Awaraa ne–inaa Salomonpa ooda
(1 Reyes 9.10-28)
8
1 Salomonpa veinte año taarãji Tachi Ak'õre te mãik'aapa ichi palacio oo auparumaa. 2 Ma t'êepai Salomonpa p'uuru aù naaweda Hirammaa teedaa waya chiwidi oopiji mãik'aapa israelitaarã ma p'uurudee pëiji mama p'anapataadamerã. 3 Maap'eda Salomonpa Jamat de Sobá p'uurude chõonap'eda, p'oyaaji. 4 Ichiaba chiwidi oopiji pania wêe bù eujãde bada p'uuru Tadmor mãik'aapa jõmaweda te ne–inaa ùapata Jamat p'uurude p'anadap'edaa. 5 Ichiaba chiwidi oopiji p'uuru t'âjarapatap'edaa Bet Jorón de Arriba mãik'aapa Bet Jorón de Abajo. Ma p'uuru t'ùak'aupiji murallapa mãik'aapa ma murallade puerta choma bùpiji, pak'urupa jâadamerã. 6 Ichiaba chiwidi oopiji Balat p'uuru mãik'aapa awaraa p'uuru chok'ara ichia iru bada aùde ne–inaa ùapiit'ee ichi carreta caballoorãpa jidiupata ùapata te ome, ichi caballoorã te paara. Mãgá ichia oopi k'iniata oopiji Jerusalende, Líbano eujãde mãik'aapa jõma ichi jua ek'ari bada eujãde. 7 Aù naaweda ma eujãde p'anapatap'edaarã israelitaarã–e paji. Ma eperãarã amorreorã, hititaarã, ferezeorã, heveorã mãik'aapa jebuseorã paji. 8 Israelitaarãpa ma eujã jãri atadak'ãri, mãgà eperãarã jõmaweda jõpida–e padap'edaa perã, Salomonpa ãradeepa uchiadap'edaarã mimiapiji esclavoorãk'a. At'ãri mãga p'anù. 9 Mamîda Salomonpa israelitaarã apida mãgá mimiapi–e paji esclavoorãk'a. Ma k'ãyaara israelitaarã nãgà mimiade bùji: soldaorã, soldaorã poro waibùarã, carretade wãpatap'edaarã ãchi poro waibùarã ome mãik'aapa caballode wãpatap'edaarã ãchi poro waibùarã ome. 10 Ma te mãik'aapa p'uuru oopatap'edaarã mimia ak'ùpataadamerã Salomonpa doscientos cincuenta poro waibùarã bùji.11 Salomonpa palacio oopida Faraón k'au–it'ee aupadak'ãri, Faraón k'au aneepiji David p'uurudeepa ma palaciodee. Mãgaji: “Mù wêra baik'araa bùda aji, israelitaarã rey pada David palaciode, irua Tachi Ak'õre baaltek'a bù iru badamãi Tachi Ak'õre–it'ee aupai awara bada perã.”
12 Aù naaweda Salomonpa pórtico oopida k'îrapite awaraa altar oopiji Tachi Ak'õre tedepema altar awara. Mama irua ne–animalaarã peep'eda, Tachi Ak'õre–it'ee paa jõpipachi. 13 Mãga ooji Moisepa p'ãdade jara bùk'a: âipata ewari chaa, ai ewarik'ãri mãik'aapa nãgà fiesta õpee año chaa oopatap'edaade: Pan Levadura Wêe K'opata fiesta, Tomia apata fiesta mãik'aapa Rancho Te Oopata fiesta.
14 Chi ak'õre Davidpa jaradak'a Salomonpa p'aareerã awara–awaraa bùji ãchi mimia turniadamerã. Ichiaba Levideepa uchiadap'edaarã awara–awaraa bùji ãrapa ne–inaa chaapata turnia chaadamerã p'aareerã k'îrapite mãik'aapa p'aareerã k'aripadamerã ewari chaa mimiadak'ãri. Ichiaba Tachi Ak'õre te puerta jâapataarã awara–awaraa bùji ãchi mimia turniadamerã. Ma jõma ooji chi ak'õre Davidpa jaradak'a Tachi Ak'õrepa David jùrùt'erada perã. 15 Ma p'aareerãpa, Levideepa uchiadap'edaarãpa mãik'aapa chi net'aa pi–ia jâapataarãpa jõma oojida rey Salomonpa jaradak'a. 16 Tachi Ak'õre te ewaa oo p'aneedak'ãriipa auparutamaa, ma tede mimiapataarãpa ne–inaa jõma oojida Salomonpa jaradak'a. Mãgá Tachi Ak'õre te pi–ia beeji.
17 Ma t'êepai Salomón wãji Ezión Gueberdee mãik'aapa Elatdee Mar Rojo p'usa ide, Edom eujãde bù. 18 Salomón mama bùde Tirodepema rey Hirampa ichi jua ek'ari beerã k'ap'ùa pari Salomonmaa barco pëiji ma barco p'era k'awaa p'anadap'edaarã ome. Mãùrã Salomón mimiapataarã ome ma barcode wãjida Ofir eujãdee. Mama perá quince mil kilo nêe atanajida rey Salomon–it'ee.