19
1 Israelitaarã rey Acab piup'eda, rey Josafat israelitaarã eujãdeepa cheji ichi temaa Jerusalende. 2 Mama bùde Tachi Ak'õre pedee jarapari Jananí warra Jehú p'asianaji irumaa. Jehupa mãgaji: “¿Sãap'eda pùa t'ãri k'achia–idaa beerã, chi Tachi Ak'õre k'îra unuamaa iru p'anapataarã k'aripa nipajima? aji. Mãga ooda perã, Tachi Ak'õre pù ome k'îrau bù. 3 Mamîda pùa ne–inaa pia ooji naaweda t'ãripa Tachi Ak'õre jùrùk'ãri mãik'aapa awaraarã ak'õre waibùa apata Aserá k'îrak'a bù ãripik'ãri.”Josafatpa charraarã bùda
4 Maap'eda Josafat Jerusalende bapachi. Mamîda p'asia nipapachi Judá eujãdepema p'uuru bee chaa. Nipapachi Berseba p'uurudeepa Efraín eujãde ee jêra bùmaa. Jaratee nipapachi jõmaarãpa waya ijãapataadamerã ãchi chonaarã Ak'õre Waibùade. 5 Ichiaba charraarã bùji murallapa t'ùak'au bada p'uuru bee chaa. 6 Mãga ook'ãri, ma charraarãmaa nãga jaraji: “Pãchi mimia pia oodapáde aji, mimiapata perã Tachi Ak'õre k'ap'ùa pari. Mimiada–e eperãarã–it'ee. Iru–it'eeta mimiaruta pùrã, Tachi Ak'õrepa parã k'aripait'ee. 7 Maperã iru waawéetù mãik'aapa pãchi mimia k'îra jîp'a óotù. Tachi Ak'õrepa k'inia–e bùda aji, charraarãpa eperã aba piara ak'ùdamerã awaraa k'ãyaara maa–e pùrã p'arat'a jitadamerã eperãpa ne–inaa k'achia oo–eta miapidait'ee.”
8 Jerusalende Josafatpa ichiaba mãga ooji. Levideepa uchiadap'edaarã, p'aareerã mãik'aapa te pidaarã poro waibùarã bùji charraarã mimia oopataadamerã eperãarãpa iidi chedak'ãri Tachi Ak'õre net'aade maa–e pùrã Jerusalendepemaarã nepùrade p'anadak'ãri. 9 Ma charraarãmaa nãga jaraji: “Ichita Tachi Ak'õre waaweedapáde aji. Ne–inaa jõmaweda k'îra jîp'a óotù irua oopi bùk'a. 10 Eperãarã cheruta chaa parãmaa ãchi nepùra iidide, awaraa p'uurudepema cheruta pùjida, ãchi ûráatù ne–inaa jõmaweda oopataadamerã Tachi Ak'õre ley p'ãdade jara bùk'a. Mãga óotù iidi cheruta pùrã chîara peedade maa–e pùrã ne–inaa jara bùde Tachi Ak'õre leyde, maa–e pùrã ne–inaa mùa jaradade. Ûráatù maarepida p'ek'au k'achia oonaadamerã. Mãga ooruta pùrã, Tachi Ak'õrepa ne–inaa k'achia oo–e pait'eeda aji, ãchimaa, parãmaa paara.
11 ’P'aareerã poro waibùa Amariapa p'anauipia bù eperãarãpa Tachi Ak'õre net'aade iidi cheruta pùrã. Jõdee Ismael warra, Zebadiapa p'anauipia bù awaraa iidi cheruta rey jua ek'ari p'anapataarãpa; p'uurudepemaarã nepùra wa Judá eujãdepemaarã nepùra. Irua mãga ooit'ee iru Judadeepa uchiadap'edaarã poro waibùa perã. Ma awara Levideepa uchiadap'edaarãpa parã charraarã k'aripadait'ee. Maperã k'îra jîp'a p'anapatáatù mimiapataadait'ee Tachi Ak'õrepa k'inia bùk'a. ¡Irua parã k'aripait'ee!