Josafatpa Moabdepemaarã Amondepemaarã ome p'oyaada
20
1 Maap'eda Moabdepemaarã Amondepemaarã ome pedeeteejida ûk'uru meunita pidaarã ome Josafat eere p'anadap'edaarã ome chõonadait'ee. Mapa chõo chejida. 2 Mãga nùde eperãpa Josafatmaa nãga jara cheji: “¡Edom eujãdeepa, Mar Muerto k'îraik'a eereepa soldaorã cho–k'ara cheruta pù ome chõode! ¡Jazezón Tamar p'uurude p'anùda!” ajida. (Jazezón Tamar ichiaba t'âjarapachida Engadi.) 3 Josafatpa mãga ûrik'ãri, p'eradachi. Mapa ùt'aa t'âmaa beeji Tachi Ak'õremaa. Jara pëiji Judadepemaarã nek'o–ee Tachi Ak'õremaa chupùria iidi p'aneedamerã. 4 Mãgá Judadepemaarã chok'ara cheepurujida ùt'aa t'âde. Judadepema p'uuru jõmadeepa cheepurujida Jerusalende.5 Mama p'anùde Josafat ak'ùnâ banaji ma Judadepemaarã jõmaarã t'ãide Tachi Ak'õre te k'îrapite. 6 Mãpai mãgaji:
“Tachi Waibùa, tai chonaarã Ak'õre Waibùa, pù ùt'ari bapari mãik'aapa na p'ek'au eujãdepemaarã jõmaarã pù jua ek'ari p'anù. Apidaapa pù jua p'oyaada–e pai. 7 Tachi Ak'õre, pùata na eujãde p'anapatap'edaarã jërek'ooji pù p'uuru, israelitaarã naa. Na eujã teeit'eeda aji, pù k'õp'ãyo pia, Abrahammaa ichideepa uchiadait'eerã ichita nama p'anapataadamerã. 8 Ma israelitaarã nama p'ana chedap'eda, pù–it'ee te oojida mãik'aapa pùmaa nãga jarajida: 9 ‘Nama p'anùde taimaa ne–inaa k'achia p'asaru pùrã, tachi k'îra unuamaa iru p'anapataarã chõo cheruta pùrã, maa–e pùrã k'ayaadaruta pùrã maa–e pùrã jarra ooruta pùrã, chip'edaiit'ee na te k'îrapite, pù nama bapariit'ee perã. Tai audú k'îsia jõnùde pùmaa chupùria iididait'ee. Mãpai pùa ûriit'ee taipa ùt'aa iidiruta mãik'aapa tai k'aripait'ee. 10 ’Nama p'anù pù k'îrapite, tai chonaarãpa jaradap'edaak'a. Amondepemaarã Moabdepemaarã ome cheruta Seír ee jêra bù eujãdepemaarã ome. Israelitaarã Egiptodeepa uchiadak'ãri, pùa jaraji mãùrã eujãde wãyaanaadamerã mãik'aapa mãùrã chonaarã jõpinaadamerã. 11 Mamîda ârá mãùrã cheruta tai jërek'oode na eujãdeepa; pùa teeda tai chonaarãmaa. 12 Mãga bùta, Tachi Waibùa, ¿pùa mãùrã k'achia ooyama aji, wa mãga–e? Mãùrã k'îrapite tai juatau wêe pùk'a chitoonù. Ãchi chok'araara tai eere p'anùùrã k'ãyaara. K'awada–e k'ãata oodait'ee. ¡Mapa nama pùmaa chupùria iidimaa p'anùda!” aji.
13 Josafat mãgá pedee bù misa, Judadepema ùmùk'îraarã, wêraarã, warra chak'eerã paara Tachi Ak'õre te k'îrapite ak'ùnâ p'anajida. 14 Mãga nùde Tachi Ak'õrepa ichi Jaure pëiji Jahazielmaa. Mãgà Zacarías warra paji; Benaías ãichak'e. Ma Benaías Jeyel warra paji; Matanías ãichak'e. Levideepa, Asafdeepa uchiada paji. 15 Jahazielpa mãgaji: “Ûridapáde aji, Judadepemaarã, Jerusalendepemaarã, Tachi Rey Waibùa Josafat ome. Tachi Ak'õre Waibùapa nãga jara bù: “P'eranáatù ma soldaorã cheruta audú chok'ara p'anadairã. Ãrapa parã p'oyaada–e pait'ee mù, parã Ak'õre Waibàapata ãra p'oyaait'ee perã. 16 Nu wåtù ãchi ome chõode. Sis ee esajîak'a o wãyaaparide chedait'ee. Parã unudait'ee ãra ome to chak'e uchia bùmãi Jeruel pania wêe bù eujãde. 17 Pãchi juadoopa chõoda–e pait'ee. Erk'a ak'ùnâ p'anéetù mãik'aapa nàtù ak'ùdait'ee mù, parã Ak'õre Waibùapa ooit'ee bù. Jerusalendepemaarã Judadepemaarã ome, p'eranáatù. ¡Nu waawee–ee wãdapáde a bù, ãra ome unude, mù, parã Ak'õre Waibùa parã ome bapariit'ee perã!’ ”
18 Mãga ûridak'ãri, Josafat bedabaidachi tau bùùrù eujãde t'õbairumaa mãik'aapa Judadepemaarã Jerusalendepemaarã ome eujãde barrobai jêra beejida Tachi Ak'õre k'îrapite ak'ùpidait'ee iru waawee p'anù. 19 Mãga nùde Levideepa uchiadap'edaarã, chi Coatdeepa uchiadap'edaarã, Coredeepa uchiadap'edaarã ome golpe ùt'aa t'âjida israelitaarã Ak'õre Waibùamaa.
20 Aù norema tap'edaweda p'irabaijida wãdait'ee eujã pania wêe bù Tecoamaa. Uchiadait'ee pak'ãri, Josafat ak'ùnâ beeji ãchi taide mãik'aapa mãgaji: “Ûridapáde aji, Jerusalendepemaarã, Judadepemaarã ome. Tachi Ak'õre Waibùade ijãapatáatù iruata tachi k'aripait'ee perã. Ooit'ee ichia jara bùk'a ichi pedee jarapataarã k'ap'ùa pari. Nadeepa tachi pia uchiadait'eeda” aji.
21 Mãga jarap'eda, Josafatpa k'aripataarã jùrùt'eraji soldaorã naa wãdamerã mãik'aapa Tachi Ak'õremaa pedee pia k'aridamerã: “ Tachi Ak'õremaa gracias jaradáma irua ichita tachi k'inia iru bapari perã.”
22 Mãgá t'ãri o–îa k'ari p'aneedak'ãri, Tachi Ak'õrepa k'îsia k'awa–ee pùk'a papiji ma Amondepemaarã, Moabdepemaarã mãik'aapa Seír ee jêra bùdepemaarã; ma Judá eujãde chõode cherutaarã. Mãgá Ak'õrepa mãùrã p'oyaaji. 23 Ma Amondepemaarã Moabdepemaarã ome ma Seír ee jêra bùdepemaarã ârù wãdap'eda, peek'oojida. Maap'eda ãchi auk'aarã paara peek'oo wãjida. Mãgapù ãchi k'iniijida.
24 Judadepemaarã panadak'ãri ma pania wêe bù eujã unupatamãi, unujida ma k'îra unuamaa iru p'anapatap'edaarã k'ap'ùa piuda jêra bù aupai. ¡Apida chok'ai uchia–e paji! 25 Mãpai Josafat ichi eere p'anadap'edaarã ome ma piudap'edaarã net'aa p'e atanajida. Net'aa cho–k'ara p'e wãjida: arma, p'aru, awaraa net'aa pia ome. Jõmaweda p'e ateejida. Ne–inaa audú chok'ara bada perã, jõmaweda p'oyaa ateeda–e paji ateeda abaade. Mapa k'ãima õpee p'e p'aneejida. 26 Aù norema chip'ejida eujã jewedaa Beracade. Mama ùt'aa t'âjida pedee pia jaradait'ee Tachi Ak'õremaa. Maperãpù ma eujã jewedaa t'â bùjida Beracá. a At'ãri mãga t'âjarapata.
27 Maap'eda ma Judadepemaarã Jerusalendepemaarã ome ãpùtee chejida Jerusalendee. Josafat ãchi nok'oore nipaji. Jõmaarã o–îa p'anajida, Tachi Ak'õrepa mãgá ãchi k'îra unuamaa iru p'anapatap'edaarã k'iniipida perã. 28 Jerusalende panadak'ãri, jîp'a wãjida Tachi Ak'õre tedee salterio, cítara, trompeta ome chaa p'anù misa.
29 Awaraa eujãdepemaarãpa k'awaa atadak'ãri Tachi Ak'õrepa ooda israelitaarã k'îra unuamaa iru p'anapatap'edaarã ome, p'eradachida mãik'aapa Tachi Ak'õre waawee p'aneejida. 30 Mãgá Josafat rey bùde Judadepemaarã k'ãiwee p'anapachida, Tachi Ak'õrepa ãchi k'aripa bada perã.
Awaraa ne–inaa Josafatpa ooda
(1 Reyes 22.41-50)
31 Josafat treinta y cinco año iru baji rey beek'ãri. Judadepemaarã rey paji veinte cinco año wãyaarude mãik'aapa Jerusalende bapachi. Chi nawe t'âjarapachida Azuba. Iru Siljí k'au paji. 32 Josafat rey pia baji chi ak'õre Asá badak'a. Tachi Ak'õre k'îrapite ne–inaa pia oopachi. 33 Mamîda ãripi–e paji ijãadak'aa beerã ùt'aa t'âpatap'edaa te ee nok'ode beeda, ichi ek'ari p'anadap'edaarãpa ãchi chonaarã Ak'õre Waibùade at'ãri mak'ùara ijãada–e pada perã.
34 Awaraa ne–inaa ooda Josafatpa, iru rey beedak'ãriipa jai–idaarumaa p'ã bù Crónicas librode awaraa Judadepema reyrãpa oopatap'edaa ome.
35 At'ãri rey bùde Josafat pedeeji israelitaarã rey t'ãri k'achia bada Ocozías ome barco oodait'ee net'aa netopataarã–it'ee. 36 Ma t'êepai Ezión Gueberde Josafatpa mãgee barco oopiji net'aa netopataarã aùde Tarsis p'uurudee wãdamerã. 37 Mamîda ma barco uchiadait'ee pak'ãri, Tachi Ak'õre pedee jarapari Maresadepema Dodías warra Eliezerpa Josafatmaa nãga jara cheji: “Pùa Ocozías ome pedeeda perã barco oopidait'ee, Tachi Ak'õrepa ma barco ãripiit'eeda” aji. Mãga p'asaji. At'ãri Ezión Gueberde p'anùde ma barco pirubaaik'oodachida.