Abías Judadepema rey pada
13
1 Israel eujãde Jeroboán dieciocho año rey bùde, Reboán warra Abías rey beeji Judá eujãde. 2 Jerusalende bapachi mãik'aapa rey paji año õpee wãyaarude. Chi nawe Guibeádepema Uriel ãichak'e paji; t'âjarapatap'edaa Micaías.Abías rey bùde jura chõoji Jeroboán ome. 3 Ma–it'ee Abiapa cuatrocientos mil soldaorã pia chõo k'awaa beerã jùrùt'eraji chõonadamerã ichi eere. Jõdee Jeroboanpa ochocientos mil soldaorã jùrùt'eraji chõonadamerã ichi eere.
4 Efraindeepa uchiadap'edaarã eujãde ee jêra bùmaa panadak'ãri, Abías ak'ùnâ beeji Zemaraim eede mãik'aapa nãga biaji: “¡Ûrítù Jeroboán, israelitaarã ome! 5 ¿Parãpa k'awada–e p'anùk'ã aji, israelitaarã Ak'õre Waibùapa israelitaarã bùji Daviddeepa uchiadap'edaarã jua ek'ari ichita mãga p'anapataadamerã? 6 Tachi Ak'õrepa mãga jaraji mîda, David warra Salomón ak'ùpari aba, Nabatpa mãga k'inia–e paji. Ooamaa baji Tachi Ak'õrepa jaradak'a. 7 Mapa eperãarã t'ãri k'achia–idaa beerã chip'e ataji chõodamerã Salomón warra Reboán ome, iru k'ûtrãa pada perã, mak'ùara k'îsia k'awa–ee, juatau wêe.
8 Ârá parã auk'a chõo jùrùmaa p'anù mù ome, Tachi Ak'õrepa Daviddeepa uchiadap'edaarã mùk'a bùji mîda israelitaarã ak'ùpariimerã. ¿K'îsia p'anù–ek'ã aji, parãpa tai p'oyaadai parã tai k'ãyaara chok'araara p'anadairã mãik'aapa ma p'ak'a chak'e k'îrak'a bee Jeroboanpa nêedee oopida parã eere p'anadairã? 9 Parãpa Levideepa uchiadap'edaarã, p'aareerã Aarondeepa uchiadap'edaarã paara Israeldeepa jërek'oojida, ma k'ãyaara awaraa p'aareerã apata bùdait'ee ijãadak'aa beerãpa oopatak'a. Wãara eperã jîp'aapa p'ak'a ùmùk'îra aneeru pùrã oveja ùmùk'îraarã siete ome, ¡parãpa ichiak'au bùpata iru juadoopa peemerã mãik'aapa paamerã ma Ak'õre Waibùa–eerã–it'ee!
10 Mamîda tai–it'eeta Tachi Ak'õre Jõmaarã Ak'õre Waibùa. Irude ijãa amaadak'aa paji. Tai eerepema p'aareerã Aarondeepa uchiadap'edaarã mãik'aapa Levideepa uchiadap'edaarãpa ãra k'aripapata. 11 Tap'eda, k'ewara paara ãrapa ne–animalaarã Tachi Ak'õre–it'ee paa jõpipata mãik'aapa iru–it'ee ne–inaa t'ûa bapari paapata. Jõma oopata Tachi Ak'õre ley p'ãdade jara bùk'a ma pan bùdai naaweda iru mesade. K'ewara lámpara k'oopata ma lámpara bùpata nêedee oodade. Jõma oopata Tachi Ak'õrepa jaradak'a. Mamîda paråpata mãga oodak'aa. 12 Maperã nãgùde k'îsiadaipia bù. Tachi Ak'õre tai ome bapari mãik'aapa tai naa wãpari. Iru p'aareerãpa ãchi trompeta chaadak'ãri, tai chõo p'aneedait'ee parã ome. Israelitaarã, mùa chupùria iidi bù parã chõonaadamerã tachi chonaarã Ak'õre Waibùa ome. ¡Iru p'oyaada–e pait'eeda!” aji.
13 Aù naaweda Jeroboanpa ichi soldaorã ûk'uru pëiji Judadepema soldaorã ãpùteik'a eere, ma eereepa ãra ârù wãdamerã. Jõdee soldaorã chok'araara Judadepema soldaorã k'îrapite p'aneejida. 14 Mãga nùde Judadepema soldaorãpa ãpùtee ak'ùdak'ãri, unujida ma israelitaarã soldaorãpa chõo che p'anù ãchi ãpùteik'aapa, k'îrapiteepa paara. Mapa ùt'aa iidijida Tachi Ak'õrepa ãchi k'aripamerã. Mãga nùde ma p'aareerãpa ãchi trompeta chaa p'aneejida. 15 Mãpai Judadepema soldaorã bia jõnùde chõodait'ee, Tachi Ak'õrepa ãramaa israelitaarã soldaorã Jeroboán ome p'oyaapiji. Mãgá Abías Judadepema soldaorã ome ma chõo p'oyaajida. 16 Ma israelitaarã jîchoo wãjida Judadepemaarã naa, Tachi Ak'õrepa p'oyaapida perã. 17 Mamîda Abías ichi eere p'anadap'edaarã ome ma israelitaarã cho–k'ara peek'oojida; soldaorã quinientos mil Jeroboanpa jùrùt'erada. 18 Mãgá israelitaarã k'îra nejasia wãjida ãchi eujãdee. Jõdee Judadepemaarã o–îa p'aneejida ãchi chonaarã Ak'õre Waibùapa ãchi k'aripada perã.
19 Chõodap'eda, Abías eere p'anadap'edaarã Jeroboán eere p'anadap'edaarã t'êe wãjida mãik'aapa nãgà israelitaarã p'uuru jãri ata wãjida: Betel, Jesaná, Efrón; ma p'uuru ik'aawa bee p'uuru k'aipee paara. 20 Abías chok'ai bùde Jeroboanpa chõo apida p'oyaa–e paji. T'êepai Tachi Ak'õrepa Jeroboán @p'ua oop'eda, piuji. 21 Maapai jõmaarãpa rey Abías t'o iru p'anajida. Irua wêra catorce iru baji. Mãùrã ome ooji warrarã veintidós; k'aurã dieciséis. 22 Awaraa ne–inaa Abiapa ooda iru bapariida ome p'ã bù Tachi Ak'õre pedee jarapari Idopa p'ãdade.