Sabadepema reina Salomonmaa p'asiade cheda
(1 Reyes 10.1-29)
9
1 Sabá eujãdepema reinapa ûrik'ãri chok'araarãpa Salomón t'o iru p'anù mãik'aapa Tachi Ak'õrepa iru pia oomaa bù, k'awa k'inia baji wãara wa seewa. Mapa wãji Jerusalendee Salomón k'awade. Iidida chaaree ateeji iidiit'ee Salomonmaa. Jerusalende pacheji net'aara: camelloorã, k'era, nêe waibùa mãu pi–ia chok'ara ome. Salomón k'îrapite pak'ãri, ichia k'îsia iru bada iidiit'ee iidimaa beeji. 2 Salomonpa ma jõmaweda pia p'anauji. Iru–it'ee iidida audú chaaree wê–e paji. 3 Sabadepema reinapa mãga ûrik'ãri, k'awaaji wãara Salomonta jõmaarã k'ãyaara k'îsia k'awaara bù. Ma awara Salomón palacio pi–ia unuji. 4 Ak'ùji chik'ora mesade bù; Salomón ek'ari beerã su–ak'ù beepari pi–ia p'anù; chi mimiapataarã mãik'aapa vino topipataarã p'aru pi–ia jâ p'anù; ne–animalaarã Tachi Ak'õre–it'ee paa jõpi p'anù iru tede. Ma jõma ak'ùp'eda, p'era pùk'a beeji. 5 Mapa rey Salomonmaa mãgaji: “Mùchi eujãde bùde mùmaa nepùrùpachida pùa ooda mãik'aapa pù k'îsia k'awaara bù. Ârá k'awa bù wãarata nepùrùdap'edaa. 6 Ijãa bù mùchi taupa na jõma unu bairã. Esa–auk'apai mùmaa nepùrùda–e paji. Pù audupùara k'îsia k'awaa bapari ãrapa nepùrùdap'edaa k'ãyaara mãik'aapa net'aara waapùara iru bù. 7 ¡Pùchi wêraarã o–îa p'anadaipia bù, pù ek'ari beerã paara, pù k'îsia k'awaa pedee ichita ûripata perã! 8 ¡Wãara, pù Ak'õre Waibùa t'ãri pia bapari pù ome, pù pia ak'ùpari perã mãik'aapa pù israelitaarã rey nãgá papida perã! ¡Israelitaarã Ak'õre Waibùapa ãchi audú k'inia iru bapari perã, ãchi rey pia jua ek'ari bùjida! aji.9 Mãga jarap'eda, ma Sabadepema reinapa Salomonmaa teeji mil, novecientos sesenta kilo nêe mãik'aapa k'era, mãu pi–ia aù ârù. Aù naaweda k'era waibùara wê–e paji Israel eujãde ma k'era teeda k'ãyaara Sabadepema reinapa rey Salomonmaa.
10 Ma awara rey Hirampa barco pëida Ofirdee ãpùtee chedak'ãri, nêe ichiaba aneejida, sándalo pak'uru chok'ara ome, mãu pi–ia paara. 11 Ma sándalo pak'urudee Salomonpa escalera oopiji bùdamerã Tachi Ak'õre tede, ichi palaciode paara. Ichiaba madee oopiji arpa lira ome, aùde música chaadamerã. Aù naaweda, t'êepai paara, sándalo pak'uru chok'araara unuda–e paji Israel eujãde.
12 Salomonpa ichiaba net'aa teeji Sabadepema reinamaa; jõmaweda ichia iididata, awaraa net'aa ome. Salomonpa ma reinamaa net'aara teeji reinapa irumaa teeda k'ãyaara. Maap'eda ma reina ãpùtee wãji ichi eujãdee, ichi ome nipapatap'edaarã ome.
Rey Salomonpa net'aara iru bada
(1 Reyes 10.14-29)
13 Año chaa Salomonpa veintidós mil kilo nêe jitapachi, 14 juasia–ee impuesto netopataarãpa p'aapatap'edaa mãik'aapa Arabiadepema reyrãpa, awaraa eujãdepemaarã ak'ùpataarãpa p'aapatap'edaa paara. 15 Mãgá nêe waibùa jitap'eda, Salomonpa oopiji escudo tawara bee doscientos nêe sîdadee; nêe kilo seis ma chaachaa. 16 Ichiaba escudo k'aipee trescientos oopiji mãgee nêedee; kilo aba ap'eda esa–auk'a waa ma chaachaa. Mãgà escudo bùji ichi palacio “Líbano pak'uru–idaa jêra bù” apatap'edaade.
17 Ma awara rey su–ak'ù beepari waibùa oopiji marfildee, nêe pi–ia, nejarra wêe bùpa p'êeda. 18 Ma rey su–ak'ù beeparide pait'ee escalón seis oojida. Ma escalón k'â chaachaa león ak'ù nâbù k'îrak'a bù bùjida. Ma su–ak'ù beepari edaik'a eere ne–inaa bùùrù âipari bùjida. Ma su–ak'ù beepari ãpùteik'a eere p'ùtrùa baji. 19 Ma su–ak'ù beepari ik'aawa chaa jua âipari oojida mãik'aapa ma chaachaa ik'aawa león ak'ù nâbù k'îrak'a bù ichiaba bùjida. Awaraa rey apidaapa rey su–ak'ù beepari pi–iara bù iru p'anada–e paji. 20 Ma awara Salomonpa ichi copa, p'arat'u paara jõmaweda oopiji nêedee, bùdait'ee ma “Líbano pak'uru–idaa jêra bù” apatap'edaa palaciode. Ma palaciode net'aa apida ooda–e paji p'arat'adee, mãgaweda p'arat'a âpùa–e pada perã. 21 Año õpee chaa Salomonpa Tarsodepema barco pëida papachida. Ma barcode mimiapataarã rey Hirampa pëidaarã paji. Aneepachida nêe, p'arat'a, marfil, chûa, pavo real ome rey Salomon–it'ee.
22 Na p'ek'au eujãde awaraa rey net'aara, k'îsia k'awaara wê–e paji Salomonk'a. 23 Na p'ek'au eujãdepema reyrã jõmaarãpa Salomón unu k'inia p'anapachida mãik'aapa ûri k'inia p'anapachida irua pedee k'îsia k'awaa jarapida Tachi Ak'õrepa. 24 Año chaa eperãarãpa Salomonmaa regalo ateepachida: ne–inaa p'arat'adee ooda, nêedee ooda; p'aru pia; arma; ne–inaa t'ûa bapari; caballoorã, mulaarã ome.
25 Salomonpa cuatro mil te iru baji ichi caballoorã–it'ee mãik'aapa ichi carreta ùait'ee. Doce mil caballoorã iru baji; ûk'uru ma caballoorã tede; ûk'uru Jerusalende ichi palacio bùmãi.
26 Salomón rey bùde awaraa reyrã p'aneejida iru jua ek'ari, Éufrates todeepa Filistea eujã parumaa mãik'aapa Egipto eujã i parumaa. 27 Jerusalén p'uurude Salomonpa audú p'arat'a iru baji. Mãu chok'ara badak'a ma eujãde, mãga pùk'a p'arat'a waibùa paraaji. Cedro pak'uru waibùa ichiaba paraaji. Chok'ara paraaji higuera pak'uru chok'ara paraak'a ee jewedaade. 28 Salomonpa ichi ek'ari beerãmaa caballo netopiji Egiptode mãik'aapa awaraa eujãde.
Rey Salomón jai–idaada
(1 Reyes 11.41-43)
29 Rey Salomonpa ne–inaa awaraa ooda ichi rey beedak'ãriipa jai–idaarumaa unupata Tachi Ak'õre pedee jarapari Natanpa p'ãdade, Silondepema Ahiapa p'ãdade mãik'aapa ne–inaa unupari Idopa p'ãdade Nabat warra Jeroboande p'ãk'ãri. 30 Cuarenta año wãyaarude israelitaarã rey Salomón Jerusalende bapachi. 31 Jai–idaak'ãri, ùajida chi ak'õre ùadap'edaamãi David p'uurude. Chi warra Reboán rey beeji iru pari.