Judade Josafat rey pada
17
1 Asá jai–idaak'ãri, chi warra Josafat rey beeji Judade. Josafatpa soldaorã arma ome p'e ataji, israelitaarã ome jura chõoi jîak'aapa. 2 Soldaorã pëiji jõmaweda Judadepema p'uuru murallapa t'ùak'au beemaa. Ichiaba soldaorã pëiji soldaorã p'uuru chak'e oodamerã Judá eujã jõmaade mãik'aapa Efraindeepa uchiadap'edaarã eujãdepema p'uuru, chi ak'õre Asapa jãri atadade.3 Tachi Ak'õrepa Josafat k'aripaji iru bapachi perã ichi chonaa David bapariidak'a. Ùt'aa t'âk'aa paji awaraarã ak'õre waibùa apatap'edaa Baal k'îrak'a bù k'îrapite. 4 Ma k'ãyaara chi ak'õre Ak'õre Waibùade ijãapachi mãik'aapa oopachi iru leyde jara bùk'a. Ook'aa paji israelitaarãpa oopatap'edaak'a. 5 Maperã Tachi Ak'õrepa iru pia ak'ùpachi. Ma awara Judadepemaarãpa irumaa regalo tee chepachida. Mãgá p'arat'ara beeji mãik'aapa eperãarãpa iru t'o iru p'anajida. 6 T'ãripa oopachi Tachi Ak'õrepa k'inia bùk'a mãik'aapa Judá eujãde ãripiji jõmaweda ijãadak'aa beerã ùt'aa t'âpata te ee nok'ode beeda, awaraa eujãdepemaarã nawe waibùa Aserá apatap'edaa k'îrak'a bù ome.
7 Josafat año õpee rey bùde irua ichi ek'ari beerã ûk'uru pëiji Judadepema p'uurudee ma p'uurudepemaarãmaa jarateedamerã. Nãgùùrã pëiji: Ben Jayil, Abdías, Zacarías, Natanael, Micaías. 8 Mãùrã ome nãgà Levideepa uchiadap'edaarã pëiji: Semaías, Netanías, Zebadías, Asael, Semiramot, Jonatán, Adonías, Tobías, Tobadonías. Ma Levideepa uchiadap'edaarã pëiji p'aareerã Elisama mãik'aapa Jorán k'aripapataadamerã. 9 Ma jõmaarã Judadepemaarãmaa mãgá pëiji Tachi Ak'õre ley p'ãda p'uuru bee chaa jaratee nipapataadamerã. Mãga oojida.
10 Maapai Judá eujã ik'aawa p'anadap'edaarã ãchi reyrã ome Tachi Ak'õre waawee p'anajida. Mapa apidaapa chõo jùrùda–e paji rey Josafat ome. 11 Ma k'ãyaara ûk'uru Filistea eujãdepemaarãpa regalo p'arat'a ome Josafatmaa aneejida primiciak'a. Ichiaba Arabia pidaarãpa aneejida siete mil setecientos oveja ùmùk'îraarã, siete mil setecientos chivoorã ome.
12 Mãgá jõmaarãpa rey Josafat t'o iru p'anajida. Judá eujãde irua oopiji p'uuru chiwidi murallapa t'ùak'au bee. Ichiaba p'uuru oopiji aùde net'a tau awaraa chik'o ome ùapataadamerã. 13 Mãgá Judadepema p'uuru bee chaa chik'o ùa iru baji. Ma awara Jerusalende soldaorã sõcharrara beerã p'e ataji. 14 Ma soldaorã t'â p'ãpiji ãchi ak'õre t'â ome.
Judadeepa uchiadap'edaarã soldaorã mil chok'ara poro waibùarã nãgùùrã paji: Adnapa trescientos mil soldaorã iru baji ichi jua ek'ari.
15 Johananpa doscientos ochenta mil soldaorã iru baji ichi jua ek'ari.
16 Zicrí warra Amasiapa doscientos mil soldaorã sõcharrara beerã iru baji ichi jua ek'ari. Ma Zicripa Tachi Ak'õre–it'ee mimia k'inia bada perã, mãgá mimia beeji. 17 Benjamindeepa uchiadap'edaarã soldaorã mil chok'ara poro waibùarã nãgùùrã paji:
Eliadá, chõo k'awaa bùpa doscientos mil soldaorã ematrùma, escudo panau iru baji ichi jua ek'ari. 18 Jozabadpa ciento ochenta mil soldaorã chõo k'awaa beerã iru baji ichi jua ek'ari.
19 Ma soldaorã jõmaweda rey jua ek'ari mimiapachida, juasiada–ee chi Judá eujãdepema soldaorã p'uuru murallapa t'ùak'au beede p'anapatap'edaarã.