Judade Joás rey pada
(2 Reyes 12.1-16)
24
1 Joás rey beek'ãri, siete año iru baji. Joás Judadepema rey paji cuarenta año wãyaarude. Jerusalén p'uurude bapachi. Chi nawe Berseba p'uurudepema t'âjarapatap'edaa Sibia paji. 2 P'aare Joiadá chok'ai bù misa, rey Joapa ne–inaa pia oopachi Tachi Ak'õre k'îrapite. 3 Joyadapa wêra omé jùrùteeji/jùrùt'eraji* rey Joas–it'ee. Ma wêraarã ome warrarã mãik'aapa k'aurã ooji.4 Taarã pak'ãri, Joapa k'îsiaji Tachi Ak'õre te chiwidi pùk'a oopiit'ee. 5 Ma–it'ee t'â pëiji p'aareerã awaraa Levideepa uchiadap'edaarã ome chip'edaidamerã. Ãramaa mãgaji: “P'edapáde aji, eperã chaachaa p'arat'a p'aapipata impuestok'a, awaraa p'arat'a tee chepata ome primiciak'a. Maap'eda jaradapáde aji, año chaa Tachi Ak'õre te ak'ùpataarãpa chi te chiwidi pùk'a oodamerã. Âraweda mãga oodapáde” aji.
Mamîda mãgaweda Levideepa uchiadap'edaarãpa mãga ooda–e paji. 6 Mapa Joapa ma p'aareerã t'â pëiji ãchi poro waibùa Joiadá ome mãik'aapa iidiji ãchimaa:
—¿Sãap'eda parãpa waide Tachi Ak'õre te chiwidi pùk'a oopida–ema? aji. ¿Sãap'eda Levideepa uchiadap'edaarã pëida–e pajima Judá eujãdepema p'uurude mãik'aapa Jerusalende primicia p'e atadamerã Tachi Ak'õre te–it'ee, Moisés, Tachi Ak'õre mimiaparipa mãik'aapa israelitaarã poro waibùarãpa jaradap'edaak'a Tachi Ak'õre ome unupata te–it'ee?
7 Aù naaweda reina Atalía warrarãpa Tachi Ak'õre tede t'îudap'eda, aùde bada net'aa awara bùdap'edaa Tachi Ak'õre–it'ee ateejida teedait'ee ãchi ak'õre waibùa apata Baalmaa. 8 Maperã rey Joapa jaraji ma Levideepa uchiadap'edaarãpa p'arat'a p'epari baalte bùdamerã Tachi Ak'õre tedepema puerta k'ait'a. 9 Ma t'êepai jara pëiji jõma Jerusalén p'uurudepemaarãpa mãik'aapa Judá eujãdepemaarãpa p'arat'a aneedamerã teedait'ee Tachi Ak'õremaa, iru mimiapari Moisepa jaradak'a israelitaarã at'ãri wãyaa p'anù misa eujã pania wêe bùde.
10 Mãga ûridak'ãri, Judadepema p'uuru pidaarã jõmaarã ãchi poro waibùarã paara o–îa p'arat'a aneejida bùdait'ee ma baaltede mãik'aapa ipurut'aajida. 11 T'êepai Levideepa uchiadap'edaarãpa ma baalte ateejida rey ek'ari beerãmaa, ak'ùdamerã. P'arat'a waibùa ma baaltede unudak'ãri, rey secretariopa mãik'aapa p'aareerã poro waibùapa pëidapa ma baaltede bada jita atajida. Maap'eda chi baalte waya bùnajida chi badamãi puerta k'ait'a. Ewari chaa mãga oopachida p'arat'a waibùa iru p'anarutamaa. 12 Mãpai rey Joás p'aareerã poro waibùa Joiadá ome ma p'arat'a teejida chi Tachi Ak'õre te chiwidi pùk'a oopidap'edaarãmaa. Mãpai ma mimia–it'ee ãrapa jùrùjida mãu sî k'awaa p'anapatap'edaarã, ne–inaa pak'urudee oo k'awaa p'anapatap'edaarã mãik'aapa ne–inaa hierrodee maa–e pùrã broncedee oo k'awaa p'anapatap'edaarã.
13 Ma mimia poro waibùarãpa mimia pi–ia oopijida, Tachi Ak'õre te waya pi–ia beerumaa, naaweda badak'a. 14 Ma mimia aupadak'ãri, chi p'arat'a beeda ateejida reymaa mãik'aapa p'aareerã poro waibùa Joyadamaa. Mãpai ãrapa net'aa neto atajida ma tede iru p'anadait'ee; nãgee net'aa usaadap'edaa ma tede mimia oo p'anadak'ãri mãik'aapa net'aa usaadap'edaa ne–animalaarã peedak'ãri Tachi Ak'õre–it'ee paa jõpidait'ee: k'usarra mãik'aapa taza nêedee ooda maa–e pùrã p'arat'adee ooda.
Joiadá chok'ai bù misa, ewari chaa Tachi Ak'õre tede ne–animalaarã peepachida iru–it'ee paa jõpidait'ee.
15 P'aare Joiadá chonaa pak'ãri, jai–idaaji. Ciento treinta año iru baji jai–idaak'ãri. 16 Ùajida Judadepema reyrã ùadap'edaamãi David p'uurude, Joyadapa Tachi Ak'õre tede pia mimiapachi perã Tachi Ak'õre–it'ee mãik'aapa israelitaarã–it'ee.
Rey Joapa ne–inaa k'achia ooda
17 Joiadá jai–idaap'eda, Joás rey bùde Judá eujãde, ûk'uru Judadepemaarã poro waibùarã rey Joamaa chejida mãik'aapa ûraajida ãchik'a k'îsiamerã. 18 Mapa Judadepemaarã waa ùt'aa t'âda–e paji ãchi chonaarã Ak'õre Waibùamaa iru tede. Ma k'ãyaara ùt'aa t'âpachida nawe waibùa Aserá apatap'edaa k'îrak'a bù k'îrapite mãik'aapa awaraa ak'õre waibùa apatap'edaa k'îrak'a bee k'îrapite. Mãga oo p'anadap'edaa perã, Tachi Ak'õre k'îrau beeji Judadepemaarã ome mãik'aapa Jerusalendepemaarã ome. 19 Tachi Ak'õrepa ichi pedee jarapataarã ãramaa pëiji mîda irude waya ijãa p'aneedamerã, iru pedee ûridaamaa p'anapachida.
20 Maperã Tachi Ak'õrepa ichi Jaure pëiji p'aare piuda Joiadá warra, Zacariamaa. Mãgá Zacarías ak'ùnâ banap'eda eperãarã see nâbadamãi, mãgaji: “Tachi Ak'õrepa nãga jara bù: ‘¿Sãap'eda parãpa oo k'iniada–e p'anù mùa jara bùk'a? ¿Sãap'eda pãchi itu k'achiade baaipirutama? ¡Parãpa mù atabaibëiruta perã, mùa jida parã atabaibëiit'eeda!” aji.
21 Mãga ûridak'ãri, ma Judadepemaarã arii p'anadap'edaarã Joiadá warra Zacarías ârù wãjida. Reypa jaradak'a mãupa bat'a peejida Tachi Ak'õre te ãuk'idaa bada patiode. 22 Zacarías ak'õre Joiadá chok'ai bùde rey Joás pia ak'ùpachi mãik'aapa irumaa Ak'õre net'aa pia jarateepachi. Mamîda Joapa iru warra Zacarías peepiji. Piu wãde Zacariapa mãgaji: “¡Mùa k'inia bùda aji, Tachi Ak'õrepa pùmaa auk'a k'achia oomerã!”
23 Año abaa parumaa Siria eujãdepema soldaorã chõo chejida Joás ome. Judá eujãde t'îudap'eda, Jerusalén p'oyaajida mãik'aapa Judadepemaarã poro waibùarã peek'oojida. Ichiaba net'aa chok'ara jãri atajida ateedait'ee ãchi reymaa Damasco p'uurude. 24 Ma Siria eujãdepema soldaorã chok'ara–ee p'anajida mîda, Tachi Ak'õrepa Judadepemaarã ãramaa p'oyaapiji, Judadepema soldaorã chok'araara p'anajida mîda. Mãga ooji Judadepemaarãpa irude ijãa amaa p'anadap'edaa perã, iru ãchi chonaarã Ak'õre Waibùa baji mîda. Mãgá Ak'õrepa Joás k'achia ooji.
25 Chõo jõnùde ma Siriadepemaarãpa rey Joás siapa trùt'aajida. Maperã ãyaa wãdak'ãri, iru juak'aya beeji. Mãgá ichi camade bùde ichi mimiapataarãpa iru peet'aajida p'aare Joiadá warra peet'aada perã. T'êepai ùajida David p'uurude. Mamîda apema Judadepema reyrã k'ait'a ùada–e paji, irua ne–inaa k'achia ooda perã Tachi Ak'õre k'îrapite. 26 Joás peedap'edaarã nãgùùrã paji: Amondepema wêra Simat warra Zabad mãik'aapa Moabdepema wêra Simrit warra Jozabad.
27 Rey Joás warrarã, Ak'õre pedee jarapataarãpa irudé jaradap'edaa mãik'aapa irua Tachi Ak'õre te chiwidi pùk'a oopida; ma jõmaweda p'ã iru p'anù awaraarã reyrãpa ne–inaa oodap'edaa librode. Joás warra Amasías rey beeji chi ak'õre pari.