Judade rey Asá pada
(1 Reyes 15.11-12)
14
1 Rey Abías jai–idaak'ãri, ùajida chi chonaarã ùadap'edaamãi David p'uurude. T'êepai chi warra Asá rey beeji iru pari. Asá rey bùde Judadepemaarã k'ãiwee p'anapachida diez año wãyaaru misa.2 Asapa ne–inaa pia oopachi Tachi Ak'õre k'îrapite. 3 Ãripiji altar awaraa eujãdepemaarãpa oodap'edaa ãchi ak'õre waibùa apatap'edaarã–it'ee. Ichiaba ãripiji ijãadak'aa beerã ùt'aa t'âpata te ee nok'ode oodap'edaa. Yooro p'ora uchiarumaa ãripiji mãu awara bùdap'edaa ãchi ak'õre waibùa apatap'edaarã–it'ee mãik'aapa ãchi nawe waibùa Aserá apatap'edaa k'îrak'a bù. 4 Ma awara Asapa jaraji Judadepemaarãmaa ãchi chonaarã Ak'õre Waibùade ijãapataadamerã mãik'aapa oopataadamerã iru ley p'ãdade jara bùk'a, irua jara bùk'a ome. 5 Ãripiji jõmaweda ùt'aa t'âpata te ee nok'ode p'anadap'edaa madepema altar ome; ma ne–inaa oodap'edaa awaraa ak'õre waibùa apatap'edaarã–it'ee. Iru rey bùde Judadepemaarã k'ãiwee p'anapachida. 6 Tachi Ak'õrepa ãra mãgá k'ãiwee p'anapida perã, Asapa p'uuru t'ùak'au bù murallapa oopiji Judá eujãde.
7 Judadepemaarãmaa mãgaji: “P'uuru bee chaa oodapáde aji, murallapa t'ùak'au bù, torre ome, puerta pia jâapata pak'uru ome. Mãga oodaipia bù na eujã tachi jua ek'ari bù misa. Tachia Tachi Ak'õre jùrùdap'edaa perã, irua tachi k'ãiwee p'anapi bù tachi ik'aawa p'anapataarã ome.” Mãgá Judadepemaarãpa mimia p'aneejida Asapa jaradak'a.
8 Asapa soldaorã chip'e ataji ichi jua ek'ari mimiapataadamerã. Judadeepa uchiadap'edaarã trescientos mil paji; escudo, miasu panau. Benjamindeepa uchiadap'edaarã doscientos ochenta mil paji; escudo, ematrùma panau. Ma soldaorã jõmaarã sõcharra p'anajida.
9 Ma t'êepai Etiopiadepema rey Zera millón aba soldaorã ome, carreta trescientos ome chõo chejida Judadepemaarã ome. Panadak'ãri Maresade, 10 Asá uchiaji ichi soldaorã ome. Sefata eujã jewedaade Maresá p'uuru k'ait'a panajida. Mama ichi soldaorã erk'a bùji chõodait'ee. 11 Mamîda chõodai naaweda Asapa nãga ùt'aa t'âji Tachi Ak'õremaa: “Tachi Waibùa, pùa tai k'aripai mak'ùara juatau wêe p'anù mîda mãùrã k'îrapite. Maperã ¡tai k'aripáji! Pù Tachi Ak'õre, Jõmaarã Ak'õre Waibùa. ¡Taipa pùde ijãapata mãik'aapa pù t'âde na k'îra unuamaa iru p'anapataarã ome chõodait'ee! ¡Pù tai Ak'õre Waibùa bairã ak'ùpipáde aji, pù jua ome apidaapa p'oyaada–e!”
12 Mãpai Tachi Ak'õrepa Etiopiadepemaarã p'oyaapiji Asamaa mãik'aapa Judadepema soldaorãmaa. Jîchoopiji ãra naa. 13 Mamîda Asá ichi eere p'anadap'edaarã ome mãùrã t'êe wãjida Guerar p'uuru parutamaa. Ãrapa ma Etiopiadepemaarã jõmaweda k'iniipik'oojida, p'oyaada–e pada perã Tachi Ak'õre ome, iru soldaorã ome. Mãpai Judadepema soldaorãpa ma Etiopiadepemaarã net'aa waibùa bëidap'edaa p'e ata wãjida. 14 Maap'eda ma Judadepemaarãpa Guerar p'uuru k'ait'a p'anadap'edaa p'oyaa wãjida mãik'aapa net'aa pia aùde nâbada jãri ata wãjida. Jõmaarãpa ãra waawee p'anajida Tachi Ak'õrepa ãra k'aripada perã. 15 P'ak'aarã, ovejaarã, camelloorã ma p'uurudeepa taawa p'anadap'edaa ichiaba p'e atajida mãik'aapa ãpùtee wãjida Jerusalendee.