Rey Asá pedeeda Siriadepema rey Ben Adad ome
(1 Reyes 15.16-24)
16
1 Asá treinta y seis año rey bùde israelitaarã rey Basá Judá eujãdee chõode wãji. Soldaorã chok'ara bùji Ramá p'uurude, mama eperãarã t'îunaadamerã Asá jua ek'ari bada eujãde.2 Mãga nùde Asapa Tachi Ak'õre tede mãik'aapa ichi palaciode bada nêe, p'arat'a ome tee pëiji ichi ek'ari beerã ome Siria eujãdee, ma eujãdepemaarã rey Damasco p'uurude bada Ben Adadmaa. Nãga jara pëiji: 3 “Pedeedáma aji, chõoda–ee p'anapataadait'ee, tai ak'õreerãpa oodap'edaak'a. Na k'art'a ome mùa pëiruda aji, nêe, p'arat'a ome pù–it'ee. K'awa bù pùa pedeeda Israeldepema rey Basá ome chõoda–ee p'anapataadait'ee. Mamîda mùa k'inia bù pùa ma pedee wêpapimerã. Mãgá Basapa mù ichiak'au bëiit'eeda” aji.
4 Rey Ben Adadpa ijãaji rey Asapa jara pëida. Pëiji ichi soldaorã poroorã ãchi jua ek'ari soldaorã ome chõonadamerã israelitaarã ome. Mãgá nãgà p'uuru p'oyaajida: Iyón, Dan, Abel Mayin mãik'aapa jõma p'uuru ne–inaa ùapata Neftalideepa uchiadap'edaarã eujãde p'anadap'edaa.
5 Basapa mãga k'awaa atak'ãri, ichi soldaorã ãyaa pëiji Ramá p'uurudeepa. 6 Mãpai rey Asapa jara pëiji Judadeepa uchiadap'edaarã eujãdepemaarã jõmaarã Ramade chip'edaidamerã mãik'aapa Basapa pak'uru, mãu ome mama bëidap'edaa soldaorã aùde p'anapataadamerã jõmaweda wãra atadamerã. Mãgà ateejida Gueba p'uurude, Benjamindeepa uchiadap'edaarã eujãde bù mãik'aapa Mizpa p'uurude. Mama soldaorã te chiwidi oojida.
7 Mamîda ma t'êepai ne–inaa unupari Jananí Judadepema rey Asá k'îrapite chep'eda, mãgaji: “Pùa Siriadepema reyde waapùara ijãada perã, pù Ak'õre Waibùade ijãai k'ãyaara, irua ma Siriadepemaarã pù juadeepa uchiapiji. 8 Pù chõo bak'ãri Libiadepemaarã ome, ãra cho–k'ara p'anajida mîda mãik'aapa carreta caballoorã ome cho–k'ara iru p'anajida mîda, Tachi Ak'õrepa pùmaa ãra p'oyaapiji, pùa irude ijãapachi perã. 9 Tachi Ak'õrepa na p'ek'au eujã jõmaweda ak'ùpari mãik'aapa irude ijãapataarã k'aripapari. Mamîda pùa pariatua awaraa reymaa k'aripa iidida perã, namãik'aapa waa pù jura chõoit'eeda” aji.
10 Mãga ûrik'ãri, Asá k'îraudachi ma ne–inaa unupari ome mãik'aapa carcelde t'ù nâbùpiji. Ichiaba maapai Asapa ichi jua ek'ari p'uuru pidaarã pia ak'ù–e paji naawedapemak'a.
11 Ne–inaa awaraa ooda Asapa ichi rey beedak'ãriipa piurumaa uchiapata Judadepema reyrãpa oodap'edaa p'ãdade mãik'aapa israelitaarã reyrãpa oodap'edaa p'ãdade. 12 Asá treinta y nueve año rey bùde chi bùùrù k'ayaadachi. Ma k'ayaa k'achia baji mîda, Tachi Ak'õremaa ùt'aa t'â–e paji jùpamerã. Jîp'a medicoorã jùrùji. 13 Mãgá cuarenta y un año rey bùde Asá jai–idaaji. Ùajida ichi chonaarã ùadap'edaamãi. 14 Ùajida irua mãu te uria k'oro atapidade David p'uurude bada. Iru k'ap'ùa piuda bùjida mãu p'ep'edee ârù mãik'aapa k'era k'îra t'ãdoo awaraa ne–inaa t'ûa bapari ome aù ârù p'ojida. Ma awara t'ùpùtau waibùa oojida ak'ùpidait'ee iru t'o p'anajida.