Tachi Ak'õre pedee jarapari Micaiapa rey Acabmaa jarada
(1 Reyes 22.1-28)
18
1 Rey Josafat mãgá p'arat'ara beeji mãik'aapa eperãarãpa iru t'o iru p'anajida. Ma awara irudeerã miak'ãida k'aurepa israelitaarã rey Acabdeerã ome, chõoda–ee p'anapachida. 2 Maapai Josafat Samaria p'uurudee wãji p'asiade rey Acabmaa. Mama bùde rey Acabpa ovejaarã, p'ak'aarã chok'ara peepiji Josafat–it'ee mãik'aapa iru ome nipadap'edaarã–it'ee. Mãgá o–îa p'anùde rey Acabpa ûraaji Josafat chõonamerã Ramot de Galaad p'uurude. 3 Israelitaarã rey Acabpa iidiji Judadepema rey Josafatmaa:—¿Wã k'inia bùk'ã aji, mù ome chõode Ramot de Galaad p'uurude?
Josafatpa p'anauji:
—Mù, mùchi soldaorã ome, chi caballode wãpataarã paara parã ome p'anùda aji. 4 Mamîda naapùara iididáma aji, Tachi Ak'õrepa k'ãata k'inia bù.
5 Mapa israelitaarã reypa t'â pëiji ichi ak'õre waibùa apatap'edaa pedee jarapataarã. Perá cuatrocientos paji. Ichi k'îrapite panadak'ãri, ichia iidiji:
—¿Chõodaipia bùk'ã aji, Ramot de Galaad p'uurude wa mãga–e?
Ãchia p'anaujida:
—Chõonadapáde ajida, Tachi Ak'õrepa pù juade baaipiit'ee perã.
6 Mamîda Josafatpa ijãa–e paji mãùrãpa jaradap'edaa. Mapa iidiji:
—¿Nama wê–ek'ã aji, Tachi Ak'õre pedee jarapari, mãgùmaa auk'a iididait'ee?
7 Israelitaarã reypa p'anauji:
—Paraada aji. Mãgà Imlá warra, Micaías. Mãgùmaa iididayada aji. Mamîda mù iru ome t'ãri ãrii bapari, irua mùmaa pedee pia jarak'aa perã. Ma k'ãyaara ne–inaa k'achia jarapari.
Mamîda Josafatpa mãgaji:
—Mãga jaranaapáde aji, Ak'õre pedee jarapari ãpùte.
8 Mãpai ma israelitaarã rey Acabpa t'âji ichi soldaorã poro waibùa mãik'aapa jaraji Imlá warra, Micaías isapai aneemerã.
9 Mãùmisa israelitaarã rey Acab Judadepema rey Josafat ome su–ak'ù p'anajida rey su–ak'ù beeparide. Ãchi reyrã p'aru jâpata p'aru jâ iru p'anajida. Trigo chi edeepa ãyaa p'epatamãi p'anajida Samaria p'uurudepema puerta k'ait'a. Ma ak'õre waibùa apatap'edaa pedee jarapataarã ãchi k'îrapite ak'ùnâ p'anajida, pedee jõnù ãchi ak'õre waibùapa jarapidak'a. 10 Mãùrãdepema aba, Quenaná warra Sedequiapa ne–animal cachok'a hierrodee ooda iru baji ichi juade. Mãga nâbùde irua mãgaji: “Tachi Ak'õrepa nãga jara bùda aji: ‘Nãgà cacho surupa eperã peek'ajik'a, mãga pùk'a parãpa Siriadepemaarã peek'oodait'eeda” aji.
11 Apemaarã ãchi ak'õre waibùa apatap'edaa pedee jarapataarãpa auk'a jarapachida. Acabmaa mãgapachida: “Tai Rey Waibùa, Ramot de Galaad p'uurude chõonapáde ajida. P'oyaait'eeda ajida, Tachi Ak'õrepa jãri atapiit'ee perã.”
12 Mãùmisa ma soldaorã poro waibùa pëida Micaías aneemerã irumaa nãga jaraji:
—Rey ak'õre waibùa pedee jarapataarã jõmaarãpa pedee pia jaramaa p'anùda aji, irumaa. Mapa mùa enenee nâbù pùa auk'a pedee pia jaranamerã.
13 Mamîda Micaiapa p'anauji:
—Tachi Ak'õre k'îrapite mùa juraa bù irua pedee jarapi bùk'apai reymaa jarait'eeda aji.
14 Maap'eda Micaías rey k'îrapite pak'ãri, reypa iidiji:
—Micaías, ¿taipa Ramot de Galaad p'uurude chõonadaipia bùk'ã aji, wa mãga–e?
Micaiapa p'anauji:
—Chõonadapáde aji, mãik'aapa jãri atadapáde aji, Tachi Ak'õrepa p'oyaapiit'ee perã.
15 Mamîda israelitaarã reypa ijãa–e paji. Mapa Micaiamaa mãgaji:
—Tachi Ak'õre t'âde mãik'aapa iru k'îrapite wãara pedeeta jarapáde aji.
16 Mãpai Micaiapa mãgaji:
—K'ãimok'araa pùk'a bùde mùa unujida aji, israelitaarã chok'ara pariatua nida ee jêra bùde, ovejaarã ãchi ak'ùpari wêe nipapatak'a. Mãga bùde Tachi Ak'õrepa jaraji: “Mãùrã chipari wêe chitoonù perã, wãdaipia bù ãchi te chaa.”
17 Mãga ûrik'ãri, israelitaarã rey Acabpa rey Josafatmaa mãgaji:
—¿Mãga jara–e pajik'ã? aji. ¡Jãgùpa mùmaa ichita ne–inaa k'achia jaraparida! aji.
18 Mapa Micaiapa pedee awaraa jaraji:
—Pùa mãga jara bù perã Tachi Ak'õre pedee jarapari ãpùte, ûripáde aji, irua jara bù: Mùa unuji Tachi Ak'õre su–ak'ù bù ichi rey su–ak'ù beeparide. Ùt'aripemaarã jõmaarã ak'ùnâ p'anajida iru ik'aawa; juaraare, juabi eere. 19 Mãga nùde Tachi Ak'õrepa iidiji k'airãta wãdai rey Acab wãpide Ramot de Galaad p'uurude chõonamerã, mama piu baibeeit'ee perã. Mãga ûridak'ãri, ma ùt'aripemaarã ãchi pitapai pedee para beeji. 20 Mãpai aba uchiaji Tachi Ak'õre k'îrapite. Mãgùpa jaraji ichia ma mimia oonai. Tachi Ak'õrepa iidiji sãga ooit'ee Acab mamaa chõonamerã. 21 Mãpai ma ùt'aripemapa jaraji ichiata seewa pedee jarapiit'eeda aji, rey ak'õre waibùa pedee jarapataarã ideepa. Mãpai Tachi Ak'õrepa jaraji mãgá rey k'ûranamerã. Mãga ooji. 22 Ârapù pùa k'awa bù Tachi Ak'õrepa pëidapa ma seewa jarapiji pùchi ak'õre waibùa apata pedee jarapataarãmaa, pùa oomerã ãchia ûraa p'anùk'a mãik'aapa mãgá jõmerã.
23 Mãpai Quenaná warra Sedequías, Micaías k'ait'a wãp'eda, k'îra sît'aaji mãik'aapa mãgaji:
—Mù ik'aawaapa uchiak'ãri, ¿chisãgà eere wãjima aji, ma ùt'aripemada a bùta? ¿Pùmaa wã–e pajik'ã aji, ma seewa nama jara chemerã?
24 Mãpai Micaiapa p'anauji:
—Pùa chi wãarata k'awaait'eeda aji, ewari cherude pariatua te awara–awaraade miru nipak'ãri.
25 Mãpai israelitaarã rey Acabpa ichi soldaorãmaa jaraji:
—¡Micaías jita atadapáde! aji. ¡Atéetù na p'uuru ak'ùpari Amón k'îrapite mãik'aapa mù warra Joás k'îrapite! 26 Jarátù mùa ichi pëiru carcelde t'ùt'aadamerã. Mama bùde pan pitepai pania ome ichimaa teedaipia bùda aji, chõodadeepa mù k'ap'ùa pia cheru misa.
27 Mamîda ateedai naaweda Micaiapa mãgaji:
—Pù k'ap'ùa pia ãpùtee cheru pùrã, mãgara Tachi Ak'õrepa mù k'ap'ùa pari pedee–e pajida aji. ¡Parã jõmaarãta, k'îsíatù mùa jaradade!
Acab piuda Ramot de Galaad p'uurude
(1 Reyes 22.29-36)
28 Maap'eda israelitaarã rey Acab Judadepema rey Josafat ome chõonajida Ramot de Galaad p'uuru jãri atadait'ee. 29 Mama panadak'ãri, israelitaarã reypa Josafatmaa mãgaji:
—Mùa jâit'eeda aji, soldao p'aru jîp'aa. Mamîda pùa rey p'aru jâ beepáde aji.
Mãgá israelitaarã rey soldao p'aru jîp'aa jâ bùde t'îuji chõode awaraa soldaorã ome. 30 Mamîda aù naaweda Siriadepemaarã reypa jaraji ichi soldaorã poro waibùarã carretade nipadap'edaarãmaa israelitaarã ome chõonaadamerã; jîp'a ãchi reyta peedamerã. 31 Maperã ma soldaorã poro waibùarã carretade nipadap'edaarãpa Josafat rey p'aru jâ bù unudak'ãri, k'îsiajida: “Jãgà israelitaarã rey.” Mapa p'ùrrabaijida iru ârù wãdait'ee. Mamîda Josafat biak'ãri k'aripa iidiit'ee, Tachi Ak'õrepa iru k'aripaji. 32 Mãgá Siriadepema soldaorã poro waibùarãpa k'awaa atadak'ãri mãgà israelitaarã rey–eta, waa iru t'êe wãda–e paji.
33 Mamîda chõo jõnùde, Siriadepema soldaorãpa trù p'anadak'ãri, sia aba wãyaaji israelitaarã rey Acab p'aru hierrode jâ bada ewaraa bùde. Mãga pak'ãri, Acabpa mãgaji ichi carreta p'eraparimaa:
—P'ùrrabáiji mãik'aapa mù namãik'aapa ateepáde aji, sia k'idapa mù trùdap'edaa perã.
34 Taarã chõo para beeji. Israelitaarã rey bainâ beeji ma carretade mãik'aapa chõomaa beeji ma Siriadepema soldaorã ome. Mamîda k'ewara pak'ãri, piuji, ma carretade wãde audú waa bat'ada perã.