Israelitaarãpa oodaamaa p'aneedap'edaa reypa jaradak'a
(1 Reyes 12.1-24)
10
1 Salomón piuda t'êepai chi warra Reboán wãji Siquén p'uurudee, mama israelitaarãpa iru rey papidamerã. 2 Maapai Nabat warra Jeroboán Egipto eujãde bapachi, rey Salomón waidoopa. Mamîda k'awa atak'ãri Reboán wãda, iru auk'a wãji Siquendee awaraa israelitaarã ome. 3 T'â pëidak'ãri, iru awaraa israelitaarã ome Roboanmaa wãjida mãik'aapa mãgajida:4 —Pù ak'õrepa tai k'achia pùk'a iru bapachi chi jua ek'ari. Audú mimiapipachi mãik'aapa taimaa p'arat'a waibùa p'aapipachi. Pù mãgá t'ãri k'achia ba–e pùrã tai ome, mãgara pù jua ek'ari k'ãiwee p'anapataadait'eeda ajida.
5 Roboanpa p'anauji:
—Ãyaa wåtù mùa k'îsiamerã parãpa jaradap'edaade. Ewari õpee parumaa waya chedapáde aji, pedeede.
Wãjida irua jaradak'a. 6 Mãpai rey Roboanpa pedeeji chi ak'õre Salomón ek'ari beerã padap'edaa ome. Iidiji:
—¿K'ãata k'îsia p'anùma aji, parãpa? ¿Sãgá ma eperãarãmaa p'anauyama? aji.
7 P'anaujida:
—Idiweda pùa ma p'uuru pidaarã k'aripa beeru pùrã mãik'aapa ãramaa pedee pia jararu pùrã, t'ãri o–îa oo k'inia p'anadait'ee pùa jararuk'a.
8 Mamîda Roboanpa ma ûraa ûriamaa baji. Ooi k'ãyaara ma chonaarãpa ûraadap'edaak'a, iidinaji ichi jua ek'ari p'anadap'edaa k'ûtrãarãmaa; iru ome auk'a waridap'edaa. 9 Nãga iidiji:
—¿K'ãata k'îsia p'anùma aji, parãpa? ¿Sãgá ma eperãarãmaa p'anauyama? aji. K'inia p'anùda aji, mù t'ãri piara bapariimerã ãchi ome, mù ak'õre bada k'ãyaara.
10 Ma k'ûtrãarã, auk'a iru ome waridap'edaarãpa p'anaujida:
—Nãga p'anauipia bù ma iidi p'anùùrã pù t'ãri piara bapariimerã: ‘Parãpa k'îsia p'anù pùrã mù ak'õre parã ome t'ãri k'achia bapachi, mãgara mù audupùara t'ãri k'achia bapariit'ee. 11 Iru audú mimiapipachi pùrã parãpa jara p'anùk'a, mãgara mùa iru k'ãyaara audupùara mimiapiit'ee. Wùpipachi pùrã pak'urupa, mãgara mùa wùpiit'ee soopa.
12 Ewari õpee parumaa Jeroboán awaraa israelitaarã ome waya chejida Reboán k'îrapite, irua jaradak'a. 13 Mamîda Reboán ik'achia jaraji ãchimaa. Ma chonaarãpa ûraadap'edaak'a jara–e paji. 14 Ma k'ãyaara k'ûtrãarãpa ûraadap'edaak'a jaraji: chi ak'õrepa audú mimiapipachi pùrã, ichia audupùara mimiapiit'ee; chi ak'õrepa wùpachi pùrã pak'urupa, ichia wùpiit'eeda aji, soopa. 15 Roboanpa ûriamaa baji israelitaarãpa jaradap'edaa. Tachi Ak'õrepa iru mãgá k'ùùrù k'isua papiji p'asamerã ichia jaradak'a Nabat warra Jeroboanmaa ichi pedee jarapari Ahías ideepa; mãgà Siló p'uurudepema Ak'õre pedee jarapari ideepa. 16 Israelitaarãpa ûridak'ãri Roboanpa pedee k'achia jarada mãik'aapa k'awaadak'ãri ãchia jaradap'edaa ûriamaa bada, nãga jarajida:
“¡Mãgara taipa David t'â waa ûri k'iniada–eda! ajida. ¡Eujã abaade p'ana k'iniada–e Isaideepa uchiadap'edaarã ome! ¡Israelitaarã, wãdáma tachi temaa! ¡Daviddeepa uchiadapa ichi ëreerã ak'ùyada! ajida.
Aweda israelitaarã erreujida ãchi te chaa. 17 Judadeepa uchiadap'edaarã eujãde p'anapatap'edaarãpai p'aneejida Reboán jua ek'ari. 18 Ma t'êepai Roboanpa ichi ek'ari beerãdepema aba, Adonirán pëiji ma israelitaarãmaa mimiapide. Mamîda mãùrãpa iru mãupa bat'a peejida. Mãga ûrik'ãri, Reboán chi carreta caballopa jidiupatade isapai bataup'eda, jirabodoji Jerusalendee. 19 Mãgá israelitaarãpa ak'ùpijida Daviddeepa uchiada jua ek'ari p'anadaamaa p'anajida. At'ãri mãga k'îsia p'anù.