Judade Jotán rey pada
(2 Reyes 15.33-38)
27
1 Uzías warra Jotanpa veinticinco año iru baji rey beek'ãri Judade. Rey baji dieciséis año wãyaarude mãik'aapa Jerusalende bapachi. Jotán nawe Sadoc k'au paji; t'âjarapatap'edaa Jerusa. 2 Jotanpa ne–inaa pia oopachi Tachi Ak'õre k'îrapite chi ak'õre Uziapa oopariidak'a. Mamîda Jotán t'îu–e paji Tachi Ak'õre tede. Mãgá ne–inaa pia oopachi mîda, Judadepemaarãpa ne–inaa k'achia oopachida Tachi Ak'õre k'îrapite. 3 Jotán rey bùde Tachi Ak'õre tedepema Ùt'aripema Puerta apatap'edaa chiwidi oopiji. Ichiaba Ofel muralla chiwidi oopiji. 4 P'uuru chiwidi oopiji Judá eujãdepema ee jêra bùde mãik'aapa soldaorã p'uuru torre ome oopiji pak'uru jêra bùmãi.5 Jura chõoji amonitaarã ome mãik'aapa ãra p'oyaaji. Ma añodeepa amonitaarãpa irumaa impuesto p'aa p'aneejida; tres mil trescientos kilo p'arat'a, dos millón doscientos litro trigo tau mãik'aapa cebada tau awara. Año chaa ma chok'ara p'aajida año õpee wãyaaru misa.
6 Jotán rey waibùa paji ne–inaa pia oopachi perã Tachi Ak'õre k'îrapite.
7 Awaraa ne–inaa Jotanpa ooda, jura chõoda mãik'aapa ichi bapariida p'ã bù libro Judadepema mãik'aapa Israeldepema reyrãpa oopatap'edaade. 8 Jotán veinticinco año iru baji rey beek'ãri. Jerusalende bapachi dieciséis año wãyaarude. 9 Jotán jai–idaak'ãri, ùajida David p'uurude. Chi warra Acaz rey beeji iru pari.