa chaapatade awara bùdap'edaa Tachi Ak'õre tede chaapataadamerã. 22 Mãga bùde rey Ezequiapa pedee pia jaraji ma Levideepa uchiadap'edaarãmaa, ãchi mimia pia oo k'inia p'anadap'edaa perã Tachi Ak'õre–it'ee.
Ma ewari siete wãyaarude ne–animalaarã paajida t'ãri auk'a bùdait'ee Tachi Ak'õre ome. Ma awara irumaa ùt'aa t'âpachida mãik'aapa k'aripachida, iru ãchi chonaarã Ak'õre Waibùa pada perã. 23 Ma ewari siete wãyaap'eda, jõmaarãpa k'îsiajida awaraa ewari sietede fiesta oo p'aneedait'ee. Mãga t'ãri o–îa oojida. 24 Mãga nùde Judadepema rey Ezequiapa ne–animalaarã chok'ara teejida eperãarãmaa paapidamerã; p'ak'a ùmùk'îra mil, siete mil ovejaarã, chivoorã ome. Ma awara ãchi poro waibùarãpa teejida p'ak'a ùmùk'îra mil, diez mil ovejaarã, chivoorã ome. P'aareerã chok'ara oojida Tachi Ak'õre leyde jara bùk'a oopataadamerã Tachi Ak'õre tede mimiadait'ee. 25 Arii p'anadap'edaarã jõmaweda o–îa p'anajida: Judadepemaarã, p'aareerã, Levideepa uchiadap'edaarã, Israeldeepa chedap'edaarã, awaraa eujãdepemaarã chedap'edaa paara. 26 Jerusalendepemaarã audú o–îa p'anajida mãga unuda–e pada perã rey David warra Salomón Israeldepema rey badak'ãriipa. 27 Ma fiesta jõ wãk'ãri, p'aareerã, Levideepa uchiadap'edaarã ome ak'ùnâ p'ananajida eperãarã k'îrapite mãik'aapa ùt'aa t'â p'anùde pedee pia jarajida ma eperãarãmaa. Tachi Ak'õrepa ûriji ichi ùt'ari baparimãiipa.