Judade Acaz rey pada
(2 Reyes 16.1-20)
28
1 Jotán warra Acaz veinte año iru baji rey beek'ãri. Rey paji Jerusalende dieciséis año wãyaarude. Mamîda Acazpa oo–e paji ichi chonaa Davidpa oopariidak'a. Ma k'ãyaara ne–inaa k'achia oopachi Tachi Ak'õre k'îrapite. 2 Oopachi Israeldepema reyrãpa oopatap'edaak'a. Mãùrã ak'õre waibùa Baal apatap'edaa k'îrak'a bù oopiji metaldee. 3 Ma awara Baal–it'ee ne–animalaarã paapachi eujã jewedaa Ben Hinonde. Chi warrarã ichiaba paa peeji ma ak'õre waibùa apatap'edaa–it'ee ma eujãde naawedapema p'anapatap'edaarãpa oopatap'edaak'a. Ma k'aurépata Tachi Ak'õrepa mãùrã jërek'ooji ma eujãdeepa israelitaarã naa. 4 Ma awara Acazpa ne–animalaarã peep'eda, paapachi mãik'aapa ne–inaa t'ûa bapari paapachi ijãadak'aa beerã ùt'aa t'âpata tede ee nok'ode, ne–uu k'ãide mãik'aapa pak'uru jua–idaa ek'ari p'anadap'edaa ijãadak'aa beerãpa oopatap'edaak'a.5 Mãgá ne–inaa k'achia ooda perã Tachi Ak'õrepa siriorã pëiji jura chõode iru eere p'anadap'edaarã ome. Ma siriorãpa Judadepemaarã p'oyaajida. Eperãarã chok'ara p'e ateejida ãchi p'uuru waibùa Damascodee. Ichiaba Tachi Ak'õrepa Judadepemaarã p'oyaapiji israelitaarãmaa. Mãgá Acaz beeji Israeldepemaarã juade. 6 Mãga nùde Israeldepema Remalías warra Pecajpa Judá eujãde chep'eda ichi soldaorã ome, ewari abaade Judadepema ùmùk'îraarã sõcharra beerã ciento veinte mil peejida. Tachi Ak'õrepa mãga oopiji ma Judadepemaarãpa irude ijãa amaadap'edaa perã, iru ãchi chonaarã Ak'õre Waibùa paji mîda. 7 Ma chõo jõnùde Efraindeepa uchiada soldao Zicripa rey warra Maseías peeji, rey palacio ak'ùpataarã poro waibùa, Azricán ome mãik'aapa rey ek'ari beerã poro waibùa Elcaná ome. 8 Ma awara Israeldepema soldaorãpa atadachida doscientos mil wêraarã, warrarã, wêra k'aurã paara ateedait'ee Samaria p'uurudee, net'aa waibùa jãri atadap'edaa ome.
9 Mãgá ãchi eujãdee ãpùtee wãdade, Tachi Ak'õre pedee jarapari Oded uchiaji ãchi ome k'îra chuude Samaria p'uurude panadai naaweda. Odedpa mãgaji:
—Tachi Ak'õre, parã chonaarã Ak'õre Waibùa k'îrau baji Judadepemaarã ome. Maperãpù ãchi p'oyaapiji parãmaa. Mamîda irua unuji parãpa ãchi maarepida chupùria k'awaada–e paji. 10 Ma awara parãpa k'îsia iru p'anù na Judadepemaarã, Jerusalendepemaarã ome ateedait'ee mãik'aapa pãchi esclavoorã papidait'ee. ¿K'îsia p'anùk'ã aji, paråpata ne–inaa k'achia ooda–ee parã Ak'õre Waibùa k'îrapite? 11 Mùa jararu ûridapáde aji. Atéetù na eperãarã ãchi eujãdee, ãra parã auk'aarã perã. ¡Tachi Ak'õre audú k'îrau bù parã ome, mãgá pãchi auk'aarã atadap'edaa perã!
12 Mãpai Efraindeepa uchiadap'edaarã ëreerãdepemaarã poro waibùarã ûk'uru ma Israeldepema soldaorã k'îrapite ak'ùnâ p'ananajida. Mãùrã paji: Johanán warra Azarías, Mesilemot warra Berequías, Salún warra Ezequías, Hadlay warra Amasá ome. 13 Mãùrãpa mãgajida ma soldaorãmaa:
—Namaa aneenaadapáde ajida, jã eperãarã parãpa atadap'edaa Judá eujãde chõo jõnùde. Aneeruta pùrã, tachi jõmaarã baaipidait'ee Tachi Ak'õre juade. Tachia audú ne–inaa k'achia oo p'anùta, ¿sãgá audupùara k'achia oodayama? ajida. Waa Tachi Ak'õremaa k'îraupinaadapáde ajida.
14 Mãga ûridak'ãri, ma Israeldepema soldaorãpa eperãarã ãchia atadap'edaarã k'ena pëijida. Eperãarã k'îrapite mãik'aapa ãchi poro waibùarã k'îrapite aneejida net'aa jãri atadap'edaa Judade chõo jõnùde. 15 Maap'eda ma Efraindeepa uchiadap'edaarã ëreerãdepemaarã poro waibùarãpa ûk'uru bùjida ma eperãarã k'aripadamerã. Net'aa jãri atadap'edaadepema p'aru, chancla ome atajida teedait'ee chi ãk'adaa nipadap'edaarãmaa. Ichiaba chik'o teejida nek'odamerã mãik'aapa ne–inaa teejida todamerã. Ãra t'ãide k'ayaa p'anadap'edaarã p'ua oodap'edaamãi aceite p'urujida. Mãpai burro ârù chi p'oyaa t'ùadak'aa p'anadap'edaarã ateejida Jericó, palma–idaa apatap'edaa, p'uurudee. Mama atabëijida ãchideerã ome. Maap'eda ãpùtee wãjida Samaria p'uurudee.
16 Maapai rey Acazpa ichi ek'ari beerã pëiji Asiriadepemaarã reymaa k'aripa iidide. 17 Mãga ooji Edom pidaarã chõo chedap'edaa perã Judade mãik'aapa eperãarã ûk'uru atadap'edaa perã ateedait'ee ãchi eujãdee. 18 Ma awara filisteorã chõo chejida eujã jewedaade p'anadap'edaa p'uurude mãik'aapa Néguev eujãde, ma eujã Judadepemaarã jua ek'ari bada. Ma chõo jõnùde ma filisteorãpa p'oyaajida nãgà p'uuru: Bet Semes, Ayalón, Guederot, Soco, Timná, Guimzó ma ik'aawa p'uuru k'aipee bee ome. Maap'eda filisteorã ma p'uurude p'anapachida. 19 Tachi Ak'õrepa mãga p'asapiji Judadepema rey Acaz irude ijãaamaa bada perã mãik'aapa Judadepemaarã k'achiade baaipida perã.
20 Asiriadepema rey Tiglat Pileserpa Acaz k'aripa cheji mîda, impuesto waibùa p'aapiji Acazmaa. 21 Maperã Acazpa ne–inaa pia jõmaweda ataji Tachi Ak'õre tedeepa mãik'aapa ichi rey palaciodeepa, ichia ek'ari beerã tedeepa paara teeit'ee ma Asiriadepema reymaa. Mamîda irua Acaz maarepida k'aripa–e paji. 22 Acaz mãgá nepùrade baji mîda, Tachi Ak'õremaa chupùria iidi–e paji. 23 Ma k'ãyaara ùt'aa t'âpachi ma ne–inaa juapa oopida k'îrapite. Ne–animalaarã paapachi Damascodepema ak'õre waibùa apatap'edaa–it'ee, ma k'aurepa Tachi Ak'õrepa iru k'achiade baaipiji mîda. Acazpa k'îsiaji ma ak'õre waibùa apatap'edaarãpa Siriadepemaarã reyrã k'aripajida mãik'aapa k'îsiaji mãùrãpa iru auk'a k'aripadai ne–animalaarã paaru misa ãchi–it'ee. Mamîda mãùrã k'aurépata iru, jõmaarã Israelde p'anapatap'edaarã paara k'achiade p'aneejida. 24 Mãga nùde Acazpa Tachi Ak'õre tedepema net'aa p'e atap'eda, ãrik'ooji. Ma tedepema puerta jõmaweda jâaji mãik'aapa jaraji altar oodamerã Jerusalén p'uuru jõmaade ma ak'õre waibùa apatap'edaa–it'ee. 25 Mãùrãmaa ùt'aa t'âpata te oopiji Judadepema p'uuru bee chaa, Judadepemaarãpa ne–inaa t'ûa bapari paadamerã mãùrã k'îrapite. Maperã Tachi Ak'õre, Acaz chonaarã Ak'õre Waibùa, k'îrau beeji iru ome.