Judade Joacaz rey pada
(2 Reyes 23.31-35)
36
1 Maap'eda Judadeepa uchiadap'edaarãpa Josías warra Joacaz rey bùjida Jerusalende chi ak'õre pari. 2 Joacaz veintitrés año iru baji rey beek'ãri. Atane õpee rey baji Jerusalende. 3 Joacaz rey bùde Egiptodepema rey Necaopa k'inia–e baji rey bamerã Jerusalende. Mapa rey mimiadeepa uchiapiji. Mãga nùde Necaopa Judadepemaarãmaa impuesto p'aapiji: p'arat'a tres mil trescientos kilo, nêe treinta y tres kilo. 4 Ma t'êepai Egiptodepema rey Necaopa Joacaz âpema Eliaquín bùji Judadepemaarã rey pamerã. Eliaquín t'â chiwidi t'â bùji; Joacim. Maap'eda Necaopa Joacaz ateeji Egipto eujãdee. Mama piuji.Judade Joacim rey pada
(2 Reyes 23.36-24.8)
5 Joacim veinticinco año iru baji rey beek'ãri. Jerusalende rey baji once año wãyaarude. Joacimpa ne–inaa k'achia oopachi Tachi Ak'õre k'îrapite. 6 Joacim rey bùde Babiloniadepema rey Nabucodonosor chõo cheji iru ome. Iru p'oyaadap'eda, cadena broncedee oodapa jâjida mãik'aapa ateejida Babilonia eujãdee. 7 Ma awara Babiloniadepema rey Nabucodonosorpa Tachi Ak'õre tedepema net'aa jita atap'eda, ateeji bùit'ee ichi ak'õre waibùa apatap'edaa tede Babilonia eujãde.
8 Awaraa ne–inaa Joacimpa ooda, irua p'ek'au k'achia oopariida paara, p'ã bù Israeldepema mãik'aapa Judadepema reyrãpa oopatap'edaa p'ãdap'edaa librode. Iru warra Joaquín rey beeji iru pari.
Judade Joaquín rey pada
(2 Reyes 24.9-10)
9 Joaquín dieciocho año iru baji rey beek'ãri. Rey baji Jerusalende atane õpee, ewari diez. Mãga nùde ne–inaa k'achia oopachi Tachi Ak'õre k'îrapite. 10 Año ewaa wãk'ãri, rey Nabucodonosorpa jaraji iru ateedamerã Babilonia eujãdee, Tachi Ak'õre tedepema net'aa pi–iara bee unudap'edaa ome. Mãpai Joaquín pari, iru ëreerãdepema Sedequías Judadepemaarã mãik'aapa Jerusalendepemaarã rey bùji.
Judade Sedequías rey pada
(2 Reyes 24.18-20; Jeremías 52.1-3)
11 Judade Sedequías rey beek'ãri, veintiún año iru baji. Rey baji Jerusalende once año wãyaarude. 12 Sedequiapa ne–inaa k'achia oopachi Tachi Ak'õre k'îrapite. Oo–e paji Tachi Ak'õre pedee jarapari Jeremiapa jaradak'a Tachi Ak'õrepa jarapida jarak'ãri. 13 Ma awara oo–e paji Babiloniadepema rey Nabucodonosorpa oopidak'a, aù naaweda Tachi Ak'õre k'îrapite mãgà rey eere t'îuit'eeda ada mîda. Sedequías k'ùùrù k'isua baji. Israelitaarã Ak'õre Waibùade ijãa k'inia–e paji.
14 Ma awara Judadepemaarã poro waibùarã, p'aareerã ome Tachi Ak'õrede ijãa amaa p'aneejida mãik'aapa ijãadak'aa beerãpa oopatap'edaak'a oomaa p'aneejida. Awaraarã ak'õre waibùa apatap'edaa net'aa bùjida Tachi Ak'õre tede, irua jaraji mîda ma te ichia jùrùt'erada Jerusalende ichi–it'ee aupai paji. 15 Maapai israelitaarã chonaarã Ak'õre Waibùapa jara pëiji ãrapa p'ek'au k'achia oopata ichimaa jaradamerã mãik'aapa waya ichide ijãa p'aneedamerã. Mãga jara pëiji ichi pedee jarapataarã ideepa, ichia wãara ma p'uuru chupùria k'awaa bada perã mãik'aapa ãra t'ãide ba k'inia bada perã. 16 Mamîda ma jara pëida pedee ûridak'ãri, ma eperãarã ëijida mãik'aapa Tachi Ak'õre, iru pedee jarapataarã ome oo iru p'anajida. Maperãpù Tachi Ak'õre waa choo–e paji. K'îrau beeji ma eperãarã ome mãik'aapa k'îsia beeji ãchi miapiit'ee.
Tachi Ak'õre te jõpidap'edaa
(2 Reyes 25.1-21; Jeremías 52.4-27; 36.22-23; Esdras 1.1-3)
17 Maapai Tachi Ak'õrepa Babiloniadepema rey iru eere p'anadap'edaarã ome pëiji Jerusalendee. Mãgùpa Jerusalendepema k'ûtrãarã peepiji espadapa Tachi Ak'õre tede. Chupùria k'awa–e paji k'ûtrãarã, awêraarã, chonaarã, k'ayaa beerã paara. Tachi Ak'õrepa ma jõmaarã baaipiji rey Nabucodonosor juade. 18 Ma Babiloniadepema reypa ne–inaa jõmaweda Tachi Ak'õre tede bada, net'aa ma–ãri waibùa parumaa jãri ataji nêe, p'arat'a mama ùa bada ome. Ichiaba mãga ooji reypa net'aa iru bada ome, iru ek'ari beerãpa iru p'anadap'edaa ome. Ma net'aa jõmaweda ateejida Babilonia eujãdee. 19 Ma awara Jerusalendeepa uchiadai naaweda, mãùrãpa Tachi Ak'õre te paa pëijida mãik'aapa muralla Jerusalén p'uuru t'ùak'au bada ãrik'oojida. Ichiaba rey palacio awaraa te pia ome paa pëijida.
20 Maap'eda chi chok'ai uchiadap'edaarã ma chõodap'edaadeepa ateejida Babilonia eujãdee. Mama ãchi esclavoorã mãik'aapa ãchi warrarã esclavoorã papijida. Mãga p'aneejida Persiadepemaarãpa ma Babiloniadepemaarã p'oyaaruta misa. 21 Ma jõma p'asaji Tachi Ak'õrepa jaradak'a ichi pedee jarapari Jeremías ideepa. Mãgá Judá eujã arajãgaa beeji âi pùk'a bù, año setenta wãyaarude.
Persiadepema rey Ciropa jarada
22 Persiadepema rey Ciro naa año rey bùde Tachi Ak'õrepa irumaa k'îsiapiji Judadepemaarã chupùria k'awaait'ee. Aù naaweda Tachi Ak'õrepa mãga ooit'eeda aji, ichi pedee jarapari Jeremías k'ap'ùa pari. 23 Maperã Persiadepema rey Ciropa mãgaji:
“Mù, Persiadepema rey Ciropa nãga jara bù: ‘Tachi Ak'õre ùt'ari baparipa eujã awara–awaraadepemaarã mù juade bùji. Irua k'inia bù mùa te oopimerã iru–it'ee Jerusalén p'uurude Judá eujãde. Mapa mùa jara bù parã Tachi Ak'õre p'uurudepemaarã wãdaipia bù ma mimia oode. Mùa k'inia bùda aji, parã Ak'õre Waibùapa parã k'aripamerã.’ ”