Judade Uzías rey pada
(2 Reyes 14.21-22; 15.1-7)
26
1 Judadepemaarãpa Amasías warra Uzías rey bùjida iru pari. Uzías año dieciséis iru baji rey beek'ãri. 2 Chi ak'õre piuda t'êepai, Uziapa Elat p'uuru chiwidi oopiji, ma p'uuru waya bùp'eda Judadeepa uchiadap'edaarã jua ek'ari.3 Uzías dieciséis año iru baji rey beek'ãri. Rey baji cincuenta y dos año wãyaaru misa mãik'aapa bapachi chi nawe Jecolías t'oda p'uuru Jerusalende. 4 Uziapa ne–inaa pia oopachi Tachi Ak'õre k'îrapite, chi ak'õre Amasiapa oopariidak'a. 5 P'aare Zacarías chok'ai bùde ichia Ak'õre ûraa jarateeji Uziamaa. Mãgá Tachi Ak'õrede ijãa bù misa, Ak'õrepa iru pia ak'ù bapachi.
6 Uzías rey bùde jura chõoji filisteorã ome. Ma chõo jõnùde muralla Gat, Jabnia, Asdod p'uurude t'ùak'au bada ãrik'oojida. Mãpai p'uuru chiwidi oopiji Asdod k'ait'a, filisteorã t'ãide. 7 Tachi Ak'õrepa k'aripaji Uzías eere p'anadap'edaarãpa p'oyaadamerã filisteorã, Arabia pidaarã Gur Baalde p'anapatap'edaa, meunita pidaarã ome. 8 Maapai amonitaarãpa impuesto p'aapachida Uziamaa. Awaraa eujãdepemaarã mãgá p'oyaada perã, jõmaarãpa Uzías t'o p'anajida Egipto eujãde parumaa.
9 Uziapa ichiaba torre oopiji Jerusalén p'uurude t'ùak'au bada murallade: Puerta de Esquina ârù, Puerta de Valle ârù mãik'aapa muralla p'ùrrabai badamãi. Ma torredeepa soldaorãpa jâapachida. 10 Torre ichiaba oopiji pania wêe bù eujãde, madeepa eujã jâapataadamerã. Ichiaba eujã jewedaade, eede paara irua p'ak'aarã chok'ara iru bada perã, pozo chok'ara k'oro atapiji. Ma awara mimiapataarã chok'ara iru baji mimiapataadamerã ichi ne–uude mãik'aapa uva k'ãide, ne–uui awaa bada perã.
11 Uziapa soldaorã chok'ara iru baji ichi jua ek'ari. Pia jarateeji soldaorã chip'edap'edaarã aba–abaa uchiadamerã chõode. Ma soldaorã chip'epiji reypa oopata p'ãpari Jehielpa ãchi t'â p'ãdak'a. Rey ak'ùpari Maseiapa mãik'aapa soldaorã poro waibùa Jananiapa k'aripajida ma soldaorã mãgá p'edait'ee. 12 Te pidaarã poro waibùarã soldaorã mimia oopatap'edaa dos mil seiscientos paji. Sõcharra, chõo k'awaa p'anajida. 13 Uziapa trescientos siete mil quinientos soldaorã iru baji ichi jua ek'ari. Mãùrã ome pia chõoji ichi k'îra unuamaa iru p'anadap'edaarã ome. 14 Ichi soldaorã–it'ee Uziapa nãgee ne–inaa oopiji: escudo, miasu, casco, p'aru hierrodee ooda, ematrùma, mãu bat'apari jâk'ara. 15 Ichiaba ne–inaa mãu choma bat'apari, sia bat'apari oopiji bùdamerã ma torrede mãik'aapa awara ãi Jerusalén t'ùak'au bada muralla ârù. Ma jõma ooda perã, jõmaarãpa Uzías t'o p'anajida. Tachi Ak'õrepa iru k'aripa bada perã, awaraa reyrã k'ãyaara waibùara paji.
16 Mamîda mãgá awaraarã k'ãyaara waibùara pak'ãri, Uzías audua beeji. Ma k'aurepa k'achiade baaiji. Oo–e paji Tachi Ak'õrepa jaradak'a ichi ûraade jarak'ãri p'aareerãpapai ne–inaa t'ûa bapari paadaipia bù ichi te jãdepema altar k'îrapite. Uziapa mãga ooji ichi juadoopa. 17 Mamîda mãga oo bù misa, p'aareerã poro waibùa Azarías t'îuji Ak'õre tede ochenta p'aareerã sõcharrara beerã ome. 18 Mãùrãpa reymaa mãgajida: “Rey Uzías, pùa ne–inaa t'ûa bapari paaik'araa bùda ajida, Tachi Ak'õre k'îrapite, ma mimia Aarondeepa uchiadap'edaa p'aareerã mimia perã. Ma–it'ee Tachi Ak'õrepa tai awara bùji. Maperã na tedeepa wãpáde aji. Ne–inaa pia–ee oomaa bùda ajida, Tachi Ak'õre k'îrapite.”
19 Mãga nùde Uziapa brasero iru baji ichi juade. Ma p'aareerãpa jara p'anù ûrik'ãri, k'îraudachi. Aweda Tachi Ak'õre tede ma altar k'aipee k'îrapite mãik'aapa ma p'aareerã k'îrapite lepra k'ayaa uchiaji rey Uzías tau bùùrùde. 20 P'aareerã poro waibùa Azarías apemaarã ome mãga unudak'ãri, iru jãmãik'aapa isapai ateejida. Ichi paara wã k'inia baji k'awa bada perã Tachi Ak'õrepa ichi miapimaa bù.
21 Mãgá rey Uzías lepra k'ayaapa k'ayaa beeji ichi piurumaa. Ma k'ayaa k'aurepa ituaba bapachi ichi tede mãik'aapa waa t'îupida–e paji Tachi Ak'õre tede. Ichi warra Jotán rey mimia oopachi iru pari.