Judade Jorán rey pada
21
1 Judadepema rey Josafat jai–idaak'ãri, chi chonaarã ùadap'edaamãi David p'uurude ùajida. Ichi warra Jorán rey beeji ichi pari. 2 Rey Josafatpa ichiaba nãgà warrarã ooji: Azarías, Jehiel, Zacarías, Micael, Sefatías. Mãùrã Jorán t'êe t'ojida. 3 Ãchi ak'õrepa regalo chok'ara teeji ãchimaa, nêedee ooda, p'arat'adee ooda mãik'aapa awaraa ne–inaa pia. Ichiaba teeji Judadepema p'uuru murallapa t'ùak'au bee chi warrarãmaa ak'ùpataadamerã. Mamîda Jorán chi warra naapema pada perã, rey beeji. 4 Jorán rey beep'eda, chi âpemaarã jõmaarã peepiji. Ichiaba israelitaarã poro waibùarã ûk'uru peepiji.5 Jorán rey beek'ãri, treinta y dos año iru baji. Ocho año wãyaarude iru Jerusalende bapachi. 6 Mamîda Tachi Ak'õre k'îrapite Joranpa ne–inaa k'achia oopachi. Israelitaarã reyrãpa ne–inaa k'achia oopatap'edaak'a oopachi, chi wêra rey Acabdeepa uchiada pada perã. 7 Mãgá ne–inaa k'achia oopachi mîda, Tachi Ak'õrepa iru ichiak'au bùji, aù naaweda jarada perã Davidmaa irudeepa uchiadait'eerã ichita rey padait'ee Judade.
8 Jorán rey bùde Edom eujãdepemaarãpa waa p'ana k'iniada–e p'aneejida Judadeepa uchiadap'edaarã rey jua ek'ari. Maperã ãchi rey bùjida. 9 Mãga k'awaa atak'ãri, rey Joranpa ichi soldaorã carreta ome, caballoorã ome p'e ataji mãik'aapa wãjida chõode ma Edom pidaarã ome. Mãga nùde Edomdepema soldaorãpa ãra wap'ùra atajida. Mamîda rey Jorán ichi soldaorã poro waibùarã carretade wãpatap'edaarã ome uchiajida mãùrã juadeepa. 10 Mãgá Edom pidaarã uchiajida Judadeepa uchiadap'edaarã rey jua ek'ariipa. At'ãri mãga p'anù. Maapai Libná p'uurudepemaarã ichiaba uchiajida Judadeepa uchiadap'edaarã rey jua ek'ariipa. Mãga p'asaji Joranpa ichi chonaarã Ak'õre Waibùade ijãa amaada perã. 11 Ma awara Joranpa ijãadak'aa beerã ùt'aa t'âpata te ee nok'ode oopiji Judá eujãde ee jêra bùde mãik'aapa Judadepemaarã Jerusalendepemaarã ome ùt'aa t'âpipachi ne–inaa juapa oodamaa.
12 Jorán rey bùde Tachi Ak'õre pedee jarapari Eliapa irumaa k'art'a p'ã pëiji. Mãgùde jaraji:
“Tachi Ak'õre, pù chonaa David Ak'õre Waibùapa nãga jara bù: ‘Pùa ne–inaa pia oo–e bù pù ak'õre Josafatpa oodak'a mãik'aapa Judadepema rey Asapa oodak'a. 13 Ma k'ãyaara oopari Israeldepema reyrãpa oopatap'edaak'a. Pù k'aurepa Judadepemaarã Jerusalendepemaarã ome mùde ijãa amaa p'anù, Acabdeerãpa oopatap'edaak'a. Ma awara pùa pùchi âpemaarã peeji, t'ãri pia p'anajida mîda. 14 Maperã Tachi Ak'õre Waibùapa pùchideerã k'achia ooit'ee: pùchi warrarãmaa, wêraarãmaa, pùchi net'aamaa paara. 15 K'ayaa k'achiapa pù k'ayaapiit'ee. Bi p'irapiit'ee pùchi jâsi uchiarutamaa.’ ”
16 Ma t'êepai Tachi Ak'õrepa k'îsia k'achia k'îsiapiji filisteorãmaa, arabeorãmaa, Etiopía eujãdepemaarãmaa Jorán ome chõo jùrùdamerã. 17 Maperã chõo chejida Judá eujãde mãik'aapa jãri atajida ne–inaa pia jõmaweda rey palaciode ùadap'edaa, chi warrarã, wêraarã paara. Aba chi warra t'êepema Joacaz chok'ai bëijida.
18 Maap'eda Tachi Ak'õrepa Joranmaa k'ayaa k'achia baripiji. Bi p'irapiji. Apidaapa p'oyaa jùpada–e paji. 19 Taarã pak'ãri, año omé parumaa, ichi jâsi chedachi ma k'ayaa k'aurepa. Mãgá p'ua nâbùde piuji. Ichi jua ek'ari beerãpa t'ùpùtau k'ooda–e paji ichi k'irãpadait'ee ãchia oodap'edaak'a ichi chonaarã jai–idaadak'ãri.
20 Jorán rey beek'ãri, treinta y dos año iru baji. Ocho año wãyaarude rey paji Jerusalende. Piuk'ãri, iru–it'ee jêeda–e paji. David p'uurude ùajida. Mamîda awaraarã reyrã ik'aawa ùada–e paji.