Judade Ocozías rey pada
(2 Reyes 8.25-29; 9.21-29)
22
1 Jorán piuk'ãri, Jerusalendepemaarãpa chi warra t'êepema Ocozías rey bùjida. Aù naaweda arabeorãpa iru âpemaarã p'anadap'edaamãi t'îujida mãik'aapa peek'oojida. Mapa iru Judade rey bùjida. 2 Ocozías rey beek'ãri, cuarenta y dos año iru baji. Rey baji Jerusalende año aba wãyaaru misa. Chi nawe Omrí ãichak'e Atalía paji.3 Ocoziapa ne–inaa k'achia oopachi Israeldepema rey Acabpa oopariidak'a mãik'aapa irudeepa uchiadap'edaarãpa oopatap'edaak'a. Ocozías nawepa paara irumaa ne–inaa k'achia oopiji. 4 Chi ak'õre Jorán piuk'ãri, Ocoziapa ûraa jùrùji Acab ëreerãmaa. Mãùrã k'aurepa Tachi Ak'õre k'îrapite iru k'achiade beeji. 5 Mãùrã ûraa k'achia jaradap'edaa k'aurepa Ocozías pedeeteeji Israeldepema rey Acab warra Jorán ome chõonadait'ee Ramot de Galaad p'uurude siriorã rey Jazael ome. Mamîda ma chõo jõnadap'edaade siriorãpa Jorán siapa trùt'aajida. 6 Mapa iru ãpùtee cheji Jezrel p'uurudee chi trùdap'edaamãi aniru misa. Iru mama bùde Judadepema rey Ocozías irumaa p'asia cheji.
Jehupa Ocozías peeda
7 Tachi Ak'õrepa k'îsia iru baji Ocozías piumerã Joranmaa wãk'ãri. Mãgá Ocozías panak'ãri Jorán badamaa, ãchi omeeweda uchiajida Nimsi warra Jehú unude, Tachi Ak'õrepa iru jùrùt'erada perã Acabdeerã jõmaweda peemerã. 8 Mãgá Jehupa Acabdeerã peek'oo wãde ununaji Judadepema poro waibùarã Ocozías ëreerã warrarã ome. Ma warrarã peek'ooji. 9 Ma t'êepai ichi ek'ari beerãmaa Ocozías jùrùpiji. Iru miru baji Samaria p'uurude. Mama unu atadak'ãri, Jehumaa ateejida. Irua peepiji. Mamîda Ocozías k'ap'ùa piuda ùajida iru chonaarã ùadap'edaamãi eperãarãpa jaradap'edaa perã: ‘Iru rey Josafat warra paji mãik'aapa Josafat ichi t'ãripa Tachi Ak'õrede ijãapachi.” Ocozías warrarã tawaraa beerã peedap'edaa perã apida wê–e paji iru pari rey beemerã.
Ocozías nawe Ataliapa ne–inaa k'achia ooda
(2 Reyes 11.1-21)
10 Ocozías nawe Ataliapa iru piuda k'awaa atak'ãri, jùrùji Judá eujãdepema reyrãdeepa uchiadap'edaarã jõmaweda jõpiit'ee. 11 Mamîda rey Jorán piuda k'au, p'aare Joiadá wêra t'âjarapatap'edaa Josabapa Ocozías warra t'êepema Joás nãga k'aripaji. Apemaarã rey warrarã pee chedak'ãri, irua Joás alcobade merã nâbùji chi ak'ùpari ome. Mãgá Atalía eere p'anadap'edaarãpa p'oyaa peeda–e paji. Josabapa mãga ooji ichi Ocozías âpewêra pada perã. 12 Año seis wãyaarude Josaba chi ùmùk'îra ome Joás Tachi Ak'õre tede merã iru p'anajida. Mãga nùde Judade Atalía reina beeji.