23
1 Atalía año siete reina bùde p'aare Joyadapa jara pëiji chip'edaidamerã nãgà soldaorã poro waibùarã: Jeroán warra Azarías, Johanán warra Ismael, Obed warra Azarías, Adaías warra Maseías mãik'aapa Zicrí warra Elisafat. 2 Mãùrã p'uuru bee chaa wãjida jarade Levideepa uchiadap'edaarã mãik'aapa israelitaarã poro waibùarã wãdamerã Jerusalén p'uurudee. 3 Ma jõmaarã Tachi Ak'õre tede chip'edaidak'ãri, pacto oojida Joás rey bùdait'ee.P'aare Joyadapa ãramaa mãgaji: “Nama iru p'anùda aji, rey warra. Tachi Ak'õrepa jaradak'a rey Davidmaa nãgà rey paipia bù chi awela k'ãyaara. 4 Nãga oodapáde aji. Âipata ewari esa–auk'a pait'ee parã Levideepa uchiadap'edaarã p'aareerã ome na tedepema puerta jâadait'ee. 5 Awaraa esa–auk'a pait'ee rey palaciodepema puerta jâadait'ee. Apema esa–auk'a pait'ee p'uurudepema Basa apata puerta jâadait'ee, p'uuru pidaarã Ak'õre te ãuk'idaa patiode p'anù misa. 6 Chi Levideepa uchiadap'edaarã p'aareerã ome ma ewari mimiapataarã aupai t'îudaipia bù Tachi Ak'õre tede, ma–it'ee mãùrã awara bùdap'edaa perã. Jõmaarãpa oodaipia bù Tachi Ak'õre ûraade jara bùk'a. 7 Ma Levideepa uchiadap'edaarãpa tachi rey wap'ùra atadaipia bù arma panau. Mãga p'anùde apida reymaa t'îuru pùrã, peet'aadapáde aji. ¡Rey ituaba atabëidaik'araa bù. Rey ome wãdaipia bùda aji, iru wãrumaa!”
8 Ma Levideepa uchiadap'edaarãpa mãik'aapa Judadepemaarãpa oojida jõmaweda p'aare Joyadapa jaradak'a. Ãchi jua ek'ari soldaorã rey palacio jâapataarã, chi t'erabaidap'edaarã paara atanajida mãik'aapa Joiadá k'îrapite ak'ùnâ p'ana chejida. 9 Mãpai irua miasu mãik'aapa rey Davidpa Tachi Ak'õre tede ùa bada escudo waibùa, ma–ãri paara teeji soldaorã poro waibùarãmaa. 10 Mãpai ma soldaorã arma panau ak'ùnâ p'ananajida Tachi Ak'õre te sur eere, norte eere, altar ik'aawa paara rey jâadait'ee. 11 Maap'eda Joyadapa ichi warrarã ome rey piuda warra atanajida mãik'aapa rey poro jâra jâ bùji awaraa rey net'aa jâpari ome. Teejida pacto p'ãda; aùde jara bada ãchia oodait'ee reypa oopi bùk'a mãik'aapa Tachi Ak'õrepa oopi bùk'a. Mãpai aceite atadap'eda, iru ârù weejida mãik'aapa jarajida ma warra rey pada. Mãga jaradak'ãri, arii p'anadap'edaarã jõmaarãpa biajida: “¡Tachi rey, pia baparíiji!”
12 Reina Ataliapa ma biapi ûrik'ãri, wãji eperãarã see nâbadamaa Tachi Ak'õre tede. 13 Rey ak'ùnâ bù unuji te bùùrù k'ait'a rey ak'ùnâ baparimãi. Iru ik'aawa unuji Judá eujãdepema poro waibùarã, música chaapataarã ome mãik'aapa eperãarãpa o–îa trompeta chaamaa p'anajida. Mãga unuk'ãri, t'ãri k'achiapa Ataliapa ichi p'aru jêji mãik'aapa biaji:
—¡Mù traicionaajida; mù traicionaajida!
14 Mãpai p'aare Joyadapa ma Judadepema soldaorã poro waibùarãmaa mãgaji:
—¡Jita atadapáde aji, mãik'aapa aba beeru pùrã ichi eere, peet'aadapáde! aji.
Joyadapa jara bada perã Atalía peenaadamerã Tachi Ak'õre tede, 15 ateejida caballoorã iru p'anadap'edaamãi, rey palacio k'ait'a. Mama peet'aajida.
16 Ma t'êepai Joiadá ùt'aa iidiji rey Joás pari Tachi Ak'õrepa iru t'ãri auk'a bùmerã ma rey ome. Ichiaba jaraji ma reypa ichi t'ãri auk'a bùmerã ichi jua ek'ari p'anadap'edaarã ome, p'anapataadait'ee Tachi Ak'õre ûraade jara bùk'a. 17 Maap'eda jõmaarã wãjida reina piuda Atalía ak'õre waibùa apatap'edaa Baal temaa mãik'aapa ma te t'eet'aajida. Aùde bada net'aa jõmaweda ãrik'oojida, altar, ne–inaa k'îrak'a bù aù k'îrapite ùt'aa t'âpata ome. Ma Baal pedee jarapari Matán peejida ma tedepema altar k'îrapite.
18 Mãga oodap'eda, Joyadapa jâapataarã bùji Tachi Ak'õre tede. Mãùrã bùji p'aareerã mãik'aapa Levideepa uchiadap'edaarã jua ek'ari. Aù naaweda Davidpa jaraji ma p'aareerã, Levideepa uchiadap'edaarã ome t'erabaidamerã ne–animalaarã peedap'eda, Tachi Ak'õre–it'ee paa jõpidak'ãri mãik'aapa o–îa irumaa k'aripataadamerã. 19 Ichiaba p'aare Joyadapa jâapataarã bùji Tachi Ak'õre tedepema puertade t'îupiamaapa ne–inaa ooda k'aurepa t'îuik'araa bee.
20 Mãpai Joiadá soldaorã poro waibùarã ome, Judadepemaarã poro waibùarã ome mãik'aapa Judadepema jîp'aarã ome ma rey ateejida Tachi Ak'õre tedeepa rey palaciodee. Jâa paraa bada Ùt'ùpema Puerta apatap'edaade t'îudap'eda, rey Joás su–ak'ù beeji rey su–ak'ù beeparide. 21 Mãga k'awadak'ãri, ma p'uurudepemaarã jõmaweda o–îadachida. Ma reina Atalía piuda perã, ma p'uurudepemaarã k'ãiwee p'aneejida.