Judade Amasías rey pada
(2 Reyes 14.1-20)
25
1 Amasías veinticinco año iru baji rey beek'ãri. Rey baji veintinueve año wãyaarude mãik'aapa Jerusalén p'uurude bapachi. Chi nawe Joadán Jerusalendepema paji. 2 Rey Amasiapa ne–inaa pia oopachi Tachi Ak'õre k'îrapite. Mamîda t'ãripa mãga oo–e paji. 3 Amasías rey taarã bak'ãri, jõmaweda poro waibùarã chi ak'õre peedap'edaarã peepiji. 4 Mamîda mãùrã warrarã peepi–e paji Tachi Ak'õre ley p'ãdade Moisepa nãga jara bairã: “Eperã ak'õreerã peedaik'araa bù ãchi warrapa ne–inaa k'achia ooda k'aurepa. Ichiaba warrarã peedaik'araa bù ãchi ak'õreerãpa ne–inaa k'achia oodap'edaa k'aurepa. Eperã chaachaa piuipia bù ichia ne–inaa k'achia ooda k'aurepa; mãgee ne–inaa ooda k'aurepa mùa jarada peedamerã.”5 Amasías rey bùde jõmaweda Judadeepa uchiadap'edaarã mãik'aapa Benjamindeepa uchiadap'edaarã ùmùk'îraarã p'e ataji. Te pidaarã chaa bùji soldaorã poro waibùa jua ek'ari. Mãpai chi ùmùk'îraarã veinte año ùt'aa iru p'anù juasiapiji. Mãgá ichi–it'ee soldaorã jùrùt'era wãji. Trescientos mil uchiajida soldaorã mimia–it'ee; chõo k'awaa miasu ome, escudo ome. 6 Ma awara Amasiapa tres mil trescientos kilo p'arat'a p'aaji Israeldepema soldaorã pia chõo k'awaa beerã cien mil ichi jua ek'ari mimiapataadamerã.
7 Mamîda ma t'êepai Tachi Ak'õre pedee jarapari panaji Amasías k'îrapite mãik'aapa mãgaji:
—Rey Waibùa, Israeldepema soldaorã nipapinaapáde aji, Judadepema soldaorã ome. Tachi Ak'õrepa israelitaarã, ma Efraindeepa uchiadap'edaarã k'aripak'aa. 8 Pùa mãùrã auk'a ateeru pùrã jura chõonak'ãri, Tachi Ak'õrepa p'oyaapiit'ee pù k'îra unuamaa iru p'anapataarãmaa. Tachi Ak'õrepa p'oyaapii irua p'oyaapi k'inia bùùrãmaa mãik'aapa atuapii irua atuapi k'inia bùùrãmaa.
9 Mãga ûrik'ãri, rey Amasiapa ma Ak'õre pedee jaraparimaa iidiji:
—Mãgara ¿sãgá waya atayama aji, ma p'arat'a tres mil trescientos kilo teeda Israeldepema soldaorã pari?
Ma Ak'õre pedee jaraparipa p'anauji:
—Tachi Waibùapa ma k'ãyaara waapùara pùmaa teeyada aji, ooru pùrã irua k'inia bùk'a.
10 Mãpai Amasiapa ma Israeldepema soldaorã t'â pëip'eda, ãpùtee pëiji Efraindeepa uchiadap'edaarã eujãdee. Mamîda irua mãga ooda perã, ãchi t'ãri ãrii p'aneejida iru ome mãik'aapa Judadepemaarã ome. K'îrau wãjida ãchi temaa.
11 Ma t'êepai Amasías sõcharra bap'eda, ichi soldaorã ateeji Valle de Salde jura chõode Seír eujãdepemaarã ome. Ma chõo jõnùde Seirdepemaarã diez mil peejida. 12 Ma awara Amasías eere p'anadap'edaarãpa awaraa diez mil chok'ai jita atajida mãik'aapa ateejida ee mãu–idaa nok'odee. Mamãik'aapa mãùrã bat'ak'oojida piuk'oodamerã.
13 Mãùmisa ma Israeldepema soldaorã pëida ãchi eujãde chõo chejida Judá eujãde. Samaria p'uurudeepa Bet Jorón p'uuru parumaa Judadepema p'uurudepemaarã p'oyaa wãjida. Eperãarã õpee mil peejida mãik'aapa net'aa waibùa jãri atajida.
14 Amasiapa Edom eujãdepemaarã p'oyaap'eda, ãpùtee cheji. Mamîda Seirdepemaarã ak'õre waibùa apatap'edaa k'îrak'a bù aneeji mãik'aapa ùt'aa t'â beeji ma k'îrapite. Ichiaba ne–inaa t'ûa bapari paaji ma k'îrapite. 15 Maperã Tachi Ak'õre k'îrau beeji Amasías ome. Iru pedee jarapari pëiji Amasiamaa nãga jarade:
—¿Sãap'eda pùa atajima ma eujãdepemaarã ak'õre waibùa apatap'edaa k'îrak'a bù? Pù ome ãrapa p'oyaada–e paji. ¿Wãara–ek'ã? P'oyaada–e paji ãchi ak'õre waibùa apata pù Ak'õre Waibùa k'ãyaara ek'ariara p'anadairã.
16 Mamîda ma Ak'õre pedee jaraparipa mãga jarak'ãri, rey Amasiapa p'anauji:
—¿K'aipa pù rey ûraapari bùjima? aji. ¡Jãgapaipù! ¡Waa pedeenaapáde aji, maa–e pùrã pù piuit'ee!
Mapa ma Ak'õre pedee jaraparipa waa jara–e paji Ak'õrepa jarapida. Mamîda wãi naaweda, mãgaji:
—Mùa k'awa bùda aji, Tachi Ak'õrepa pù jõpiit'ee, mù ûraa ûriamaa bairã.
17 Ma t'êepai Judadepema rey Amasiapa awaraarã ûraa ijãap'eda, nãga jara pëiji Israeldepema rey Jehú ãichak'e, Joacaz warra Joamaa: “Chepáde aji, tachi omé k'îrapite pedeedait'ee.”
18 Mamîda Israeldepema rey Joapa nãga jara pëiji: “Libanodepema cardo pak'uru jep'edaa ne–ùùrù–idaa bùpa jara pëiji cedro pak'uru pia bùmaa: ‘Mù warramaa pù k'au teepáde aji, miak'ãidamerã’. Mamîda t'êepai Libanodepema ne–animal k'achia beerãpa ma cardo ârù t'ùanajida. 19 Mùa k'awa bùda aji, pùa Edom pidaarã p'oyaada. Maperãpù audua ni. Mamîda pùchi tede beeipia bù mù ome t'îuru pùrã, k'achiade baaiit'ee perã; pù, Judadepemaarã pù jua ek'ari p'anù paara.”
20 Amasiapa Edomdepemaarã ak'õre waibùa apatap'edaade ijãa beeda perã, Tachi Ak'õrepa k'îsia iru baji iru baaipiit'ee iru k'îra unuamaa iru p'anadap'edaarã juade. Mapa Amasiapa Joás pedee ûriamaa baji. 21 Maperã Israeldepema rey Joapa ichi soldaorã p'e atap'eda, wãji Amasías ichi eere p'anadap'edaarã ome chõode. Unujida Bet Semes p'uurude Judá eujãde. 22 Ma ewate israelitaarãpa Judá pidaarã p'oyaajida. Mãpai Judadepemaarã ãchi te chaa jîchoo wãjida. 23 Ma Bet Semede chõo p'anùde Israeldepema rey Joapa Judadepema rey Amasías, Joás warra mãik'aapa Joacaz ãichak'e, jita ataji. Maap'eda wãji Jerusalén p'uurudee. Ma p'uuru t'ùak'au bada muralla ãripiji Puerta de Efraín apatap'edaadeepa Puerta de la Esquina apatap'edaa parumaa. 24 Ma awara jãri ata wãji nêe, p'arat'a, net'aa pi–ia Tachi Ak'õre tede ùa bada, Obed Edom jua ek'ari bada. Mãpai palaciode net'aa pia jãri atap'eda mãik'aapa eperãarã ûk'uru jita atap'eda, ãpùtee wãji Samaria p'uurudee.
25 Israeldepema rey Joacaz warra Joás piup'eda, Judadepema rey Amasías quince año waapùara bapachi. 26 Awaraa ne–inaa Amasiapa ooda rey beedak'ãriipa piurumaa p'ã bù Judadepema mãik'aapa Israeldepema reyrãpa oodap'edaa librode. 27 Amasiapa Tachi Ak'õrede ijãa amaa beedak'ãriipa Jerusalén p'uurude ûk'uru eperãarãpa pedeeteejida iru peedait'ee. Mãga k'awaa atak'ãri, Amasías wãji Laquis p'uurudee. Mamîda iru t'êe wãjida mãik'aapa mama peejida. 28 Maap'eda iru k'ap'ùa piuda caballo ârù bataudap'eda, Jerusalendee ateejida. Mama ùajida iru chonaarã ùadap'edaamãi David p'uurude.