Asapa ooda rey bùde
15
1-2 Ma ãpùtee chewãdade Oded warra Azarías uchiaji rey Asá ome unude. Tachi Ak'õre Jaurepa ma eperãmaa nãga jarapiji: “¡Ûridapáde aji, Asá, parã Judadeepa uchiadap'edaarã ome mãik'aapa Benjamindeepa uchiadap'edaarã ome! Tachi Ak'õre parã ome nipapariit'ee, parã iru ome niparuta pùrã. Iru jùrùruta pùrã, unudait'ee. Mamîda irude ijãada amaaruta pùrã, irua parã atabaibëiit'ee. 3 Taarã bùde israelitaarãpa iru yiaraa iru p'anadap'edaa perã p'aareerãpa ãramaa iru ley jarateeda–e paji. 4 Mamîda ãra nepùrade baaidak'ãri mãik'aapa israelitaarã Ak'õre Waibùa jùrùdak'ãri, iru unujida. 5 Maapai k'ãiwee p'anadak'aa paji ãra t'ãide chõo p'anadap'edaa perã. 6 Eujã abaadepemaarã chõopachida awaraa eujãdepemaarã ome mãik'aapa p'uuru abaadepemaarã chõopachida awaraa p'uurudepemaarã ome. Mãga p'anapachida Tachi Ak'õrepa ãramaa ne–inaa k'achia oo bada perã. 7 Mamîda mãga–e parã ome. Maperã sõcharra p'anapatáatù mãik'aapa Tachi Ak'õrede ijãapatáatù. Iruata parã pia ooit'ee parã iru–it'ee mimia p'anù perã.”8 Asapa ma pedee Ak'õre pedee jarapari Oded warra Azariapa jarada ûrik'ãri, sõcharra beeji mãik'aapa ne–inaa jõmaweda oo k'inia beeji Tachi Ak'õrepa k'inia bùk'a. Maperã ne–inaa k'îrak'a bù aù k'îrapite ùt'aa t'âpata jõmaweda ãripiji; Judadeepa uchiadap'edaarã eujãde p'anadap'edaa; Benjamindeepa uchiadap'edaarã eujãde p'anadap'edaa; Efraindeepa uchiadap'edaarã eujãde p'uuru jãri atadap'edaade p'anadap'edaa paara. Maap'eda Tachi Ak'õre te k'îrapite altar bada chiwidi pùk'a oopiji. 9 Ma t'êepai Asapa t'â pëiji chedamerã Judadeepa uchiadap'edaarã mãik'aapa Benjamindeepa uchiadap'edaarã, awaraarã mãùrã eujãde p'anapatap'edaarã paara. Maapai israelitaarã chok'ara p'anapachida Judá eujãde, unudap'edaa perã Tachi Ak'õrepa Asá k'aripa baji. Efraindeepa uchiadap'edaarã, Manasedeepa uchiadap'edaarã, Simeondeepa uchiadap'edaarã paara mama p'anapachida. 10 Mãgá Asá año quince rey bùde, ma año atane õpeede ma jõmaarã cheepurujida Jerusalende ùt'aa t'âdait'ee Tachi Ak'õremaa. 11 Ma ewate Tachi Ak'õre–it'ee paajida setecientos p'ak'aarã mãik'aapa siete mil ovejaarã, chivoorã ome jãri atadap'edaa ãchi k'îra unuamaa iru p'anapatap'edaarã juadeepa. 12 Maap'eda Tachi Ak'õre k'îrapite jarajida t'ãripa irude ijãapataadait'ee, iru ãchi chonaarã Ak'õre Waibùa pada perã. 13 Jarajida apidaapa mãgá irude ijãa amaadaru pùrã, ma eperã peedait'ee; chonaa, warra, ùmùk'îra, wêra bù pùjida. 14 Golpe pedeede mãga juraajida Tachi Ak'õre k'îrapite mãik'aapa o–îapa biajida, trompeta, oveja cacho chaa jõnù misa. 15 Arii p'anadap'edaarã jõmaweda o–îa p'aneejida t'ãripa mãga jaradap'edaa perã Tachi Ak'õremaa. Wãara t'ãripa Tachi Ak'õre jùrùdap'edaa perã, ichi unupiji ãchimaa mãik'aapa ãchi k'ãiwee p'anapiji, chõoda–ee ãchi ik'aawa p'anadap'edaarã ome.
16 Ichiaba rey Asapa chi awela, Macá, reina nawe apatap'edaa, ichi puestodeepa jëret'aaji, irua oopida perã ijãadak'aa beerã nawe waibùa Aserá apatap'edaa k'îrak'a bù. Rey Asapa ma k'îrak'a bù ãrik'ooji mãik'aapa paa pëiji to chak'e p'oo bada Cedronde. 17 Ijãadak'aarã ùt'aa t'âpatamãi ee nok'ode beeda ãripi–e paji mîda, Asapa Tachi Ak'õrede ijãapachi. 18 Tachi Ak'õre tede bùji jõmaweda nêe, p'arat'a ome ichia p'eda, chi ak'õrepa p'eda paara teedait'ee Tachi Ak'õre–it'ee.
19 Asá treinta y cinco año rey bùde ichi eere p'anadap'edaarã jura chõoda–e paji.