Judade Ezequías rey pada
(2 Reyes 18.2-3)
29
1 Ezequías veinticinco año iru baji rey beek'ãri. Rey baji Jerusalende veintinueve año wãyaarude. Chi nawe Zacarías k'au paji; t'âjarapatap'edaa Abí. 2 Ezequiapa ne–inaa pia oopachi Tachi Ak'õre k'îrapite. Bapachi chi chonaa David bapariidak'a.3 Ezequías naa año rey bùde naa atanede Tachi Ak'õre tedepema puerta jõmaweda ewapiji mãik'aapa ma puerta chiwidi pùk'a oopiji. 4 Maap'eda t'â pëiji p'aareerã, awaraa Levideepa uchiadap'edaarã ome chip'edaidamerã ma te oriente eerepema patio badamãi. 5 Mama ãramaa mãgaji:
“Levideepa uchiadap'edaarã, ûrítù. Ne–inaa jõma óotù Tachi Ak'õre ley p'ãdade jara bùk'a t'îudait'ee iru tede mãik'aapa iru te pia jarítù pùchideerã aùde mimiapataadamerã. Ne–inaa k'achia jõmaweda ãyaa atátù tachi chonaarã Ak'õre Waibùa tedeepa. 6 Tachi chonaarãpa oodak'aa paji Tachi Ak'õrepa k'inia bùk'a. Ne–inaa k'achia oopachida iru k'îrapite mãik'aapa irude ijãadak'aa paji. Ne–inaa k'achia t'îupijida iru tede iru atabaibëidap'edaa perã. 7 Iru tedepema puerta jâajida; iru lámpara k'îipijida; ne–inaa t'ûa bapari paadak'aa paji mãik'aapa iru–it'ee ne–animalaarã paa jõpidak'aa paji, iru tachi Israeldeepa uchiadap'edaarã Ak'õre Waibùa bù mîda. 8 Mãga oodap'edaa perã, Tachi Ak'õre k'îrau baji Judadepemaarã ome mãik'aapa Jerusalendepemaarã ome. Ãchi atabaibëiji k'achiade baaidamerã. Mãga p'asaji. Ârá jõmaarãpa tachi unupata ek'ariara beerãk'a, juataura wêe p'anùùrãk'a mãik'aapa tachi oo iru p'anù. 9 Ma k'achia oodap'edaa k'aurepa tachi ak'õreerã k'iniijida chõo jõnùde mãik'aapa awaraa eujãdepemaarãpa tachi wêraarã, warrarã, wêra k'aurã ome atadachida ãchi eujãdee ateedait'ee.
10 ’Tachi mãgá k'achiade p'anadairã, mùa pacto oo k'inia bù tachi Israeldeepa uchiadap'edaarã Ak'õre Waibùa ome, iru waa k'îrau banaamerã tachi ome. 11 Mapa, warrarã, k'îra jîp'aa oopataadapáde aji, pãchi mimia, Tachi Ak'õrepa parã jùrùt'erada perã oodamerã irua jara bùk'a mãik'aapa ne–inaa t'ûa bapari paapataadamerã iru–it'ee.”
12 Aramata ma Levideepa uchiadap'edaarãpa oo p'aneejida Ezequiapa jaradak'a. Mãùrã paji: Coatdeepa uchiadap'edaarã Amasay warra Mahat, Azarías warra Joel ome; Merarideepa uchiadap'edaarã Abdí warra Quis, Yalelel warra Azarías ome; Guersondeepa uchiadap'edaarã Zimá warra Joa ome mãik'aapa Joa warra Edén; 13 Elizafandeepa uchiadap'edaarã Simri, Jehiel ome; Asafdeepa uchiadap'edaarã Zacarías, Matanías ome; 14 Hemandeepa uchiadap'edaarã Jehiel, Simí ome; Jedutundeepa uchiadap'edaarã Semaías, Uziel ome. 15 Mimiadai naaweda wãjida ãchideerãmaa mãik'aapa oojida jõmaweda ne–inaa Tachi Ak'õre ley p'ãdade jara bùk'a oodamerã t'îudai naaweda iru tede. Maap'eda ãchi reypa ûraadak'a t'îujida Tachi Ak'õre tede ma te jaridait'ee mãik'aapa awara bùdait'ee iru–it'ee.
16 Mãpai p'aareerã te edajãde t'îujida auk'a oodait'ee. Ne–inaa jõma Tachi Ak'õre tedepema–eeta ãyaa atajida ma tedeepa, te ãuk'idaa bada patiodeepa paara. Maap'eda Levideepa uchiadap'edaarãpa ma net'aa jõmaweda ateejida bat'ak'oodait'ee Cedrón to chak'e p'oodadee. 17 Mãgá Tachi Ak'õre te awara bùjida ma naapema atanede naapema ewaride. Ewari ocho parumaa te ãuk'idaa jõmaweda jari beeji. Awaraa ewari ocho wãyaaru misa, te edajãde jarijida mãik'aapa awara bùjida Tachi Ak'õre–it'ee. Mãgá ma mimia aupajida naapema atanede ewari dieciseide.
18 Maap'eda wãjida rey Ezequiamaa mãik'aapa mãgajida: “Jarijida mãik'aapa awara bùjida Tachi Ak'õre te, aùde nâbù net'aa ome: taawapema altar ne–animalaarã iru–it'ee paa jõpipata, aùde nâbù net'aa ome; te jãdepema mesa pan awara bùda bùpata aùde nâbù net'aa ome. 19 Ichiaba jõmaweda net'aa rey Acazpa bat'ak'ooda ijãaamaa bada perã, jarijida mãik'aapa bùjidada ajida, Tachi Ak'õre altar k'îrapite.”
20 Aù norema tap'edaweda rey Ezequías p'irabaiji mãik'aapa Jerusalendepemaarã poro waibùarã jõmaweda t'â pëiji wãdamerã ichi ome Tachi Ak'õre tedee. 21 Ateejida p'ak'a ùmùk'îra siete, oveja ùmùk'îra siete, oveja ùmùk'îra chak'eerã siete, chivo siete. Ma jõma primiciak'a teejida Tachi Ak'õrepa ãyaa bùmerã Judadepema reyrãpa k'achia oopatap'edaa, iru tede k'achia oopatap'edaa, Judadepemaarã k'achia oopatap'edaa paara. Reypa jaraji p'aareerã, chi Aarondeepa uchiadap'edaarãpa Tachi Ak'õre altarde ma ne–animalaarã iru–it'ee paa jõpidamerã. 22 Mãga oojida. Naapùara ma p'ak'a ùmùk'îra siete peejida mãik'aapa madepema waa p'ejida jîap'edait'ee ma altar ârù. Maap'eda auk'a oojida oveja ùmùk'îraarã ome, oveja chak'eerã ome.
23 Maap'eda ma chivoorã ateejida rey k'îrapite mãik'aapa ma p'uurudepemaarã k'îrapite ãchia jua bùdamerã ma ne–animalaarã ârù. 24 Mãpai ma chivoorã peejida mãik'aapa madepema waa weejida ma altar ârù, Tachi Ak'õrepa israelitaarã p'ek'au k'achia oopatap'edaa ãyaa bùmerã. Ma ne–animalaarã jõmaweda iru–it'ee paa jõpijida israelitaarã jõmaarã pari, ãchi reypa mãga jarada perã.
25 Ezequiapa ichiaba Levideepa uchiadap'edaarã bùji Tachi Ak'õre tede címbalo, salterio, cítara chaapataadamerã, chonaarãwedapemaarã rey David, Ak'õrepa unupida jarapari Gad, mãik'aapa Ak'õre pedee jarapari Natanpa jaradap'edaak'a. Tachi Ak'õrepa jaraji mãga oopataadamerã ichi pedee jarapataarã k'ap'ùa.
26 Ma Levideepa uchiadap'edaarã ak'ùnâ p'anajida ma música chaapata net'aa Davidpa bëida ome mãik'aapa p'aareerãpa trompeta iru p'anajida ãchi juade. 27 Mãpai rey Ezequiapa jaraji ma altarde Tachi Ak'õre–it'ee ne–animalaarã paa jõpidamerã. Paa p'aneedak'ãri, ma música chaapataarã jõmaarãpa chaa p'aneejida mãik'aapa k'aripataarãpa k'ari p'aneejida Tachi Ak'õre–it'ee. 28 Mãùmisa ma p'uurudepemaarã jõmaarã bedabaidachida ak'ùpidait'ee Tachi Ak'õre waawee p'anù. Mãga p'aneejida ma ne–animalaarã jõmaweda iru–it'ee paa jõpirutamaa.
29 Maap'eda rey awaraa poro waibùarã ome auk'a bedabaidachida ùt'aa t'âdait'ee Tachi Ak'õremaa. 30 Maap'eda rey Ezequiapa mãik'aapa awaraa poro waibùarãpa jarajida Levideepa uchiadap'edaarãpa k'aridamerã salmo Davidpa p'ãda, Ak'õrepa unupida jarapari pada Asafpa p'ãda ome. Mãga oojida. T'ãri o–îa k'arijida mãik'aapa ãchi ichiaba bedabaidachida ak'ùpidait'ee Tachi Ak'õrede ijãa p'anù.
31 Maap'eda Ezequiapa mãgaji arii p'anadap'edaarã jõmaarãmaa: “Idi parã awara p'aneejida Tachi Ak'õre–it'ee. Mapa chedapáde aji, ne–animalaarã paapide mãik'aapa primicia teede ak'ùpidait'ee gracias jara k'inia p'anù Tachi Ak'õremaa iru te pari.” Mãpai eperãarãpa aneejida ne–animalaarã paa jõpidait'ee mãik'aapa awaraa primicia Tachi Ak'õre–it'ee, t'ãripa ãchia tee k'inia p'anadap'edaa. 32 Aneejida p'ak'a ùmùk'îra setenta, oveja ùmùk'îra cien, oveja ùmùk'îra chak'eerã doscientos. Ma jõmaweda Tachi Ak'õre–it'ee paa jõpijida. 33 Ma ne–animalaarã jõmaweda seiscientos p'ak'a ùmùk'îra mãik'aapa tres mil ovejaarã, chivoorã ome paji. 34 P'aareerã chok'ara–ee p'anadap'edaa perã, ma ne–animalaarã jõmaweda p'oyaa peeda–e paji ãchi juadoopa. Mapa awaraa Levideepa uchiadap'edaarãpa ãra k'aripajida, chi p'aareerãpa waide ooda–e p'anadap'edaarãpa Tachi Ak'õre ley p'ãdade jara bùk'a oorutamaa. Ma Levideepa uchiadap'edaarãpa p'aareerã k'ãyaara ma ne–inaa jõmaweda piara oojida. 35 Ne–animalaarã cho–k'ara Tachi Ak'õre–it'ee paa jõjida awaraa ne–animalaarã netraa ome mãik'aapa ne–inaa topata eperãarãpa tee chedap'edaa ome.