Roboanpa soldaorã p'e atada Jerusalende
11
1 Mãgá Reboán Jerusalende pak'ãri, Judadeepa uchiadap'edaarã mãik'aapa Benjamindeepa uchiadap'edaarã chip'e atap'eda, ciento ochenta mil chõo k'awaa beerã jùrùt'eraji chõonadamerã ma israelitaarã ome, jõmaweda p'aneedamerã ichi jua ek'ari. 2 Mãga nùde Tachi Ak'õrepa ichi pedee jarapari Semaiamaa nãga jaraji: 3 “Judadepema rey Salomón warra Roboanmaa mãik'aapa israelitaarã Judadeepa uchiadap'edaarã eujãde p'anù mãik'aapa Benjamindeepa uchiadap'edaarã eujãde p'anùùrãmaa 4 Tachi Ak'õrepa nãga jara bù: ‘Parã auk'aarã ome chõonáatù. Ma k'ãyaara pãchi temaa wãdapáde aji, ma p'asada mùa oopida perã.’ Mãga ûridak'ãri, waa k'îsiada–e paji chõonadait'ee Jeroboán eere p'anadap'edaarã ome.Reboanpa Judá eujãdepema p'uuru murallapa t'ùak'au bùpida
5 Roboán Jerusalende rey bùde, Judá eujãde p'uuru murallapa t'ùak'au bùpiji. 6 Nãgà p'uurude murallapa t'ùak'au bùpiji: Belén, Etam, Tecoa, 7 Betsur, Soco, Adulán, 8 Gat, Maresá, Zif, 9 Adorayin, Laquis, Azeca, 10 Zora, Ayalón, Hebrón ome. Ma p'uuru p'anajida Judadeepa uchiadap'edaarã eujãde mãik'aapa Benjamindeepa uchiadap'edaarã eujãde. 11 Soldaorã p'anapata p'uuru ichiaba piara oopiji mãik'aapa jaraji chik'o, aceite, vino aùde ùa bùpataadamerã. Soldaorã poro waibùarã pëiji ma soldaorã p'uuru bee chaa. 12 Escudo, miasu oopiji pëiit'ee ma p'uurudepemaarãmaa. Mãgá ma soldaorã p'uurude p'anapatap'edaarãpa choodai ãchi k'îra unuamaa iru p'anapatap'edaarã chõode chedak'ãri. Mãgá Judadeepa uchiadap'edaarã eujã mãik'aapa Benjamindeepa uchiadap'edaarã eujã Reboán jua ek'ari beeji.
P'aareerã Levideepa uchiadap'edaarã ome rey Reboán k'aripadap'edaa
13 Israel eujã jõmadeepa Levideepa uchiadap'edaarã p'aareerã ome cheepurujida Roboanmaa Jerusalende. 14 Mimia chejida Judade Israeldepema rey Jeroboanpa jarada perã Israel eujãde ãra mimia oonaadamerã. Maperã ãra eujã ne–animalaarã paara atabaibëijida wãdait'ee Tachi Ak'õre tedee Jerusalende. 15 Mãùrã k'ap'ùa pari Jeroboanpa p'aareerã awaraa bùji ùt'aa t'âpataadamerã ijãadak'aa beerã ùt'aa t'âpata tede netuaraarã k'îrapite, p'ak'a chak'e, chivo chak'e k'îrak'a bù oopida k'îrapite. 16 Awaraa israelitaarã, chi wãara israelitaarã Ak'õre Waibùa k'awa k'inia p'anadap'edaarã, auk'a oojida ma Levideepa uchiadap'edaarãk'a. Chejida Jerusalende ne–animalaarã peede mãik'aapa paapide ãchi chonaarã Ak'õre Waibùa–it'ee. 17 Mãgá eperãarã chok'araara p'anapachida Judá eujãde Salomón warra Reboán jua ek'ari. Mãga paji año õpee wãyaarude, Roboanpa oo bù misa chi ak'õre Salomonpa oodak'a mãik'aapa chi ak'õchona Davidpa oodak'a.
Reboán wêraarã warrarã ome
18 Roboán miak'ãiji Jerimot k'au Majalat ome. Mãgà Jerimot David warra paji; ooda chi wêra Abijaíl ome. Ma Abijaíl Eliab k'au, Isaí ãichak'e paji. 19 Roboanpa nãgà warrarã ooji chi wêra Majalat ome: Jeús, Semarías, Zaján. 20 T'êepai Roboanpa wêra awaraa ataji, Absalón k'au Macá. Ma wêra ome nãgà warrarã ooji: Abías, Atay, Ziza, Selomit. 21 Roboanpa dieciocho wêraarã iru baji mãik'aapa sesenta wêra k'ãipariirã. Mamîda chi wêra Macá audú k'inia iru baji apemaarã k'ãyaara. Roboanpa warrarã veintiocho ooji; k'aurã sesenta.
22 Roboanpa ichi warrarã bùji chi warra Macá ome ooda, t'âjarapatap'edaa Abías jua ek'ari, iru rey papi k'inia bada perã. 23 Roboanpa chi warrarã Judadeepa uchiadap'edaarã eujã mãik'aapa Benjamindeepa uchiadap'edaarã eujã jõmaade pëiji, ãra p'ananadamerã p'uuru muralla bee awara–awaraade. Chik'o k'îra t'ãdoo tee pëiji ãra ome mãik'aapa wêraarã jùrùteeji miak'ãidamerã mãùrã ome.